La Regjon chest an e previôt di “memoreâ” la muart dal Stât patriarcjâl, che tal 1420 al è colât intes mans di une Vignesie ludre e parone, lare e bocone: al covente jessi clârs e contâ pardabon ce che al è stât pai furlans deventâ venits par 377 agns
“In principio erat Verbum”: duncje bisugnarès almancul doprâ lis peraulis justis, “verba” apont, e cirî di capî ben ce che è sucedût – e pardabon – in chel 1420, sîscent agns fa, cuant che une des plui impuartantis realtâts economichis, sociâls, politichis e culturâls de Ete di Mieç, ven a stâi il Patriarcjât di Acuilee, al è colât intes mans di une Vignesie ludre e parone, lare e bocone, golose e prepotente, intun moment di grande crisi ancje par jê, come che o varìn mût di viodi in cheste rubricute e in chês che a vignaran, fin insom dal an. Pesant e pensant ben ogni silabe, a bon pro de Veretât. Une specie di dovê etic e morâl, prime che storic. Une “cuintristorie”, ancjemò une volte. Parcè che la Storie che si met sù cence cheste atenzion e chest scrupul e cjape puce di stiç. E ogni volte che une puce si pant, al vûl dî che e je vignude la ore di capî il parcè. Ven a stâi, di pontâ il dêt, cun coraç e buine ande, cuintri chei che la puce le movin e magari a àn dut l’interès di impestânus. “Cui prodest?”, bisugnarès domandâsi. A cui i convegnial? Che, come che si dîs, a pensâle mâl nol è biel ma si le smicje simpri. Il bant dal Assessorât ae culture de Regjon, par chest an al previôt di “memoreâ” la muart dal Stât patriarcjâl. Memoreâ. Ma mi somee che par plui di cualchidun al sarà pluitost un “celebrâ”. Come se si domandàs di celebrâ la vignude di Rome pai Celtis, Atile par Acuilee, i Avars pai Langobarts, il Ream talian pal Friûl intal 1866. Almancul cussì al pâr, leìnt articui, intervents, posizions metudis in vetrine su la stampe locâl, ancje firmadis di studiôs preseâts de Universitât dal Friûl. Chê Academie che e nas cul compit precîs di promovi la specialitât de nestre tiere e che intai ultins timps e sofrìs, e no pôc, di une crisi fuarte di identitât. Par no fevelâ de Glesie, vuidade di un Vescul che nol pâr par nuie afezionât ae storie di chê Mari che al è clamât a direzi (che al sedi cause dal acent venit?): tant che dai Patriarcjis, mi par di capî, al à cjapât sù come ereditât dome il Palaç là che al sta sentât, tirant sù une schirie di predessuts formâts intal ‘seminari che no cognossin – o adiriture a sbelein – la ricjece de tradizion. E il Parlament regjonâl? Al è rezût di un sorestant venit ancje lui, ma passât par Triest (ma ise une conzure?) a cjâf di un trop di assessôrs e conseîrs che, fûr che cualchi ecezion cetant nobile, no parin tant cjapâts des tematichis identitariis. Tant che la assessore ae Culture, la Gibelli, cun Leonart prime e cun cheste gnove edizion cumò, e fas pensâ che se i Guelfs a son stâts la cause principâl de muart dal Patriarcjât, in dì di vuê a somearessin jessi plui pericolôs i “Gibellins”!
Ma provìn a meti jù ben la cjar su la gridele. Vignesie, la Dominante, la Serenissime, di tant timp e veve sen di meti sot des grifis dal so Leon la bielece di chel Grifon che almancul par un miâr di agns al veve pandût il so lusôr intal cûr di une Europe plurâl, metint adun Mediterani, Baltic e Mâr Neri, popui che a fevelavin lenghis romanzis, gjermanichis e slavis, Ebreus, Cristians e ancje Musulmans, il respîr crût e inglaçât des monts e il stralusî des marinis. E dut chest involuçât e strenzût insiemi tant che intun grop di Salomon (no par câs rapresentât intai mosaics di Acuilee tant che proiezion simboliche di une Ete), se – come che o dovaressin fâ – o tignìn cont ancje de impuartance de Glesie Mari aquileiese, antecedente di secui ae nassite dal so stât. Di sigûr par scjafoiâ cussì di bot une organizazion tant inlidrisade e grande no bastave – al è clâr – une bufade di aiarat garp di lagune. E cussì, bisugne rindisi cont che l’an de muart dal stât patriarcjâl al à di jessi considerât dome la conclusion di une lungje malatie, sufierte e dolorose. Eh sì, parcè che Vignesie e à metût almancul cent agns, se no di plui, par seâ un tic ae volte la lidrîs di cheste plante milenarie. Bisugne lâ a cirî il sanc di Bertrant te Richinvelde, intal 1350; ma ancje intai gredeis involuçâts de famee Savorgnane, golose di insiorâsi metinsi cuintri de corone dal Imperadôr; par no tasê de prepotence de Citât di Udin, braurose di clamâ parsore di se (une ande che no i è passade, mi pâr) il dirit di rapresentance di une tiere che invezit e veve crodût, daspò Acuilee, in Cividât, forsit parcè che la frontiere e je intal cûr dai Furlans tant di plui che no i cjistiei. ❚
