Tal Otubar dal 2013 e je vignude fûr une ricercje di Elisabetta Farisco intitulade “Ricerca storica sull’ex macelleria già casa della Vicinia di Variano” (ed. Clape di culture “Patrie dal Friûl). Il test, te prime edizion par talian, al è un document che al à chê di fâ lûs suntun edifici storic di Varian, in comun di Basilian, prime che al sedi demolît. Chi o riproponìn la version integrâl voltade par furlan.
di Rem Spicemei
A no è justa, no, che dut al vedi di brusasi e sparì
ta chistu puòr paìs cristian.
(P.P. Pasolini, I Turcs tal Friûl)
Cjase Comunâl, o ben de Vicinie di Varian (1811-1818)
Su la mape dal Catast napoleonic dal 1811, tornade a fâ dai Austriacs sore mapis origjinâls de campagne dal 1809 (conservade li dal Archivi di Stât di Udin), intal sfuei che al rivuarde il Comun censuari di Pasian Sclavonesc, si pues viodi la mape di Varian inte sô armoniche rafigurazion a crôs.
Fig. 1: Mape napoleoniche di Varian (1811, Archivi di Stât di Udin)
Il fabricât censît cul n. 388 al è plaçât propit intal mieç de crosade, intal pont di dulà che si slungjin vie lis stradis : bande dal cjastielîr, lant a ovest, bande dal sît dal castrum roman, lant a sud, dulà che al è ancje il sît de glesie parochiâl.
Il regjistri zontât (Somarion n. 1683) nus dîs che e je proprietât dal “Comun di Varian” e che si trate propit de “Cjase Comunâl”, ven a stâi de cjase de Vicinie1, cuntune superficie censuarie di 10 centesims di piertie (100 m. cuadris, in cirche).
O sin intai agns (1809-1813) cuant che Napoleon, vint concuistât il Lombart-Venit, al pense a la sistemazion dal teritori danti une vieste aministrative gnove: ve mo che alore a son elimidadis lis Viciniis e, intal lôr puest a vegnin dadis dongje lis municipalitâts, i comuns.
Intal 1807 Varian al jere ancjemò Comun (il sindic al jere Carli Greatti), e al restà tâl fintremai al 1811, cuant che Pasian Sclavonesc (Basilian di cumò) al devente capitâl dal Comun, che al à dentri lis frazions di Visepente, Blessan, Orgnan, Varian, Vilevuarbe e Vissandon, e al è sot dal Dipartiment di Passarian.
Tal 1813 il Friûl, compagn dal Venit e de Lombardie, al vâ a finîle sot de Austrie.
Cualchi an daspò fate la mape napoleoniche, tal 1818, la Aministrazion austriache e dâ dongje il “Stât dai bens comunâi” de Provincie dal Friûl. La “cjase al n. 1”, che e corispuint al numar di mape censuarie 388, e risulte “di proprietât” de comunitât di Varian (2).
La Vicinie di Varian (XVI-XVIII secul)
Cence lâ a jentrâ inte storiografie, ancje bondante(3), che massime intai ultins decenis e à ricognossût lis comunitâts rurâls, dadis dongje magari in plui manieris in viciniis su dut il teritori european, in mont tant che in plan, come prime espression moderne di democrazie coletive, che dome il sisteme municipâl dal secul XIX al rivà biel planc a butâ jù.
Varian al à la fortune di vê e di tignî di cont un Archivi Parochiâl une vore siôr e ancjemò pôc scrutinât (4).
La esistence de antighe vicinie e je une vore ben documentade framieç de seconde metât dal Cinccent e la fin dal Sietcent midiant dai verbâi des assembleis, scritis simpri di un nodâr.
I “huomini di Commun” – il dean, almancul doi zurâts, e une desene di cjâfs di famee: Pascolo, Pontoni, Riva, Guerzo, Rosso, Urbano, Zuccato, ducj cognons che si cjatin ancjemò a Varian – si vevin “congregati ad sonum campanae more solito at vicinia dicti loci” (ai 30 di Jugn dal 1596), “ubi vicinia cogi consuevit” (ai 23 di Fevrâr dal 1568), “congregati (…) al loco solito della loro Vicinia” (ai 15 di Mai dal 1737) “inte publiche Vicinie di Varian (…) come vuê si à radunade la vicinie di chel Comun, cul avîs precedent e glon di Cjampane” (ai 12 di Jugn dal 1777). I motîfs par dâsi dongje a jerin i plui svariâts. Al podeve tratâsi di confinâ dai terens, de destinazion di capitâi “a pro’ e benefizio” de Glesie di Sant Zuan Batiste, che a jerin in dipuesit li dal Mont di Pietât di Udin par gjoldi dal interès.
Intal verbâl dai 12 di Jugn dal 1777, e dîs che i oms che si son cjatâts li de “vicinia di esso Comune” a son considerâts “rapresentanti l’intiero Comun di detta Villa”. Si à alore un’altre testemoneance, se e coventàs ancjemò, che i tiermins “Comun” e “Vicinie” a son sinonims.
“Di divignince antighe”. La Cjase de Vicinie no si vent (1841-1842)
O passìn la documentazion, sù par jù complete, conservade intal Archivi Comunâl di Basilian (buste n. 108, “Beni comunali”) su lis cuistions che in pôc timp (dal Novembar dal 1841 al Utubar dal 1842) a impegnin la Deputazion Comunâl di Pasian Sclavonesc in merit a la “cjase di proprietât di Varian al n. 388 de mape di Varian, di 10 decims, cul estim di 32,40 liris”.
Ai 29 di Novembar dal 1841, il Reâl Comissariât Distretuâl (Distret di Udin, Provincie dal Friûl, Ream Lombart-Venit), al scrîf a la Deputazion Comunâl riclamant une verifiche fate de Resonarie Provinciâl, dal an prime, dulà che si podeve viodi il prospet dai bens patrimoniâi dal Comun cul relatîf stât di utilizazion.
A son doi i fabricâts in cuistion: un al è chel di une cjase di Orgnan marcade cul n. di mape 692, chel altri fabricât al è il nestri cul n. 388 de mape di Varian.
“La Deputazion Comunâl – al scrîf il Comissari – e sarà di sigûr disponibile par dînus ce funzion che a varan par fitâlis in maniere regolâr, fale che no vessin di lâ a stâ dentri i Plevans o i Capelans pro tempore e in chest câs se par antighe costumance a vessin di vê za vût intal passât doprât chei fabricâts, e domandarà il consens superiôr in maniere che a puedin seguitâ a doprâju ancje pal avignî.
Se po no vessin di coventâ a pro dai Plevans o dai Capelans, e darà indaûr il capitolât de aste pe fitance di nûf agns”.
In cheste testemoneance di aministrazion serie, che e procure di fâ reonâ il patrimoni imobil che e je in possès, al salte fûr a clâr ancje il rispiet di vê in câs che si tratàs di une “antighe costumance”, che e vignarès a justificâ cence fal la mancjance dal vuadagn. Une maniere di fâ – ma al coventarès di lâ plui a font par podê dâ une conferme – che la Vicinie di Varian e varès vût lidrîs inte Parochie, e e veve cussì tante impuartance pe comunitât ancjemò inte metât dal Votcent, che e mostrarès il rispiet pai dirits des antighis costumancis.
Ai 3 di Zenâr dal 1842, i Deputâts Comunâi Antoni Pianina e Feliç Greatti a dan rispueste, avonde curte, al Comissariât Dipartimentâl, disint che la cjase di Orgnan al n. 692 “e covente di sei doprade par chê scuele elementâr”. Si slungjin impen par cjacarâ di chê di Varian cul n. 388 di mapâl disint che: “e je antighe, e à un local al plan tiere, no à teren difûr ator vie, fin cumò no je fitade, si pense che no puedi sei fitade cun vantaç pal Comun, e mancul ancjemò se si met in cont che par podê fitâle si varès di scugnî metii man intor”.
Stant che si trate di une cjase antighe, mâl metude e cence nancje un tic di tiere dongje vie, indi ven proponude “cun devozion (…) la vendite, robe che e sarà cetant miôr pal interès dal Comun”. Plui indenant, ma no tant, cuntune note datade ai 28 di Zenâr, de cjase si dîs che “no da nissun redit stant che no je fitade, mâl metude e piçule”. Par chel “ al pues tornâ cont di vendile”.
Ma no larâ a finîle cussì. La cjase e je antighe (e se e je definide cussì o podìn pensâ che la memorie de sô esistence e vadi indaûr almancul di doi secui), o imagjinìn che chel al sedi stât il sît dulà che si à davuelte la vite e la storie de piçule comunitât e, o disaressin vuê, al è probabil che e fos sintude tant che un patrimoni comun se, doi mês plui tart, ai 12 di Març dal 1842, il Comun di Pasian Sclavonesc al met a verbâl che “diviers Conseîrs a proponin che, impen di vendi la cjasute in cuistion, la Deputazion e meti fiers in aghe par viodi di rivâ a fitâle, se si cjate cui che al è interessât”.
Chê propueste e passe cun 18 vôts a pro e 6 contraris. Une note dal archivi, datade ai 7 di Avrîl, e marche che “cun grande maiorance di vôts al ven decidût di fitâle impen che no vendi la cjase”. Chê decision e je ritignude, di cui che al à butât jù la note, ”di vantaç (…) parcè che dopo dut e smicje a la conservazion dai bens comunâi, e e vûl ancje che a sedin doprâts cun profit”. Une idee une vore moderne e meditade.
E ven vierte alore la prcedure par fitâ la “cjasute comunâl di Varian” che, “fin cumò no à dât masse redit”. I Deputâts Comunâi Pianina e Greatti, interpelâts par fâsi dî “cetant che, secont lôr, si podarès tirâ dongje cul afit”, lôr a stimin che tignint in cont dal marcjât dai afits di Varian, il Comun al podarès rigjavâ 16 liris ad an (ai 7 di Avrîl dal 1842).
Ai 18 di Avrîl dal 1842, il perît public Luîs Novelli di Udin nus da une descrizion intai detais, ven a stâi “il stât e la situazion de cjase comunâl di Varian”.
“E je a confin di ogni bande cu la strade de Vile (…). I siei mûrs a vegnin sù sui cuatri lâts, biel che un mûr, intal mieç, al va sù fintremai sul cjast, in bon stât. Il cuviert al è di cops, poiât suntune telaradure di legnam in bon stât. Tal plan tiere a son dôs stanziis e parsore e à il cjast.
La stanzie a soreli jevât e je doprade tant che farie. Il locâl cu la puarte, a misdì, al à un scûr dopli cun dôs antis, ben metût e furnît de sô feramente. A soreli jevât al è un barconut cuntun gatar di sîs bastons, e scûr a dôs antis, bon e furnît cu la sô feramente. Barconete a tramontane cun gatar di sîs bastons. Il paviment al è di tiere rude. Sot dal cuviert dal cjast e je la sofite.
Stanzie a soreli a mont. Locâl cu la puarte a misdì cun scûr dopli a dôs antis, bon e tressât cu la sô feramente. Barcon a tramontane cun gatar di sîs bastons e scûr di fier par dentri. Barconete a soreli a mont cu la fereade, cul gatar, e scuruts di fier par dentri. Il paviment al è di teraç, in bon stât.
Cjast. Si va sù intal cjast midiant di une scjale, dute di len, che e partìs de stanzie di soreli a mont. Al à doi barcons a tramontane, e un scûr picjât tes bertuelis.
Doi barcons compagns a misdì, un cence scûr. Il paviment al è di breis gnovis, poiadis sui trâfs”.
L’avîs di aste publiche “pe fitance di nûf agns” al è dai 17 di Avost dal 1842 e al è picjât sù a Pasian Sclavonesc e a Varian ai 21 di Avost. La ufierte di partence e je di 16 liris ad an.
Il procediment de aste si davuelç ai 2 di Setembar “daspò di vê fat sunâ la cjampane e daspò che il bandidôr al veve fat i siei berlis”. Si presentin trê concorints: Pieri Antoni Pianina, Zuan Batiste Pascolo, Pieri Antoni Bertolini. La “Cjase Comunâl che e je a Varian cul n. civic 1 cul n. di mape 388” e ven fitade par nûf agns (fintremai al 1851) a Pieri Antoni Bertolini di Varian, che al à fat la ufierte di 17 liris ad an. Ogni an, tal mês di Novembar, Bertolini al varà di lâ là de Cjase Comunâl di Pasian Sclavonesc a puartâ la sume patuide “con moneta sonante di libero corso” (contrat dai 18 di Utubar dal 1842).
Conclusions
Une cartuline ilustrade, splendide, dal 1909, cu la Place dal poç (cumò Place Patriarcjât) a Varian, cu la prospetive de androne che e mene bande de culine dal cjastelîr, e mostre la Cjase de Vicinie, fasintnus viodi a clâr un plan di plui rispiet a la descrizion dal votcent5, cun int a stâ dentri, i scûrs spalancâts, cuntune insegne parsore de puarte: di sigûr che dentri al jere un artesan o un buteghîr.
Suntune crosere di vite e di moviment, la antighe Cjase Comunâl, in chê volte, e je doprade par altris robis. In vuê, un’altre volte no doprade di agns in ca, ex becjarie, maltratade tant che un spartitrafic inutil e che al intrighe, e je in spiete di sei ricognossude e ricualificade de comunitât, che le à cun costance possedude dilunc de storie. ❚
✒ Autor: Elisabetta Farisco
Tradutôr: Rem Spicemei
