Sui trois plui antîcs che a colegavin l’Adriatic, il mâr Neri e il Baltic
I vecjos a contavin che su la spice dal Canin si podevin cjatâ aganis che a vevin il cjâf di femine e il cuarp di cjice. Ti sturnivin cul lôr cjant, ti fasevin pierdi l’orientament se mai tu vessis vude la sfortune di incuintrâlis. E ae fin, ti spolpavin a muart, smorseantti fin tal vues. Il Canin. Sedi che tu dismontis dal alt, sedi che tu ti rimpinis dal bas, al è impussibil sconfondilu con chei altris crets dal circondari. La mont Cjanine: cussì bisugnarès clamâle par furlan. Dal moment che cheste nestre lenghe e à savût ricognossi la anime feminine in dut ce che al pant la fuarce e la potence de Nature. Bon. Chê mont e je li par ricuardânus che e fâs di sentinele ae valade plui curiose e particolâr dal Friûl: la Val Resie, o Rosajanska Dolina, come che le clamin i siei abitants.
◆ Là che paisaç, ambient, storie, lenghe, etnografie si misclicin intune forme uniche in dut il mont, e par chest e je ogjet di studi di gjeolics, antropolics, botanics, ricercjadôrs di lenghis antighis e di tradizions popolârs. Meti pît intai borcs di piere e di len che si tegnin sù cjase par cjase su la gobe di rive sù des monts, ti met devant dai voi la alteritât assolude, ruspiose, incjantade, che intai secui plui di cualchidun al varès vût voie di scjafoiâ, mastiantle e glotintle, parcè che dut ce che al sune “diferent” al fâs pôre a chei che invezit si sfuarcin par fâ vinci la omologazion, la semplificazion, il pinsîr unic e il colôr dominant. Cualchidun al à adiriture inventade la liende che la popolazion di chenti e vignìs jù de Russie. Cualchidun altri al volarès omologâle cu la Slovenie.
◆ Mâl ancje a cjantâju tant che une des plui brutis cjançonetis furlanis, la solite esaltazion dal alpin fuart e coragjôs, e che e finìs cuntun ridicul “Soi di Resie o sin Furlans”. Parcè che no bisugne mai contentâsi de soluzion plui facile, che e je simpri ancje la plui stupide e duncje sbaliade in maniere profonde. I abitants de valade a àn ereditade une tradizion che e pues svantâ miârs di agns e che, di volte in volte, si fâs rituâl che al celebre il calendari di chê economie che e met insiemi l’ort, il cjamp, il bosc, la transumance dal besteam, il lavôr artesanâl; ma al devente ancje liturgjie di un crodi cristian tant antîc di supâ inte lidrîs fintremai tant di pagan, che si colore intal timp ribalton de fieste, al vose cun resistence e braùre par une diference che si fonde sul miscliç come cifre de sô anime plui vere, profonde e vivarose. Ve mo. Ancje par chest la tiere veglade de Mont Cjanine, dal Vrh Laške Planje, de Velika Baba e de Mont Guarda e je a plen dirit une tiere furlane. Cualchidun al podarès contestâ il fat che Friûl al coincît cuntun teritori là che si fevele furlan. No ai mai crodût a une stupidade tant grande. Se e fos vere, alore o varessin di escludi di cheste nestre complicade e stratificade architeture no dome la Benecie, lis valadis dal Nadison, un bon toc di Gurizan, la Valcjanâl, ma ancje Sauris, Timau, Sapade… La identitât e je lenghe, culture, storie condividude, intersezion.
◆ Se nol fos cussì, alore lis notis di cheste rubricute no varessin significât chi, su La Patrie. Di chi, di cheste valade, a partivin cramârs e guis, cu la lôr biciclete struturade in maniere inzegnose par deventâ une machine formidabile par uçâ i curtìs. E i guis di Resie a deventarin famôs in buine part de Europe Centrâl e Orientâl. Si pedalave par rivâ lontan, intal cûr di che fete di mont là che si fevelavin mil lenghis e si mastiavin mil ideis. Cuant che si tornave a cjase, a Prât di Resie, a Oseac, o ancje plui insom, a Coritis, no si puartavin inte scarsele dome chei cuatri carantans vuadagnâts in Galizie, in Slesie o in Boemie, ma ancje pinsîrs, siums e utopiis. Modis e vogladis gnovis dal mont e sul mont, che a àn insiorât ancje il rest dal Friûl: eresie, anarchie, socialisim, il rispiet pe femine, che chi e restave a tignî a puest i conts di cjase. No dome a viodi di vecjos e di fruts, o a meti sul fûc la mignestre, ma ancje a resisti, a difindi, a comedâ. E a direzi lis comunitâts cun spirt di Justizie e di Veretât. La strachetât e il marum si sbulivin fûr intal cjant siamanic e intal bal mat che al clame il rinovament dal Timp, cuant che i oms a tornavin a cjase. Bunkula e Citara a tignivin il ritmi dal pît e de man. E a dimostravin che il mâl si lu bruse dentri dal fûc dal Pust. Peraule che par furlan e devente chel “pustot” che al conserve, salvadi come che al è, ancje la fuarce di une Nature che no si rint. Come a dî che a cinise studade si podeve tornâ a tacâ cun coragjo a puartâ sù pe schene une cosse plene di fadie, ma ancje di vite. Valade isolade? Une liende! Anzit, piês, une bausie, doprade di chei che a vuelin contâ la identitât tant che il risultât di une “segregazion”. Valade scuindude? Contaitle a chei che no rivin nancje a imagjinâsi un mosaic tant colorât come chest. Culture conservative, a disin, dome parcè che e je une culture di resistence, no si plee, no acete di discomparî, di tramudâsi in alc di diferent, daûr de leç dal plui fuart, che par solit al poie la sô arogance plui sul numar che no su la cualitât.
◆ Di chi, in efiets, passant fûr pal pas di Učja, Ucee, tu puedis rivâ intun lamp intes valadis de Slovenie, lant incuintri al Lusinç. E duncje poiant i pîts su chê vie antigone che i Patriarcjis di Acuilee a segnarin sui trois protostorics che a metevin insiemi la culture e la civiltât di trê mars: l’Adriatic, il mâr Neri e il Baltic. O pûr, si pues rivâ su la gravate de Tor, che intes prossimis pontadis o cjaparìn in esam: doi flums che a rapresentin, e cetant, elements di fonde de nestre culture furlane. Baste pensâ ae cjadene dai Musis. Se o prestìn fede ae toponomastiche e ae maravee che si plate sot di un non, lis tribûs dai slâfs che a passarin par chi intal secul VI, salacor daûr dai Langobarts, a clamarin cussì chês monts parcè che inte lôr lenghe i “Muši” a son i antenâts, il spirt dai lôr basavons. Duncje la memorie. Anzit, cualchidun al tache a sostignî che Alboin, vignint de Panonie, si sarès sentât suntune spice dai Musis par mostrâ al so popul la “Langobardie”, che a Cividât e varès cjatade la sô prime sede istituzionâl. Nol è che al cambi tant se invezit il “Mons Maior”, o la Mont dal Re, come che e ven clamade inte “Historia Langobardurum” di Pauli di Warnefrit e reste chê dal Mataiûr. In chest itinerari si fermarìn ancje nô, come lui, di là sù, a cjalâ la tiere furlane dal alt. Provait a fâlu ancje voaltris. Ce us someie? Il voli nol rive a rezi une bielece tant grande. ❚
