Tantis lis iniziativis te rêt
par celebrâ la Fieste de Patrie
La tele turchine e sflochete adalt, lassant barlumâ di tant in tant la sacume indorade di un rapaç. Une acuile maestose, ben diferente di chê stafaride su lis insegnis dai palaçs de Regjon, saltade fûr dal scus dome tal 1963 (ma un so von al jere za presint tal III secul intune sculture di Aquilee, indulà che si pant la idee di une citât sotane di Rome), ma che e à savût vuadagnâsi la visibilitât tai cerimoniâi uficiâi. Lis sôs sgrifis, dut câs, no àn rivât adore a intacâ la popolaritât de acuile di Bertrant, cognossude in dì di vuê tant che simbul dal Friûl. Dal rest, al sarès impussibil sconfondilis. Pronte a dominâ il teritori li che si è poiade, chê a marche “effevuggì”, lis alis daûr a sierâsi, aromai lontane dai pericui, biel che chê furlane e je inmò in svol, sgrifis prontis al atac, lenghe rosse fûr dal bec (zirât a çampe), come un che nol à pêi su pe lenghe, e pet in biele mostre, a rivendicâ forsit il fat che la sô tiere e la sô identitât a son stadis strassomeadis tai secui e ben cussiente che par buine part de sô int ator pal forest la “cjase” e je plantade tal cûr.
◆ Al sarès stât biel jessi fûr in compagnie, a viodilis in scjap, a svintulâ di gjonde pai 3 di Avrîl, soredut chest an che la intellighenzia regjonâl e ponte a fânus la fieste pe colade dal Patriarcjât. Magari cussì no, il nemì invisibil al à rimandadis dutis lis iniziativis in program pe Fieste de Patrie dal Friûl, ma la acuile e je rivade istès intai cîi dal Friûl, passant pal grant mâr di internet. No cate la impussibilitât di jessî di cjase, di fat, i furlans no i àn metude la crôs parsore e une vore di associazions si son inzegnadis par ricuardâ l’inovâl storic, midiant de rêt e dai social.
◆ Il nestri sfuei, tant par tacâ a svuedâ la cite, al à metût a disposizion il numar di Avrîl in formât digjitâl e al à poiade la iniziative “Colorìn il Friûl di zâl e di blu #stinacjase ma metìn #fûrlabandiere!!” (detais tal articul in bande). Propit la ARLeF, insiemi cul Istitût Ladin Furlan “Pre Checo Placerean”, e à mandât fûr sui social il gnûf video dal imni uficiâl dal Friûl, “Incuintri al doman” (peraulis di Renato Stroili Gurisatti e musiche di Valter Sivilotti), vincidôr dal concors burît fûr tal 2018 di ILF, ARLeF e Messaggero Veneto. Il toc musicâl, tornât a rangjâ di Geremy Serravalle e interpretât di cuatri zovinis furlanis (Consuelo Avoledo, Michela Franceschina, Jessica Interdonato e Giulia Polidori di ArteVoce Ensemble) al è insiorât des ripresis aeriis di diviersis localitâts dal Friûl (regjie dal video, realizât di Quasar Corporate, di Giorgio Milocco) e al à subite concuistât il popul dal web: in mancul di dôs setemanis, al è rivât a plui di 112.000 visualizazions, cun cuasi 1.600 condivisions e passe 1.400 “mi plâs” dome su la pagjine facebook de ARLeF. Cun di plui, diviers utents a àn pensât di interpretâ a mût lôr il test dal imni, che al è finît fintremai tai videos des mestris des scuelutis (tant che a Cjarlins).
◆ La Societât Filologjiche Furlane e à creât un percors di consultazion dai articui dedicâts ai 3 di Avrîl e al Parlament de Patrie dal Friûl, in plui di screâ un sît dedicât aes rivistis furlanis. Pai plui piçui, invezit, Docuscuele al à metût adun materiâi di scoltâ, completâ e piturâ.
◆ Un altri video cetant sintût, “Te anime e te piere”, al è stât realizât di Glesie Furlane intal domo di Vençon, cu la regjie di Massimo Garlatti Costa. A parâ vie il marum di chescj dîs, invezit, i àn pensât chei di Felici ma Furlans!, cjamant in rêt lis pontadis de seconde stagjon de lôr serie tv, biel che chei di Mataran a àn realizât un pontepet satiric e a àn ideât il speciâl “La Patrie dal Virûs” (riferiment esplicit al nestri gjornâl). Ancje comics tant che Catine e Claudio Moret a àn publicât videos di pueste sui lôr profîi social. Tancj altris a àn cjamât cjançons, filmâts e fotografiis dai agns passâts, creant grups e pagjinis tematichis, cun tescj che a son stâts mandâts vie par whastapp.
◆ Chest an, in sumis, ancje cence nissune celebrazion in pompe, o vin dimostrât di vê une acuile simpri pronte a petâ il svol, no dome intal nestri blec di cîl ma soredut dentri di nô. ❚