Tirâ claps cuintri dal dabenisim, cun passion e dialetiche
CJANT – L’inteletuâl_Jessi cuintri, bastian contrari. Ledrôs, savoltât, maledet. Ma ancje plen di marum, tant di trasformâ la vite intune acuse continue e rabiose dal podê e des sôs liturgjiis. Velu chi il Pasolini che al à fat scandul dulinvie de sô vite, interpretant la mission dal inteletuâl tant che la necessitât di incjarnâsi intun riviel puartât indevant ancje cun dolôr e cun grande fadie par dâ la vôs a chei che no le vevin e che no le varessin mai vude, ma ancje par sbeleâ il re, dimostrant che al è dome un trombon crot devant dal mont, propit cuant che ducj chei altris si spelin lis mans par berlâ “Osanna” al so vistît fat di nuie. Nol veve intenzion di apartignî a nissune parochie, Pier Paolo, ancje se al jere animât di une fede – tal sens laic e no cristian, si intint – che lu brusave di dentri e lu trasformave intun profete: “vox clamans in deserto”, propit come chel Zuan il Batiste, destinât a finîle malementri ancje lui. Destin dai oms e des feminis che a son fats di che paste li, ben si intint. Al jere marxist, ma suspietôs di chel Partît comunist che al veve tacât a crodi plui ae struture, al aparât, ae strategjie che no ae sô mission libertarie leade ae redenzion dal proletariât, e che si jere trasformât intune glesie rigjide e zelose, cun cardinâi e vescui, zagos e fedêi in procession, dogmatiche e difidente, pronte a bolâ di eresie ducj chei che a olsavin pronunziâ un “et” diferent dal so Credo.
◆ Pasolini al jere un om di culture, ma propit par chest puartât a jessi fastidiôs bande une academie plene di se, vierte dome a chê élite sociâl che di simpri e veve miôr distinguisi dal popul analfabet, ancje mostrant cun braùre e tristerie la sô superioritât inteletuâl, sbatude in muse a fuarce di titui, laureis, dotorâts e catedris a chei che invezit no vevin vude la pussibilitât di studiâ, par vie des necessitâts de vite. E al jere ancje scritôr e poete, regjist e om di teatri, ma simpri tant lontan dai circuits bogns, peâts al monopoli di chei editôrs che a detavin la linie politiche e culturâl dal Pais, cun Feltrinelli, Bompiani, Mondadori e Einaudi in primis.
◆ Intal nestri imagjinari coletîf e reste vivarose la figure di un Pasolini che si rimpine su lis dunis di savalon di Sabaudie, neri tant che un corvat cul capot, intant che l’aiar trist i patafe un cjâf di cjavei disordenâts e sporcs. O pensi che e sedi la rapresentazion plui iconiche (adietîf che al va di mode cumò e che a Pasolini no i sarès plasût propit gran!) dal so spirt masanât e garp di bave amare, impastade cu lis peraulis dai siei scrits, cu lis imagjins dai siei film o cui tancj intervents publics passâts cualchi volte ancje su la television di Stât.
◆ Pasolini nol veve simpatie pal esercit, la idee di patrie svintulade cul colôr de bandiere, il Vatican i faseve vignî ingomit. Al crodeve che la scuele e fos un lûc studât di ogni fantasie, un laboratori là che si coltivave il consens, la ubidience, il pinsîr unic. E, come Lorenzo Milani – juste par ricuardâ un altri grant rivoluzionari di chê ete – al jere convint che e fos il spieli perfet dal so timp, là che i fîs dai siôrs a ocupavin i prins bancs e i fîs dai puars a tignivin impiade la stue de classe in Invier. Al criticave la rigjiditât di une societât come chê taliane là che il fi dal contadin al sarès stât obleât a lâ daûr des olmis di so pari. E il fat che la stesse robe i tocjàs ancje al fi dal farmacist o dal nodâr nol rapresentave dal sigûr une forme di reciprocitât democratiche.
◆ L’inteletuâl, par Pasolini, al veve di jessi prin di dut om di esperience, di ricercje, di grandis leturis, apassionât ae dialetiche, al dibatit, cul gust di stiçâ e la voie di tirâ claps cuintri dal dabenisim che al imperave. E divuardi se si dismenteave di condividi lis passion dal popul, cence mai, ben si intint, deventâ un populist! E chest al voleve dî che un inteletuâl onest al scuen frecuentâ lis “classis subalternis” par judâlis a cjapâ cussience di se: che e je simpri la prime forme di autodeterminazion, e cence di chê nol esist percors di libertât o pussibilitât di cambiament. Nol jere dificil viodilu intes ostariis piês frecuentadis de perifarie, o pûr a inflamâsi par une partide di balon, o a fâ une scampagnade fûr puartis. Lu judave a cjatâ fûr chê gramatiche in comun che i sarès stade impuartante par capî e par fâsi capî.
◆ Nol esist, ore presint, un inteletuâl tant che Pasolini. Cjalant “ce che al ufrìs il convent”, mi pâr che la mignestre e sedi masse lamie o tant sauride di brusâ la lenghe cuvierzint ogni altri savôr. ❚
:::::::::::::::::::::::::::::::::::::::::::::::::::::::::::::::::::::::::::::::::::::::
Al va cuintri dal sisteme e pûr no lu bandone mai dal dut
DISCJANT. Cualchi volte mi ven di pensâ che la resistence inteletuâl che Pasolini al esprimeve cuintri de societât dal so timp – e che lu figurave ai voi dal mont tant che un pensadôr incuiet e traviersât dal sgrisul de soference – e sedi stade une forme maraveose e straordenarie di travistiment psicologjic, morâl e culturâl. Une mascare sielte par interpretâ un sogjet. E sielte cun grande atenzion, di brâf regjist come che al jere, cence mai trascurâ nuie, nancje un particolâr che al podès meti in contradizion la intenzion cu la aparence.
◆ La narazion che Pasolini al faseve de sô famee, presentade come une vicende biografiche là che esclusion e miserie a varessin caraterizade la formazion umane e culturâl dai siei prins agns di vite, e je – apont – une narazion. La mari, Susanna Colussi, e jere une mestre furlane di Cjasarse, e duncje e veve zurât fedeltât al fassisim. No varès insegnât, se no. Il nono, Arbogasto, al vignive fûr di une famee nobiliâr di Ravene; il pari, Carlo Alberto, al jere un uficiâl dal Esercit talian, e duncje ancje incuadrât inte fedeltât al re e al duce (no stin a dismenteâsi che l’an de nassite di Pier Pauli al è il stes de Marcje su Rome. No che cheste e sedi une colpe, ma nus jude a capî miôr il clime de sô formazion). Intindìnsi alore: il nestri autôr al ven fûr di une famee ben plantade de bande dal privileç, no dal sigûr proletarie e nancje contadine. Se e jere colade in disgracie economiche, la colpe e jere dute de passion malsane pal zûc sedi dal nono che dal pari. Un malan, chel di mangjâsi i bêçs e la robe, che par solit i puars no lu àn, dal moment che ur mancje la sostance di meti su la taule: chê verde, dal zûc di cjartis, e chê de cusine di cjase. La prospetive no je indiferente e e marcje une grande contradizion, parcè che il contest origjinari di Pasolini al è piês che no borghês, secont une interpretazion marxiste de storie, dal moment che al è tal stes timp nobiliâr e militâr.
◆ Se Pier Paolo, intes sôs tantis indagjins sociâls che al meteve adun sot forme di interviste, al ves domandât al fi di un muart di fam nassût intune cjase coloniche contadine de basse furlane, o al fi di un operari savoltât inte migrance, ce che al varès mai pensât di un privilegjât deventât puar pe stupiditât dai siei antenâts, dal sigûr no lu varès mai podût mandâ in onde pal calibri des blestemis cusidis dentri de rispueste. Cheste distinzion, che e va fate se si vûl analizâ cun onestât il voli critic di Pasolini, e influence une considerazion plui largje sul so mût di proponisi tant che inteletuâl di oposizion, sielzint di jessi un pensadôr che al va cuintri dal sisteme epûr che no lu bandone mai dal dut: come se, intune clâf psicoanalitiche, al ves vude nostalgjie e voie di tornâ a recuperâ la sô apartignince. Al è come se une volte finide la sô “cerce” dal bas – fat di miserie, perifarie e puaretât – si sintìs rinfrancjât di podê tornâ a condividi i privileçs pierdûts cun chei che in maniere publiche al condanave ma che invezit in privât al continuave a frecuentâ, gjoldint di ducj i lôr privileçs. Pasolini nol veve amîs puars. A jerin ducj personaçs de alte o fintremai de altissime societât. I puars lui ju cjantave, ju rapresentave, ju meteve in sene. Ju comprave. A fasevin part di chel stes circ mediatic che lui al varès smontât fevelant di comunicazion e di lengaç. Studade la lus dal rifletôr, lôr a restavin li, inte velme di une cundizion di dulà che no jerin stâts liberâts. L’inteletuâl al bandonave il set. Al veve di gjavâsi i vistîts de plebe par meti sù l’armelin de sô superioritât. ❚
