La fuarce ae nestre scuele e je intes lidrîs de nestre int

Za l’Istât passât o vevi sperât che la pandemie e sburtàs a un esam complessîf dal sisteme des nestris scuelis par meti in vore la riprese, in sigurece, de didatiche in presince. O conseavi la valorizazion des struturis sparniçadis sul teritori, masse pôc dopradis: stiçant la frecuence, di bande dai students, dai Istitûts plui dongje de lôr residence, si saressin slizeridis lis scuelis dal cjâf lûc, e si varès ridusût il probleme dai traspuarts: cun di plui, si varès tacât ancje a smitizâ la convinzion ilusorie che i Istitûts di citât a dedin par fuarce une preparazion miôr. Invezit, dutis lis scuelis furlanis a son ecelentis sot cetancj aspiets, de ufierte formative ae dotazion di imprescj pe didatiche: si darès parimentri valôr a dutis lis realtâts dal teritori a benefici di ducj. Risolvi il gredei dai traspuarts al varès permetût di ridusi la DaD, che cetantis fameis e students no rivin a gloti.
◆ Al è passât mieç an. Ce dî? Al è propit tai moments dificii, cuant che i ecuilibris consolidâts a vegnin disfats di impreviscj, che bisugne jessi bogns di lâ indevant cence fermâsi al “si à simpri fat cussì… no si pues fâ in altre maniere”. Bisugne jessi bogns di pensâ soluzions gnovis, ancje se sul imprin a somearessin impussibilis.
◆ Alore, al vûl pensât no a ce che la scuele e je simpri stade ma a ce che e varà di jessi par davuelzi la sô funzion primarie, ven a stâi “promovi  il disvilup armonic e integrâl de persone cu la acuisizion des cognossincis che a coventin a deventâ citadins atîfs e responsabii, tal rispiet e te valorizazion des diferencis individuâls”. Chest al impon di meti in prin plan lis necessitâts di cui che al impare, no di cui che al insegne. Bisugne ripensâ a chê che une volte si clamave “didatiche puerocentriche”, rotamade in chescj ultins 30 agns par dâ spazi a un burocratic e impersonâl eficientisim che, cuntune frenesie inovative che no à sens, al vûl fâ cressi masse svelts i ritmis di disvilup dai fruts par fâur brusâ i timps… Purtrop però, intune suaze dal gjenar, a miorâ e sarà dome cualchi competence e no la personalitât interie. Ma par sigûr la didatiche de scuele dal avignì e varà di rispietâ la nature di chei che a imparin, par sodisfâ lis dibisugnis di cressite di ognidun.
Dut câs par sielzi ce inovâ e ce conservâ, no si pues fâ di mancul di rifleti sul model di citadin che si vûl fâ cressi. Tignint cont di chest model, si sielzin i obietîfs, lis competencis di promovi, i spazis, i timps e lis risorsis di invistî. E chest al sarès plui facil se la Regjon e gjoldès de competence su la scuele, parcè che cussì e podarès rindi plui siôr il patrimoni identitari dai nestris zovins e fâ di stimul e supuart al disvilup sostignibil dal teritori e dal so stes patrimoni culturâl. No par sierâsi o par nostalgjie, ma par cjatâ plui fuarce tes nestris lidrîs come i arbui che a cressin simpri plui fuarts se a son salts te tiere che ju nudrìs.
◆ Cuâl model di citadin podaressino imagjinâ? Chel dal produtôr-consumadôr, mai sodisfat dai siei risultâts, simpri competitîf, individualist, malcuiet? O chel dal citadin cun competencis e cognossincis disvilupadis intune declinazion che e cjale ae nature, al ambient, ae culture e aes personis che nus vivin dongje, a chei che a son vignûts prin e a chei che a vignaran dopo di nô? Stant che o varessin di lavorâ par vivi e no di vivi par lavorâ, jo o varès miôr la seconde soluzion par fâ cressi i nestris zovins.
◆ La scuele e à di insegnâ a vivi inte contemporaneitât; e à di stâ al pas cui timps, ma cence dismenteâ che lis dibisugnis di fonde dal om a restin simpri chês. In chescj ultims agns di sieltis e di cambiaments, inovazion e eficience no àn simpri puartât a sieltis atentis, e si à netât l’ort cun dutis lis verzis! La plui part des inovazions sperimentadis tai ultims 20 agns dal secul passât a son stadis sacrificadis cirint la competitivitât plui che la colaborazion, l’imparâ a memorie plui che il resonâ, la omologazion plui che la creativitât. L’esempli des provis Invalsi al larès analizât in maniere critiche. Nol covente dome vuadagnâ competencis se si dismenteìn dal disvilup integrâl e armonic de personalitât, e des competencis afetivis, relazionâls e creativis, dal spirt colaboratîf e de autonomie. Coventarès fâ di mancul de assurde competizion tra i Istitûts, che a cirin simpri plui “clients” par fâ viodi il sucès e la atrativitât de lôr ufierte formative, e vuarî de aspirazion bulimiche a vê grancj numars cuant che a voltis une sdrume di personis e fâs cressi la competizion, la agressivitât, e compuartaments tant che il bulisim. E, compagn, al è di evitâ il lusôr fals de idee di une scuele-aziende che e produsi int “adestrade”, invezit di progjetâ un laboratori di culture. E capî che se i “grancj Istitûts” a fasin vignî fûr plui ecelencis, in chei plui piçui si ridusin lis conflitualitâts, si motivin ancje i students plui timorôs e, in cheste maniere, si fâs cressi il sucès formatîf. Si à di jessî de logjiche dal individualisim che nus fâs sintî di bessôi e cence difesis tal mieç de masse.
◆ Ise une utopie? Ma a son lis utopiis che a àn simpri mot il mont! Su chest troi il Venit, che al à Statût ordenari, al è za plui indevant di nô. Al à domandât competencis su la scuele ben plui penzis de nestre Regjon che e je a Statût Speciâl!. A coventin competencis su la scriture dai programs, su la gjestion des risorsis (economichis e di personâl) par inviâ un cambiament radicâl e liberâsi di pratichis stanticis e demotivantis… e tornâ a dâ snait al lavôr dai mestris e dai students. Soredut parcè che la pandemie nus à fat tornâ a preseâ il fat che la scuele no je un pês ma une oportunitât che o regalìn ai nestris fîs. ❚