Doi amîs, un pistum e la “Raviolo Factory”
Il prin di Dicembar dal 2021, Cristian Cattarino (26 agns) e Gabriele Penello (30 agns), a àn viert une fabriche di rafioi (cjarsons) in vie Nazario Sauro a Divilin di Vile di Cjargne.
◆ “Ducj i doi o sin cogos e o lavoravin in cusine – al conte Cristian di Talmassons –. Agns indaûr o vin lavorât insiemi a Mortean, si sin cognossûts e e je nassude une amicizie che si è mantignude tal timp. Dopo, ognidun al à cjapade la sô strade. Tal moment dal Covid, cuant che si è sierât dut, si sin tornâts a cjatâ, e in chê volte o puartavin ator i prodots. O vin dit ce biel che al sarès stât, ancje par judâ la ristorazion, meti in pîts une aziende par furnî chest servizi ai ristorants, creant prodots a misure lôr, cence vê dipendents fis. La idee e je nassude scherçant. Plui inlà tal timp si sin confrontâts e, viodût che la cifre iniziâl di meti, par tacâ la ativitât, no jere esagjerade, si sin butâts. O vin decidût di sfrutâ une part de ostarie pizarie dai gjenitôrs di Gabriele a Divilin par fâ il nestri laboratori a cost zero. Par me, la Cjargne e je il puest just par fâ i nestris prodots! Par vê une origjinalitât dal prodot stes. La nestre politiche e je chê di proponi un alc di cualitât, fat a man rispietant la tradizion.”
◆ Tal laboratori di Cristian e Gabriele si fasin cinc tipologjiis di prodots (cjarsons, gnocs, paste…), che a vegnin confezionâts intes vascjutis e dâts fûr intes buteghis di dut il Friûl. Chescj cinc prodots a puedin cambiâ daûr des stagjons e a àn une conservazion (A.T.M.) di 30 dîs; il privât ju pues cjatâ te buteghe, ju compre e sai cusine a cjase sô.
◆ “O colaborìn cun diviersis aziendis – al conte Cristian –. Nô o creìn un pistum, un riplen su misure, cu lis indicazions dal ristoradôr (grandece dal cjarson, cuantitât e tipologjie dal pistum). Nô lu produsìn e il ristoradôr si puarte a cjase il so prodot fat su misure. O colaborìn cuntun persutifici di San Denêl e o fasìn un rafiol cul so persut; cu la latarie di Ugovize o din vite a un cjarson cui siei formadis.
◆ Dopo pôc plui di un an di vite di cheste aziende, no podìn lamentâsi di cemût che e va la nestre ativitât, o vin za rivât adore di creâ il nestri zirut di clientele. Tai prodots che o fasìn, e je tante Cjargne.
◆ Tai cjarsons, par esempli, ancje se o vin un pôc modificade la recipe, o doprìn l’impast di base di chei di Çurçuvint. O vin scugnût variâ un tichinin par cjatâ l’ecuilibri just dai savôrs e de umiditât che a incidin te lôr conservazion. Il 30% dai ingredients ju cjatìn e ju comprìn in Cjargne.
◆ Il fat di jessi in Cjargne a lavorâ al à incidût su tantis robis: ce che al pese in maniere negative al è il traspuart par puartâ fûr de Cjargne la nestre produzion… la strade e je lungjute.
◆ Ma o vin in positîf il fat che o sin une realtât nassude intun teritori che si sta planc a planc dispopolant, e secont me il biel de Cjargne al è propit chest… Fevelant cun amîs de mê zone a àn cheste idee: che i prodots de Cjargne a son bogns e, di consecuence, tal nestri câs, fâ un prodot ca sù al devente une garanzie. Baste dome pensâ aes aziendis che a fasin bire, salums, formadis, cjars… nol mancje nuie!
◆ O crodìn che la Cjargne e sedi un teritori fertil che nol è tant sfrutât. Si podaressin fâ tantis robis; però, un pôc par pegrece, un pôc parcè che la int si bute jù, e un pôc par dut, no je la voie di coltivâ un pôc di plui cheste tiere.”
Par altris informazions: pagjine facebook https://www.facebook.com/RavioloFactory ❚