Sfuei Mensîl Furlan Indipendent
Archivi de Patrie

LA FABRICHE DAI… LIBRIS – Josef Marchet, Salvâ l’Italie e altris stocs

............

«Masut Tunisse al jere un biât vieli, che daspò restât vedul e mandadis a marît lis dôs frutatis, al viveve bessolìn te sô čhasute fûr dal paîs, cunt’un flic di tiere, une vačhute, un mûl, un purcìt, un pâr di pioris, cuatri ğhalinis e un ğhat vieli pôc mancul di lui. No j coventave di plui e no j sečhave lis mirindis a dinissun».
Lis voris furlanis di Josef Marchet (1902-1966) a son tantis che nol è facil di sielzi une in particolâr. Miôr no sielzi e lassâsi vuidâ la man dal câs, che dutis a son interessantis. E dutis a pandin une valence linguistiche straordenarie. Cun di fat, Marchet al è considerât une sorte di pari de lenghe furlane scrite. Prime di lui nissun al jere rivât a cheste perfezion de lenghe, a cheste ricjece e elegance.
Chescj aspiets si pues preseâiu in dute la sô produzion furlane. E ancje in chest Salvâ l’Italie e altris stocs, un librut di nancje cincuante paginis, editât intal 2000 de bande de Clape culturâl Acuilee (n. 8 de golaine Classics de leterature ladine dal Friûl). La citazion de jentrade e je l’incipit de prime conte, chê che i da il titul al libri. A son in dut nûf flabis che pre Josef lis veve scritis e publicadis intai agns subit daspò de vuere sui lunaris che al curave in chei timps.
I temis des contis no van masse lontans de tradizion popolâr furlane: la scletece e la savietât de buine int, la difidence pal forest, ma ancje pai amîs e pe parintât, i difiets eternis dal om, la voie di stâ sintâts su dôs cjadreis, la aviditât dai ustîrs che a batiin il vin e v.i. Ducj tratâts cu la sgrimie polemiche che e je stade une des carateristichis di Marchet.
I cuntignûts a son simpri vivarôs e plasevui di lei. E, ancje se, cualchi volte, a lassin perplessitâts (no jerin mighe propit ducj compagns chei che a vignivin a puartâi vie i nemâi a Masut…), al è impuartant di preseâ il sfuarç di chest scritôr di grandissime culture, che le met dute al servizi de lenghe furlane, cun chê di fondâ pardabon une koinè che i vadi ben par ducj. E cuissà ce fature che i à costât meti di bande il so biel furlan glemonàs!
In plui de prefazion di Zorç Faggin, intal libri si cjate ancje la postfazion di Zuan Nazzi. Che se Marchet al jere polemic, Nazzi al è polemicon. Cuintri di cui? Cuintri dal OLF (sicu che si clamave in chê volte chel che al è vuê l’ARLEF, valadì intal 2000) e de sô straçarie di beçs. A leilis cumò, chês riis, daspò de polemiche di za fa un an sui gjornâi talians che a sbeleavin la lenghe furlane e dut ce che i ven ator… ben… al ven di pensâ. Renzo Tramaglino al puartave doi poleçs, leâts e pronts par lâ a finîle in curt inte padiele. E chei doi a lavin di lunc a becâsi e a pitufâsi…
Laurin Zuan Nardin

Contile juste / Plebissît pustiç

Diego Navarria
“MMandi, nono.” “Mandi frut!” “Dai mo, nono, no soi un frut. O ai disenûf agns e o ai pene finît il liceu!” “Par me tu sarâs simpri un frut, il prin nevôt. Però e je vere, tu sês deventât grant, une anime lungje. Se tu cressis ancjemò tu varâs di sbassâti par jentrâ in cjase, […] lei di plui +

Presentazion / Presentazion dal libri “Fûc su Gurize”. Intal ambit dal Cors Pratic di Lenghe e Culture Furlane inmaneâtde Societât Filologjiche Furlane

Redazion
Joibe ai 17 di Avrîl dal 2025 aes sîs e mieze sore sere (18.30)SALE CONFERENCIS DE BIBLIOTECHE COMUNÂLVie Rome 10, Vile di Ruvigne / Via Roma 10, S.Giacomo di Ragogna A intervegnin: DIEGO NAVARRIA colaboradôr dal mensîl ‘La Patrie dal Friûl’e DREE ANDREA VALCIC president de Clape di Culture ‘Patrie dal Friûl’Jentrade libare lei di plui +

L’EDITORIÂL / La lezion de bandiere par dismovisi dal letarc

Walter Tomada
Par sigûr o sin stâts ducj braurôs cuant e je rivade in television la storie, discognossude a tancj furlans, di Marc di Murùs (o Moruç?), ultin a rindisi ae concuiste venite dal 1420. Pûr di no dineâ la sô apartignince ae Patrie dal Friûl, lui – che al puartave la bandiere dal Stât patriarcjâl – […] lei di plui +

La piçade / Fevelìn di autonomie pluio mancul diferenziade

Mastiefumate
In Italie si torne a fevelâ di autonomie. Magari par dâi cuintri, ma si torne a discuti. La Lega cu la propueste di leç su la autonomie diferenziade e torne a metile in cuistion. Dopo la Secession de Padanie, la Devoluzion, la Gjestion des Regjons dal Nord, dutis cuistions ladis in malore, cumò Calderoli al […] lei di plui +