AI 11 di Lui e vignarà presentade dal Arcivescul la riforme de Glesie Udinese
Ai 11 di Lui dal 2018, prins jespui de fieste dai Patrons Sant Macôr e Fortunât: la Glesie Udinese e volte pagjine intal segn de… centralizazion. A chest principi a rispuindin, di fat, lis dôs novitâts principâls e concretis dal test di riforme “O sin une robe sole par che il mont al crodi. Lis colaborazions pastorâls: gnovis oportunitâts pe azion de Glesie sul teritori furlan” che al sarà presentât dal Arcivescul bons. Andrea Bruno Mazzocato par fâ front ae riduzion dal clericât e aes cundizions sociâls e culturâls mudadis (prin di dut la scristianizazion e la mobilitât des personis) dal Friûl.
Prin di dut, la gnove organizazion teritoriâl, cul passaç di 24 a dome 8 foraniis (o sedi lis unitâts omogjeniis di teritori là che si varessin di meti in vore lis sieltis pastorâls plui impuartantis), e pâr ancjemò di plui incentradore de tant svilanade riforme des Uti metude in vore di Debora Serracchiani. Ma ancje il partî, dentri des gnovis foraniis, des colaborazions pastorâls (grups di parochiis clamadis in maniere stabile a une colaborazion fuarte), al viodarà la nomine di un unic “super plevan” (che al deventarà ancje responsabil unic, no dome di un pont di viste pastorâl, ma ancje juridic di dut il patrimoni des parochiis e des struturis colegadis tant che lis scuelis maternis), coadiuvât sì di altris predis, no plui però responsabii direts di une comunitât, ma inte vieste di “colaboradôrs pastorâi”.
In realtât, intes jentradis dal document (che “La Patrie dal Friûl” e je vignude in possès di un stampon une vore inzornât) si spindin tantis peraulis par ribati la volontât di no incorporâ nissune parochie, e sul fat che lis colaborazions pastorâls a vuelin jessi prin di dut un supuart pes piçulis comunitâts, ma chest al reste un bon intindiment lassât ai plevans, parcè che in realtât no je nissune garanzie in merit: e nancje su la continuitât de celebrazion des Messis, e nancje su chê dai sacraments principâi de iniziazion cristiane (Batisims, Comunions, Cresimis…) e des fiestis patronâls des singulis glesiis. Al è prevedibil che la plui part dal clericât furlan, par sô culture e formazion, e sarà in medie tant atente a chescj elements; in ogni câs, la riforme in se no ufrìs nissune garanzie e nancje liniis vuide. Anzit, lis pocjis robis che si disin, a van inte direzion di un acentrament bande lis comunitâts plui grandis e miôr struturadis.
No je la ristruturazion de diocesi in dome 8 grandis foraniis a creâ malcontent. Il probleme al è che inte riforme si sint la mancjance di une anime pastorâl, di un progjet reâl par imagjinâ cemût frontâ il futûr cun pôcs sacerdots e intune societât simpri plui secolarizade e scristianizade. Si trate in realtât di une riforme semplice dal clericât, che e cîr di tirâ ducj i cjantons di une cuvierte za curte, e che intune prospetive demografiche di periodi curt lu sarà simpri di plui e in maniere esponenziâl, invezit di preparâ une transizion, che si mostre ineludibile, bande parochiis che si varan di autogjestî in ducj i aspiets che, di un pont di viste teologjic, no son di competence esclusive dal sacerdot (la celebrazion de Eucaristie e de Confession, in particolâr, e il compit di jessi da cjâf inte unitât la comunitât cristiane). In particolâr, si sint la mancjade valorizazion de Glesie tant che popul di Diu, e in cheste dai laics tant che subiets dinamics, cu lis lôr competencis che a derivin dal jessi imerzûts intal “mont”, e no sempliçs “sherpa” telecomandâts dal plevan e dal clericât. E mancje la aplicazion in sens autentic dal cjapitul daûr de encicliche “Lumen gentium”, une des pieris miliârs dal Concili Vatican II. Cheste mancjance e sarès stade plui voltis segnade cul dêt intai incuintris foraniâi, ma in sostance ignorade. E je une mancjance cuasi assolude di riferiments no dome ai laics, ma ancje ai diacuns che a dan vite dispès aes piçulis comunitâts.
E propit chestis ultimis a van a pericul di jessi abandonadis a se stessis. Piçui grups di operadôrs pastorâi a son nassûts in maniere spontanie o su impuls des foraniis intes piçulis comunitâts cence plevan, e a rapresentin dispès la anime, la muse de Glesie, la continuitât de vite cristiane e ancje chê missionarietât che a son plenis lis jentradis de riforme diocesane, ma che dopo no devente sostanzie, se no in maniere incierte, in nissune linie pastorâl. Anzit, in tancj pas dal document che al vignarà presentât, si capìs invezit che la logjiche e je chê di fâ dai centris plui grues il motôr de pastorâl. Un plevan de mont al cîr di sclarîlu cuntune metafore agricule: «Di 20 agns almancul si sfuarcìn di incitâ i piçui contadins di mont (o sedi lis piçulis comunitâts) a no abandonâ i lôr tocs ingrâts e a continuâ, a ben che in maniere fadiose, a tirânt fûr risultâts. Cumò a vegnin a dî de diocesi che no vâl la pene dâsi di fâ, ma al è miôr lâ a servîsi al supermarcjât moderni che al vignarà viert no masse lontan, intune localitât ben servide da mieçs publics».
Tancj di chescj piçui grups di laics a son nassûts par sostignî la liturgjie domenicâl de Peraule in assence di sacerdot, cu la distribuzion de comunion. Un mût par continuâ a celebrâ il dì dal Signôr, par tignî unide la comunitât, par no lassâ sierade la glesie dai centris tant piçui. A pet di chestis celebrazions, l’Arcivescul Mazzocato al varès une disposizion ostîl in maniere ferme (ostilitât par altri slargjade in grandis corints de Glesie Taliane), che par dî il vêr no si fâs fature a cjatâ fûr intal test de riforme pastorâl là che e je une preference esplicite bande il moviment des personis dai centris piçui a chei plui grancj là che al celebre Messe il predi, pluitost che une celebrazion de Peraule di Diu che e mantegni la identitât des piçulis comunitâts.
Ma, a obietin diviers predis, la pussibilitât des celebrazions domenicâls in assence di presbiteri e je previodude de Glesie Taliane e des sôs liniis vuide che, a nivel locâl, a son stadis elaboradis dal Arcivescul bons. Pietro Brollo, predecessôr di bons. Mazzocato, previodint ancje un coinvolziment fuart dai diacuns. «In chest câs, si varès di clamâ l’intervent de autoritât eclesiastiche par garantî ce che, dal Concili Vatican II incà, al è vignût ae ribalte, vivût in cualchi part de diocesi in maniere tant sintude e profonde – nus sclarìs un sacerdot, tra chei plui cognossûts e preseâts intal clericât furlan -. Se di no, il laicât al restarà intune situazion subalterne, segn di une glesie clericâl di prime dal Concili. Il stes Pape Francesc al à plui voltis afermât che dopo 50 agns al bisugne ricjapâ in man la “Lumen Gentium”. Magari cussì no, Pape Bergoglio al à cjatât tancj ostacui su la sô strade».
Di chestis resistencis si sint il rivoc ancje inte riforme de Glesie Udinese. No si fevele plui, par esempli, de figure dal Referent di comunitât, o sedi «chê presince preziose che soredut intai paîs dulà che nol è il presbiteri resident, in acuardi cun chel si met tant che pont di riferiment e coordenadôr des ativitâts pastorâls de comunitât stesse», al scriveve ai 12 di Lui dal 2008, juste 10 agns indaûr, chel che al jere l’Arcivescul bons. Pietro Brollo, consegnant ai fedêi i Orientaments pastorâi “Il referent pastorâl laic”. «O volarès – al continuave bons. Brollo – che ogni plui piçul paîs, che al è siôr il nestri Friûl, al ves il so “Referent di comunitât” tant che segn di atenzion efetive e di partecipazion. Ogni plevan, responsabil di plui paîs, che al cjapi cheste indicazion tant che compit prin e ineludibil».
Chest ministeri vêr e propri, che par chel e jere previodude fintremai la consegne publiche di un mandât in Catedrâl, e che al someave finalmentri dâ compiment ae direzion dal Sinodi diocesan udinês V (convocât di bons. Battisti) di une plene colaborazion e coresponsabilitât tra clericât e laicât, al è stât invezit “soterât” in maniere svelte inte ere Mazzocato, sot dal sburt di chês corints critichis che a viodevin il pericul di une derive luterane, creant un “alter ego” laicâl dal plevan. ❚
di Roberto Pensa
