A saran distribuidis plui di 5 mil copiis de version bilengâl de Cjarte fondamentâl. La iniziative e à un grant valôr simbolic intal 75t aniversari de Costituzion e 60m dal Statût Speciâl de Regjon F-VJ
Il 2023 al è un an segnât di doi inovâi impuartants: il 75t aniversari de jentrade in vore de Costituzion de Republiche Taliane e il 60m de promulgazion dal Statût Speciâl de Regjon Autonome Friûl-Vignesie Julie. Par celebrâ in maniere simboliche chescj doi events une vore impuartants, la ARLeF – Agjenzie regjonâl pe lenghe furlane e à curât la publicazion de “Costituzion de Republiche Taliane”: une version bilengâl, par talian e par furlan, de Cjarte fondamentâl, che e sarà consegnade, tacant za dai 25 di Avrîl, a plui di 5.000 fantats che a àn a pene finît disevot agns, tai 142 Comuns furlanofons che fin cumò a àn aderît ae iniziative, ma intes prossimis setemanis si zontaran inmò altris.
◆ La iniziative – cul coordenament editoriâl di William Cisilino, diretôr de ARLeF, e la traduzion par cure dal Sportel regjonâl pe lenghe furlane – e à un grant valôr simbolic, no dome pe sô funzion divulgative, ma soredut par vie che cussì a vegnin metûts in vore i dirits (linguistics) fondamentâi dai citadins. Dirits che a cjatin conferme propit in articui specifics ripuartâts intes dôs Cjartis. Ducj i doi i documents, di fat, a cjapin dentri normis di tutele des lenghis minoritariis. L’articul 6 de Costituzion taliane al fisse che “La Republiche e tutele cun normis di pueste lis minorancis linguistichis”. In chest mût e ven ricognossude ancje la lenghe furlane, e la impuartance de sô promozion e valorizazion. Cun di plui, si garantìs ae comunitât linguistiche furlane il dirit di podê doprâ la sô lenghe in ducj i contescj de vite sociâl, par che e puedi restâ vive e proietade bande l’avignî. L’articul 3 dal Statût Speciâl, invezit, al dîs che “Inte Regjon e je ricognossude paritât di dirits e di tratament a ducj i citadins, a cualsisedi grup linguistic che a apartegnin, cu la difese des carateristichis etnichis e culturâls rispetivis”.
LA COSTITUZION TALIANE – La Costituzion e je la leç fondamentâl dal Stât talian e e je tal prin puest te jerarchie dal ordenament juridic de Republiche. Il test definitîf de Costituzion, dopo jessi stât fat bon ai 22 di Dicembar dal 1947 de Assemblee Costituente, al è stât promulgât dal Cjâf provisori dal Stât, Enrico De Nicola, ai 27 di Dicembar dal stes an, jentrant in vore il prin di Zenâr dal 1948. La Costituzion e je fate di 139 articui (5 a son stâts abrogâts) plui 18 disposizions transitoriis e finâls, spartîts in cuatri sezions: Principis fondamentâi (articui 1-12); Part prime: “Dirits e Dovês dai citadins” (articui 13-54); Part seconde: “Ordenament de Republiche” (articui 55-139); Disposizions transitoriis e finâls (disposizions I-XVIII). ❚