Sfuei Mensîl Furlan Indipendent
Archivi de Patrie

La Austrie “Puint jenfri la Europe a i Paîs di Jevât”

Barbara Cinausero

La visite dal cancelîr austriac Karl Nehammer a Vladimir Putin e à ripuartât su la sene une peraule di ordin: la Austrie “costrutore di puints”.
◆ Si domandìn dut câs se chest sproc al sedi inmò bon, e par capîlu o ripuartìn in struc lis opinions dadis fûr a un cuotidian nazionâl austriac de diplomatiche di ponte Eva Nowotny, za ambassadore pe Austrie in France, che secont jê al sarès in buine part un mît che i austriacs si tiraressin daûr tant che une cuistion di identitât. La funzion di “puint” de Austrie è je nassude in mût determinant intant de Vuere Frede: un paîs neutrâl intune posizione gjeografiche jenfri NATO e Pat di Varsavie, jenfri la Europe di Jevât e chê di Bonât.
◆ La Austrie e veve inalore une funzion politiche mondiâl e e varès dât jutori a dissidents, tirât sù centris culturâi inte Europe di Jevât e mantignût contats cun chês areis, dutis robis cetant impuartantis.
◆ Sburtade ancje dai propris interès di sigurece, tant che nazion di dimensions limitadis che no fâs part di nissune aleance difensive, la Austrie si sarès impegnade simpri a fuart par dut chel che al covente al dialic: il dirit e i colocuis internazionâi. Cetancj tratâts internazionâi a saressin duncje leâts par dret ae colaborazion di diplomatics austriacs: il dirit internazionâl dal spazi, il dirit ambientâl e ancje chel maritim, si ben che la Austrie no tocje il mâr.
◆ Il Know-how de diplomazie nazionâl al è restât, ma la situazion dal dì di vuê e je dal dut mudade.
◆ Za cjalant ae svelte une cjarte politiche europeane si capìs che chel “puint” nol esist plui. La neutrâl Austrie e je vuê une isule circondade – cu la esclusion de Svuizare – dai paîs NATO. Ancje la partignince ae UE e à mudât i rapuarts. La UE si impegne par une politiche comune dal forest, tant di vê un pês plui grant a nivel mondiâl. Chest, ben clâr, al limite la pussibilitât dai stâts membris di movisi in politiche tal forest. Bisugne po dî che ancje i telefonuts a àn fat in mût che i “mediatôrs” a deventin un di plui. Vuê i politics à an memorizât intai lôr celulârs i numars dai lôr coleghis internis e forescj e a comunichin in mût cetant plui diret e svelt. E fo propit la Austrie che, intant de prime presidence UE sot dal cancelîr Viktor Klima, intal 1999, e metè adun un colegament SMS in rêt pai sorecjâfs di guvier de UE.
◆ Chel che al reste de funzion de Austrie al ven cussì metût jù de diplomatiche Nowotny: “Nô o sin intun paîs che al da acet ai incuintris internazionâi e o sin in stât di meti a man une grande esperience”. ❚

L’EDITORIÂL / La lezion de bandiere par dismovisi dal letarc

Walter Tomada
Par sigûr o sin stâts ducj braurôs cuant e je rivade in television la storie, discognossude a tancj furlans, di Marc di Murùs (o Moruç?), ultin a rindisi ae concuiste venite dal 1420. Pûr di no dineâ la sô apartignince ae Patrie dal Friûl, lui – che al puartave la bandiere dal Stât patriarcjâl – […] lei di plui +

La piçade / Fevelìn di autonomie pluio mancul diferenziade

Mastiefumate
In Italie si torne a fevelâ di autonomie. Magari par dâi cuintri, ma si torne a discuti. La Lega cu la propueste di leç su la autonomie diferenziade e torne a metile in cuistion. Dopo la Secession de Padanie, la Devoluzion, la Gjestion des Regjons dal Nord, dutis cuistions ladis in malore, cumò Calderoli al […] lei di plui +

L’EDITORIÂL / No stin a colâ inte vuate de indiference

Walter Tomada
Al à fat une vore di scjas l’articul scrit su la “Patrie” di Setembar di Marco Moroldo, furlan che al vîf in France e che al à insegnât ai siei fîs la marilenghe. Tornât a Mortean pes vacancis di Istât, al à provât a cirî cualchi zovin o cualchi frut che al fevelàs furlan cui […] lei di plui +