✽✽ No volarès someâ blasfem se o olsi citâ une frase gjavade dai Vanzelis di Mateu e Luche par introdusi cheste mê riflession: “Il racolt al è tant, ma i operaris a son pôcs”. La parabule di Jesù e fâs riferiment a un mont pront a dâ acet ae sô Peraule, ma al vise i dissepui che, par meti in vore cheste mission, a coventin oms e feminis che si impegnin a pandile.
✽✽ Mi pâr un invît che si adate ae situazion atuâl dal popul furlan, in crisi di identitât e che al cîr, juste apont, une peraule di sperance, di chel che Pasolini al clamave “Il sogno di una cosa”.
✽✽ Un popul furlan confusionât e vitime sacrificâl di une campagne di delegjitimazion indurante e pesante, cu la sô storie e i siei valôrs ignorâts, se no cjolts vie, ma ancjetant in ecuilibri instabil tra une omologazion gjeneraliste e la acuse di jessi prede di visions arcaichis, fûr de modernitât: “reazionaris e conservadôrs”.
✽✽ Concets tant che “Salt, onest e lavoradôr” vuê a son metûts a ridicul, cuntune classe politiche locâl che dispès ju disonore, dant flât a chei che a contestin la lôr validitât.
✽✽ “Friûl gno, là sêstu finît?” al berle cualchi erêt vaiulint di chel pessimisim che i steve tant a cûr a pre Turoldo. E jù cu lis lagrimonis pal passât contadin, e pe vergjinitât pierdude di une tiere felice.
✽✽ Facil, ma ancje vergognôs. Alibi par lâ indenant a no fâ nuie par dâi cuintri ae situazion atuâl e restâ sentâts comuts intal tinel tal gnûf rûl di “leons di tastiere”, di bastiancontraris, di Cassandris, cjapantse cun dut e cun ducj, soredut cun chei che, invezit, no molin di impegnâsi pe cause identitarie.
✽✽ Fûr, tal mont reâl, tancj furlans e furlanis a spietin che cualchidun si fidi di lôr, che al crodi che al sedi ancjemò pussibil discuvierzi la braùre de lôr diversitât origjinâl.
✽✽ Gnûfs operaris si cjapin la responsabilitât di agjî par saborâ cheste cussience identitarie. L’esempli plui biel al rive de Nazionâl di balon furlane a pene nassude, e de sô partecipazion ae edizion de Europeada. No dome pe vitorie finâl magnifiche, ma par vê crodût che al fos pussibil fâ deventâ realtât une sperance che nô ducj o vin vût di piçui insù. La nestre nazionâl. E pâr une robe di pôc e al è invezit un avigniment straordenari, nassût dal bas, bon di butâ in bande ogni ostacul che al rivave par intrigâ su la sô strade. Il so principâl protagonist, Daniele Puntel, al à declarât: “L’avigniment sportîf de iniziative al à permetût di saborâ une comunicazion buine di difondi la identitât furlane, identitât che si voleve dimostrâ e che o pensi che si sedi concretizade cun cheste scuadre”.
✽✽ In fonts, cence discomodâ il Vanzeli, ancje chest al è un at di fede.. ❚