SPECIÂL – La fieste dai Motârs furlans

Moreno Persello al nas a Buie tal Fevrâr dal ’58. Tal 1970 al tache a vore vie pal Istât par comprâ il Garelli di Cross che al costave 215.000 liris. Za in chei agns al cognòs e al frecuente i prins motocicliscj a la americane, cun Triumph, BSA, Sportsters e Nortons, e di chê volte al è simpri restât in chel ambient particolâr. Tal 1986 e ven coniade la peraule «MOTÂRS» par definî chê inglese di «BIKERS» e dâi il non al club che, tal 1987 al organize la prime Biker Fest a Vilegnove di Sant Denêl. Tal 1991 e nas ancje la riviste di chel setôr motociclistic che si clamarà Bikers Life e par tancj agns e sarà la uniche riviste fate in Friûl e distribuide tes ediculis di dute Italie.
Chest an o sês inmò a Osôf, ma cemût e cuant nassie la Bikerfest?
La Biker Fest e nas tal ’87 par ospitâ in Friûl e fâ cognossi la nestre biele tiere a ducj i amîs forescj che si cognosseve za in chê volte, e che a jerin tancj za ta chei agns: todescs, austriacs, ma ancje francês, svuizars… Chest an i festezìn par esempli il fat che, colât il mûr di Berlin a Novembar 1990 o sin lâts sù là sù (1000 chilometris) a cognossi chei amîs che o cognossevin nome par letare, al jere ai 14 di Avrîl dal 1990 e, dopo nodârs e cjartis infinidis o sin rivâts a puartânt a la Biker Fest di chel an, ben 35 de ex DDR. La riviste todescje di setôr nus à fat i compliments. O jerin stâts i prins, ancje dai todescs, ma la stampe taliane no à dât nissun rilêf a chest. Il setôr Custom nol interessave inmò in chê volte. Chest an a tornin pai 20 agns di ricorence!
Nus dâstu cualchi numars statistic su la manifestazion 2008?
E je stade ploie su dute Italie e su dute Europe ta chei dîs, mi plâs ricuardâ invezit chê dal 2000 che e à tocjât 30.000 (trentemil) personis e di chestis 1/3 di forescj. O vevin puartât pe prime volte in Italie (e nissun al fat inmò no la stesse robe) une gare di campionât european di Stunt Man Free Style (nissun nol cognosseve la specialitât fûr di nô in chê volte), o vevin ducj i plui grancj campions de Europe a la Biker Fest e o vevin ancje une gare Nazionâl di Dragsters, fate te zone industriâl di Riul a Osôf. Par no periculâ o vevin adiriture tornât a asfaltâ la strade a nestris spesis!
Cui jerino i Motârs?
A jerin passionâts di motos e di motoraduns che a vignivin di altris clubs furlans: Black Shadows, O’Konnors, Free Eagles, par esempli. Magari cussì no, doi nus àn lassâts: Mauro e Michele. Chei altris a jerin Francesco, Paolo, Jimmi, Sid, Loris, Claudio, Roberto, Arly, Innocente, Luca, Marzio… int che e faseve plui di 25.000 chilometris ad an nome di motoraduns di Bikers.
E vuê cui sono?
Il club al è stât sierât a la fin dai agns ’90 e cumò la fieste e je gjestide di une associazion. La plui grande sodisfazion dopo vê sierât il club e je che, vint coniât il non «Motârs» in lenghe furlane, ducj i motocicliscj furlans cumò si clamin Motârs! Une grande sodisfazion par ducj nô che o vin fat part dal club dai «Motârs Friûl», si sintìn un pôc i gjenitôrs di ducj.
Cuâl isal il rapuart tra la dimension internazionâl e la dimension furlane di chest grant event?
Nus plasarès podê valorizâ di plui il Friûl in chest contest, specialmentri parcè che o vin une grande visibilitât internazionâl, baste cjalâ i ingrès dal sît www.bikerfest.com. Magari cussì no, o sin ducj professioniscj impegnâts e no rivìn a stâ daûr a la burocrazie che e sarès necessarie par imbastî ben i contats sul teritori, par esempli Comunitât Culinâr, Montane, Le strade del vino e dei castelli, il pressut di Sant Denêl, i museus, il mototurisim. Spes o sin stâts cjapâts sot gjambe parcè che forsit no rompìn lis scjatis avonde ai alts livei. Ma a varessin di jessi lôr a capî chest e no noaltris a domandâ la caritât, ti parie? Nô o sin plui che disponibii a metisi a disposizion ma no trop a bati casse, no vin chel caratar. Ma stant che o fasìn publicitât su 70 rivistis internazionâls, se nus dessin un francut par paiâ un pocje di cjarte o podaressin stâ miôr ducj!
Vêso cualchi contat cun grups che a rivin di altris minorancis?
O vin ospits che a son spes premiâts che a vegnin di ogni bande dal mont, ancje de Americhe dal Sud e dal Nord, de Australie, e po Catalans, Bascs, Sardegnûi, ma ancje Calabrês, tantonons de Sicilie, di ducj i Paîs de Europe dal Est, Russie, Republiche Ceche, Svezie, di ogni bande. O vin articui scrits su la fieste (si puedin viodi sul sît li che o vin i comunicâts stampe internazionâi) ancje in cirilic e gjaponês. Biel no?
Christian Romanini