Interviste cun Sandri Di Suald/Alessandro D’Osualdo.
Publicitari, ilustradôr e fumetist, consulent politic, scritôr, musicist… Contâ dut ce che al à fat al è impussibil!
Contâ dut ce che al à fat Sandri Di Suald, classe 1953, al è impussibil: publicitari, ilustradôr e fumetist, consulent politic, espert di marketing, furlanist. Ancje se lui nol si definìs cussì: «Jo mi sint un nazionalist furlan che al à a ce fâ cul Stât talian». Di lui si dîs che al è stât il prin a realizâ par furlan fumuts, zâi, rock, materiâl di didatiche, materiâl di marketing. Fra lis sôs oparis o ricuardìn il romanç «Ah! La provincie» che cul chel al à vinçût intal 1985 il premi leterari San Simon, i fumuts Tarvòs, Tzan le Valdôtaine, Relè e i libris ilustrâts «Salvans», «Arrivano i Longobardi» e «Benandants».
_
Sandri, in ce famee e ambient sêstu vignût sù?
Jo o soi di Sant Andrât dal Judri, li che si fevelave dome par furlan. I miei a fevelavin par furlan fra di lôr e ancje cun me, ma marcant simpri la impuartance dal talian. Mi visi in particolâr che e jere cussì une mê agne: simpri a dî di fevelâ par talian e di lei libris par talian. Nô o vignìn fûr di une gjenerazion che e fevelave par furlan e che e à fat il boom economic fevelant chê lenghe, che però a un ciert pont e à decidût che chê lenghe e jere une robe di vergognâsi. Butant vie cussì agnorums di storie.
_
E cuant âstu cjapât cussience de impuartance dal furlan?
I prins agns di scuele ju ai fats in seminari a Gurize, fin al ginnasio. Li e jere la regule fate ai timps dal vescul Rossi che al jere improibît fevelâ furlan. Cheste robe, par me che o soi un bastian contrari, no mi lave ju. E cussì, ogni sere o stavi in punizion in coridôr par une ore, tal frêt, parcè che mi becavin a fevelâlu cun chei altris arlêfs. E mi è vignude la passion pal furlan.
_
E cemût âstu fat a afinâle, cheste passion?
Frecuentant pre Guido Maghet. Lu calcoli il gno tutôr, o jeri ogni dì a cjase sô, a Breçan. Al veve un grum di laureis e al veve ancjemò chel sens di culture austroongjarese, ven a stâi une culture vierte a ducj i popui. Al cognosseve plui lenghis e al jere bon di dialogâ in plui situazions. Prin di dut al meteve la dignitât de persone che e à dirit di jessi se stesse e duncje di fevelâ la sô lenghe. Propit denant di lui al jere a stâ Hans Kitzmüller, che o vuei citâ come une altre grande personalitât impuartante par me. Al è il fondadôr de cjase editore Braitan, che e publiche oparis di autôrs slovens, furlans e carinzians. Al è il prin che al à voltât par talian il nobel Peter Handke. La sô traduzion par todesc dai «Turcs tal Friûl» di Pasolini e vendè un grum a Viene, fasint deventâ famose chê opare prime che e fos famose ca.
_
E cul impegn politic cemût âstu tacât?
Stant che di zovin o jeri un fantat che si dave di fâ, organizant varis events, la politiche mi veve contatât, in particolâr int de DC. Ma jo o soi lât viers i autonomiscj, forsit o ai fat un grant erôr (al riduce, ndr). Mi soi presentât a De Agostini, segretari dal Moviment Friûl e mi visi simpri che mi disè: «Tu ce studiistu? Medisine? Nô o vin bisugne di avocats, no di miedis!». Une volte che a àn viodût cemût che o lavoravi mi àn fat segretari dal Moviment pal Friûl Orientâl.
_
Ma scuse, cemût âstu fat il passaç di medisine a publicitari?
Il dissen al jere une passion e, lavorant a Tarvòs cun Chiandetti, o ai cognossût personis che cun lôr o vin metût sù la prime agjenzie di comunicazion, e dopo o soi lât indevant in chel cjamp, in socie ancje cun agjenziis grandis di Milan. Tai studis di medisine o lavi une vore ben, di fat ogni tant mi capite di cjatâ cualchi coleghe di studis che mi dîs che o ai fat mâl a molâ. Ma ancje se a son miedis di gale, ju viôt stracs, un tic deludûts. Jo invezit o ai fat une biele cariere e ancjemò cumò o ai entusiasim, duncje no mi pintìs di nuie.
_
Isal stât vê a ce fâ cun Milan che ti à judât a vê une vision plui largje?
No, par nuie. La vision vierte me à dade la lezion di pre Maghet, e il jessi intun teritori a plen cûr de Europe: baste vivilu ad implen. Mi visi simpri dal pancôr di Breçan, cognossût a incuintris de Union Paneuropeane, che al jere nassût sot de Austrie. Mi contave che in famee al fevelave par furlan, al lave a zuiâ cui altris fruts e al imparave il sloven, a scuele al imparave il talian e il todesc (tra l’altri sot dal Imperi al jere l’oblic scolastic fin ai 13 agns!). E dopo, lant militâr, al completave miôr il todesc e al imparave ancje l’ongjarês.
_
A nivel politic, âstu un mestri?
No. No ai mai vût une figure di riferiment. O ai rispiet pe figure di Fausto Schiavi (segretari dal MF, ndr): no lu ai mai cognossût, ma o ai let alc. Al jere un grant organizadôr, cun cualchi idee une vore indevant parcè che al jere un economist. Eco, il probleme dai politics autonomiscj al è che no ’nt vin mai vût un che al fos un economist pardabon preparât. Par fâ politiche, e parfin par capî la storie, covente partî de economie. Daûr di chest discors, mi ven iniment un economist ante litteram impuartant che al fo Antoni Savorgnan, che i furlaniscj dordei lu demonizin e che invezit al jere un che i tignive al Friûl, al voleve fâ il Principât dal Friûl. Lui al diseve «se o vês debits vendêt pluitost i cjamps, ma no stait a metisi cui usurârs» di Vignesie. Par chest i venezians lu àn fat fûr: al jere pericolôs pai lôr interès.
_
Duncje ce che ti à formât di plui sono stadis lis leturis?
Sì, tant che la Cjarte di Chivasso, o sul federalisim di Sturzo. E i incuintris: fâ il militâr in Val di Aoste mi à judât a cognossi une altre realtât di autonomie. E une esperience pardabon fondamentâl al è stât lâ in Catalogne, invidât cun altris di Aureli Argemì, li che o ai imparât la impuartance di pandi la lenghe minorizade tant che fatôr di lustri sociâl e fatôr di diferenziazion a nivel economic.
_
Se no fali, par te un altri mestri al è pre Checo.
Sì, lu ai tornât a scuvierzi tart, tal imprin o pensavi che al fos un leader emotîf, ma lu ai scuviert in maniere gnove tant che un riferiment pratic. Pre Toni Beline ti volte la Bibie, pre Checo ti tradûs la Messe: al è il rapuart cu la int, la comunicazion che e funzione. Cun pre Checo la messe dai 3 di Avrîl a Aquilee e jere plene, cumò e je une robe par pôcs di lôr.
_
Disimi alc che tu conseis di lei par furlan.
Lis poesiis di Franco De Gironcoli (Gurize, 1892 – Viene, 1979, ndr). O varès podût nomenâ «La Cuintristorie dal Friûl», ma le stoi metint in discussion parcè che no le cjati corete. Però pre Bepo Marchet al è un mestri par vie che al è acessibil a ducj, ironic e al riviôt une storie standardizade: chescj a son i siei trê valôrs. Ma al è un test di cjapâ cun atenzion.
_
Di zovin tu âs tacât cu la musiche, mi dîstu cualchi non impuartant in chel cjamp?
Sì, di zovin o vevi un pâr di grups di musiche rock par furlan, un si clamave Bonsignôr Walland. Pense che o fasevin la messe rock par furlan, jemplant lis glesiis! Un non su ducj: Lino Straulino. Po dopo o ai un demo di Andrea Centazzo che al rielabore musichis furlanis che e je une robe bielone, ma al è un inedit. O ai di impegnâmi a publicâlu…
_
Ti propon un zûc: disimi un personaç furlan impuartant par ogni zone dal Friûl…
Fasìn il zûc! Cjargne: Jacopo Linussio, il grant imprenditôr e economist dal 1700. Pal Friûl orientâl Celso Macor, che si è formât al liceu classic di Gurize, la farie dai plui grancj inteletuâi di cheste zone, cjapade dentri ancje la Istrie. Pal Friûl Ocidentâl bisugne dî par fuarce Pasolini, ma par dâti une rispueste mancul ovie, o met un paîs: Sacîl, parcè che a son simpri stâts bastian contraris cun ducj, e chest mi plâs. Mâr e litorâl o voi a Triest, ma par nomenâ Giuseppe Mainati, autôr dai dialics par tergestin, il dialet furlan di Triest doprât fin ae fin dal Sietcent.
__
Ultime domande, une personalitât o une opare che par te e varès di jessi valutade di plui.
Il Patriarcje Wolfger von Erla. Al è graciis a lui che o vin vût il Parlament, che il Friûl al è deventât mai cussì grant, paronant ancje su Istrie e Carinzie a jevât, e fint a Bressie e Milan a Ovest. Un che, cundut che al jere vescul di une diocesi impuartantone in Gjermanie, al à fat di dut par deventâ Patriarcje di Aquilee, che ti dîs ben la impuartance che al veve chest teritori. ❚
……………………………………………….
FOCUS. Il personaç
Wolfger von Erla – Wolfger (o Volchîr o Felcar) di Erle
(Erle, 1140 – Aquilee, 1218) al fo un patriarcje catolic todesc, patriarcje di Aquilee dal 1204 al 1218. Tal 1191 al fo nomenât vescul di Passau e tal 1195 al partecipà aes negoziazions pe liberazion dal re Ricart I Cûr di Leon e ae Crosade dal 1197/98. Intal 1204 al deventà patriarcje di Aquilee e, in gracie de sô politiche, la Patrie dal Friûl e rivà ae espansion massime. Intal 1209 al tornà a controlâ la Istrie e la Carinzie e al cjapà la lealtât di Milan, Pavie, Piacenza, Cremone e Bressie. Al lavorà ancje tant pe modernizazion e la riorganizazion de Patrie, dant acet ai banchîrs senês e favorint ce che al sarès deventât il Parlament da Patrie dal Friûl. Al ospità ancje tancj poetis e artiscj dal timp te sô cort, come i autôrs dal Parsifal e da Cjançon dai Nibeluncs. ❚