Vignesie, cence invît, nus à puartât vie cun malegracie
ancje il ricuart de prime vôs
che e à pandût il so Vanzeli te nestre tiere
Daspò de invasion dal 1420, la glesie di Acuilee e esistarà ancjemò par un pôc, ma dal dut disvuedade di chê dutrine che par cualchi timp e sarà dumiesteade di patriarcjis simpri plui dongje di Rome, destinade cussì a smamîsi intun nuie, dome une olme inte memorie dai manuscrits de liturgjie, ancje chê corete, emendade, riscrite ubidiente e riverente al pape. Si salve dome une resistence straordenarie e comovente inte fonde de sapience popolâr, che si rimpine su lis tradizions che a restin intes campagnis e intai borcs des nestris monts, sot forme di rogazions, di cjants popolârs, di liendis tramandadis “in file”, cuant che l’Invier al stice i umans a contâ l’epos dai antenâts, magari sot forme di flabe. E Sant Marc? Il prin a vê pandût il verbum dal vanzeli in cheste nestre tiere strente jenfri l’Adriatic e la Europe, il terapeute african, l’ebreu savint di Alessandrie di Egjit? Lait a cjatâlu, inte lidrîs profonde de Basiliche, intes pituris maraveosis de cripte, restauradis di pôc. Al è chel siaman misteriôs che al cjape sù di Sant Pieri il baston pastorâl, tant plui dongje ae sesule che no ae piertie di un vescul metropolite. La bachete di un druide pitost, buine di tignî sot de sô ponte sgobade – che e rapresentarès la lune che e cres, la sesule di Chronos, il timp, la feconditât de tiere che e je mari – il profîl dal firmament, lis coniunzions des stelis, il sunsûr dal infinît. La piture lu fâs viodi tal moment che al vuarìs doi malâts di levre o “lupus”, come che a disevin i antîcs. Il prin miracul a pene metût pît su la rive de Patrie, dongje di Lignan, par antîc “Lupoglian”, ven a stâi la “tiere dai lôfs”. I nestris vons a vevin cûr di emozionâsi, parcè che a sintivin il “miraculum” tant che un “monstrum”. Un sant vuaridôr al rivave a scombati cuintri de fuarce dal lôf (chel lupus, apont), trasformantlu in cristian. La levre e jere considerade di fat une malatie che si trasmeteve, di chês che si podevin passâ par contat. Duncje, peade ae stesse fuarce de magjie, che e cambie il mont propit in chê maniere li, tocjant cui dêts. Intal ben e intal mâl. Ancje il lôf si crodeve che al podès comunicâ la sô rabie, la sô anime, buine e triste insiemi, muardint la sô vitime. Che e riscjave cussì di jessi trasformade intun spirt che nol jere plui dome chel di un om e nancje dome chel di un lôf: “Lupus Hominarius”, miôr cognossût tant che Om lôf. E di fat, i doi che Marc al vuarìs – stant ae liende – si clamin Ulfile e Ataulf, nons che a puartin dentri di lôr la lidrîs gjermaniche antighe de bestie, venerade e maladete intal stes timp, animâl totemic e potent, vuide e sassin, diu e demoni: wulf. Il prin procès fat a un benandant di Tisane, che Carli Ginzburg al à vût pes mans, al è stât di lui paragonât a un câs dal Sîscent là che si interogave un om, in Lituanie, che al diseve di jessi un “wahrwolff”, duncje un lôf “hominarius”, bon di trasformâsi par combati cuintri dal mâl. Ce tantis coincidencis! Nol baste. Daûr de tradizion, Marc al varès scrit cu la sô stesse man il vanzeli che par secui al à polsât sot de volte dal munistîr di Sant Zuan in Tombe, dongje Devin (Duìn). Scrit inte scriture unciâl (secul VI de ete cristiane), nol varès mai plui podût jessi autografât dal sant. Ma cul timp chel libri, semence sapienziâl e religjose dal Patriarcjât di Aquilee, al è deventât strument di pietât religjose di ducj i popui de Europe Centrâl e Orientâl, ricognossût tant che chê lûs di veretât che e varès fate smamî la gnot dal mâl e dal pecjât: tant che rês e princips a vignivin jù de Polonie, de Boemie, de Bulgarie a meti la lôr sigle e la lôr firme su chê pergamene, come a pandi no dome la fede intal Crist ma ancje il ricognossiment di Aquilee come la lôr glesie mari, la semence dal lôr crodi, la costelazion che e podeve mostrâ la strade, propit chê de justizie e de veretât. Il stes Carli IV, il grant imperadôr che al sostignì la vision politiche dal patriarcje Marquart, al puartà a Praghe tant che regâl sflandorôs e unic, un fassicul di chel stes vanzeli, declarant al mont di chê ete che il cûr di Aquilee al bateve sul stes ritmi di chel di Praghe. Vignesie invezit – cence invît, si intint – nus à puartât vie cun malegracie no dome un biel trop di pagjinis di chel stes vanzeli, ma e à metût adun ancje la catidre di Sant Marc, pandint il non dal sant fintremai te sô bandiere. Lare e ludre, cence vergogne. Ma cheste no je liende, e je storie. Ben plui dure di gloti e di acetâ. ❚
