La tiere jenfri doi flums, il Timau e il Lusinç,
che a segnin i siei confins
Nuie ce fâ: une sgambetade su la ponte dal Kremenjak e vâl simpri la pene. Di là sù tu puedis gjoldi in struc, intune sole voglade, il Friûl. La cjadene des Alps si jeve a Nord tant che un muraion imponent e maestôs. Se l’aiar al è di cristal, dopo di un burlaç o sul tacâ dal Autun, ti pâr di podê tocjâ in ponte di dêt la spice di ogni mont. A soreli jevât tu sintis a respirâ l’altiplan dal Cjars, là che une volte si fevelave la lenghe furlane, almancul fin a dut il Sietcent, daûr di ce che a disin lis cronichis. Tiere salvadie, che e cambie la fuee e za in Otubar e cjape ducj i colôrs plui cjalts dal pitôr: zâl, ros, maron cu lis lôr sfumaduris, che ae fin si impastin dentri dal vert profont dai peçs. E, clâr, l’Adriatic. Un mâr che al è bon di contâ, ancje cence doprâ peraule, la sô storie che e dure di miârs di agns, storie di popui e di liendis, di dius e di mîts, sbrissâts di chestis bandis miscliçant sanc e salive dai popui che a vignivin jù dal cûr de Europe, de Ilirie o dal Mediterani. Un biel impast, che al è part fondante di cheste nestre identitât furlane, siore di une ricjece culturâl dificile di cjatâ di altris bandis. Une regjon miscliçade, e propit par chest plene di interès, e buine di pandi une grande curiositât in ducj chei che a decidin di traviersâle cun sapience, vuidâts di un cjalâ inteligjent. No je propit Friûl, epûr e je fondamentâl pe storie furlane. Dal sigûr no je plui teritori dal Lusinç, ancje se il flum le imbrace cu la sô ultime curve. No je tiere slave, epûr a soreli jevât i piçui borcs di piere antighe a fevelin un sloven cjarsulin là che dentri tu cjatis ancje cualchi peraule nostrane. E infin, il mâr al tache a confondisi cui cjamps, dulinvie di une frontiere licuide che nus conte une storie maraveose, ven a stâi che chi o sin pardabon sul ôr dal mont, tant che adiriture i elements primordiâi si imbastardissin un dentri di chel altri. La int che e vîf chenti e je braurose di jessi clamade “Bisiache” e di fevelâ un lengaç che al impaste intun glimuç di vocabolaris e acents furlan, sloven, venezian di tiereferme, alc fintremai di istrovenit. Cualchi studiôs al è convint che il non “Bisiacarie” al vegni fûr dal latin “bis aquae”, ven a stâi i doi flums, il Timau e il Lusinç, che a segnin i siei confins. Ma si aial propit simpri di cirî la lidrîs latine, par presentâ une etimologjie credibile? No soi convint. Mi plâs di plui chê altre ipotesi, peade ae peraule “bezjak”, che par sloven e cravuat e volarès dî torzeon, vagabont, ma ancje dispatriât, sfolât. Un che al scjampe, che al piert la lidrîs. Un sledrosât de Storie, chê impuartante, fate dai grancj, insome. Epûr un che al rivendiche la sô presince, il so mût di viodi, cjalâ e interpretâ il mont. Al pâr che Vignesie e ves agjevolât l’ingrès di colons che a vignivin di ducj i teritoris sogjets ae sô dominance par tornâ a popolâ une regjon devastade des incursions dai Turcs, tra la fin dal secul XV e il principi dal secul XV. Cussì, se l’orent sacrari di Redipulie e la nomee di Roncjis – tornade a batiâ “dai legjonaris” par celebrâ la aventure sassine di Gabriele D’Annunzio – doi lûcs che a son pôc lontans di chi, nus fasin tornâ fûr il rivoc de cjoche nazionalistiche taliane, buride fûr subit daspò de Prime vuere mondiâl e che e varès fat nassi la psicopatologjie dal Fassisim, la tiere bisiache, par miârs di agns, e à rapresentât une cerniere profonde jenfri i popui, la intersezion di culturis dome in aparence lontanis une di chê altre. I esemplis di cheste straordenarie varietât culturâl, sociâl e storiche a son tantons, ma un in particolâr al vâl la pene di jessi ricuardât pal profont valôr che al à rispiet ae nestre storie identitarie furlane. Mi riferìs al templi di Sant Zuan in Tube, tirât sù in maniere significative dongje des “bocjis” dal flum Timau, pôc lontan de roche di Devin/Duìn. Si trate di un sît tra i plui antîcs di dute la nestre regjon, che al presente une continuitât culturâl di miârs di agns, mai interote, de Preistorie ai secui de Ete di Mieç. Chi la densitât di elements “archetipics” e je cetant profonde. Il Timau al ven fûr dal cret intune forme che à di simpri inmagât la fantasie dai nestris antenâts. Dopo jessi penetrât tal grim de tiere a Rakov Skcjan, in Slovenie – che intal non al puarte il titul potent di Sant Canzian, un dai sants plui intrigants di Aquilee – al torne a viodi la lûs cun nûf (o siet, a seconde de tradizion!) bocjis: numar magjic e simbolic. Duncje al passe “per inferna”. Al mûr e al torne a nassi. Come il Crist. Come Jone. Come Artù. L’idronim Timav-Timau al è antîc. Segnalât te diocesi patriarcjine di Aquilee, al segne simpri un lûc plen di energjie, là che la aghe e ven fûr de piere. Al rapresente la potence di un Diu che al rive a vinci il scûr de muart par podê tornâ a pandi la sô vôs tra i vivents.
◆ Une sugjestion peade dal sigûr al cercli vitâl dal an agrari, a chel lâ e tornâ de lûs, al distudâsi de fuee inte prime zulugnade de Sierade e al so rivivi inte bielece de Vierte. Il storic grêc Strabon, descrivint chest teritori, nus conte di rituâi peâts al diu Soreli, al sacrifici di un cjaval blanc in so onôr, e di lôfs che a protezin lis bestiis, tant che animâi totemics parons de “selva lupanica”, il bosc che al imbraçave cui siei arbui dute cheste regjon. Un spirt cussì fuart che i cjavai a nassevin cul so simbul neri sul lôr pêl blanc a ricuart di un regâl prodigjôs fat a di un puar contadin che une dì al varès salvât un lôf de muart sigure, e di in chê volte al varès otignude la protezion dal branc. I cjavai no podevin jessi dumiesteâts, divuardi a fâur dal mâl. A vivevin salvadis e libars dongje dai lôfs che ju protezevin. Nus fevele ancje di un grant templi dedicât in onôr di Diomede, che al sarès rivât fin ca dal Orient, probabil segnâl di chê intersezion di popui che o disevin prime. Apollorodorus nus tramande un fat ancjemò plui interessant: nus conte che di chestis bandis al sarès passât fintremai Jason, puartant su lis sôs spalis, cui siei marinârs, la nâf Argo, par tornâle a meti te aghe une volte rivât su la riviere adriatiche, dopo vê scjavaçât ducj i Balcans. Cheste e je la antighe bocje che si vierzeve su la vie da la ambre: traviersant la val dal Vipau, che i antîcs a clamavin Eridanus, e leve sù su fin tal Baltic. In ete cristiane, vie pal secul V, propit dongje dal lûc là che il Timau al jes dal cret, al fo tirât sù un templi dedicât a Zuan il Batiste, une trasformazion cristiane dal cult peât al solstizi di Istât (che al cole propit inte dì di Sant Zuan!). Si crôt che lis sôs relicuiis a polsin di secui inte cripte. Il munistîr benedetin che al fo costruît li dongje al sarà puint di evangjelizazion tra i slâfs. Par chest motîf al à conservât par secui, prime che al fos puartat a Cividât, chel manuscrit che si crodeve che al fos stât compilât di Sant Marc in persone. Bisiacarie come tiere preziose par Aquilee duncje, e par ducj noaltris Furlans. Ancjemò un ôr plen di significât e di bielece. ❚
