Melissa Colussi e à doprade pe sô tesi la lint origjinâl
dal gjornalisim “di prossimitât”
«Dut al è nassût di une riflession personâl in cont de situazion de Europe di cumò, che e je segnade de crisi economiche e sociâl, de cressite dai nazionalisims estremiscj e di une malfidence une vore difondude tai confronts dal procès di integrazion europeane e des istituzions che in chel istès a son il prodot e il motôr di chel percors. In particolâr, o ai notât che cheste clime negative si nudrìs ancje des inesatecis difondudis dai media cuant che a fevelin di Europe». Melissa Colussi e je une fantate di Martignà, e cun chestis peraulis e sclarìs parcè che e à decidût, inte suaze dal Master Euroculture – un percors bienâl post lauree metût adun dal Ateneu furlan cun altris undis universitâts de Europe, de Asie e des Americhis – di scrivi une tesi dedicade al rapuart tra informazion, identitât e citadinance europeane. Plui in detai, la ricercje, che il so titul al è The role of European proximity journalism in the building process of the European identity, e fronte il teme de costruzion de identitât e de citadinance europeane doprant la lint origjinâl dal gjornalisim locâl, “di prossimitât”, chel che al conte il teritori e che al met in relazion la realtât locâl cul mont.
Il lavôr, che al è stât fat vie pal an academic 2017/2018 tra Alsazie, Bretagne e Friûl, e al è stât discutût te Universitât di Strasburc, al met a confront dôs esperiencis une vore particolârs: chê di Euradionantes, emitente nassude intal 2007 a Naoned/Nantes, capitâl di chê porzion di Bretagne che in tiermins aministratîfs e fâs part de regjon Loire Atlantic, e chê di Radio Onde Furlane che za in passât, in plui ocasions, e je stade ogjet di ricercjis di caratar storic, linguistic e sociopolitic.
«O ai sielzût di confrontâ Euradionantes e Radio Onde Furlane – e zonte Colussi – tacant de mê esperience personâl. Di Setembar dal 2017 a Fevrâr dal 2018 o ai fat un tirocini propit inte redazion de emitente di Nantes, là che o ai vivût in prime persone il sens di chel che juste in chel contest al è stât definît “gjornalisim european di prossimitât”: une maniere di fâ informazion une vore dongje de int e dal teritori, contant ce che al sucêt ator pe Europe e pal mont cun atenzion, cun aprofondiment e cun chê di vualmâ lis conessions tra chei fats e ce che al nas a nivel locâl. Tant che scoltadore, mi soi inacuarte che Onde Furlane e fâs compagn: di cetante Europe che e je inte sô programazion e di cemût che il leam profont cul Friûl al è intal stes timp une clâf di leture e di confront cun ce che al sucêt a nivel continentâl e intal rest dal planet».
La tesi e je pardabon interessante. Inte sô prime part e fâs indenant la definizion de suaze teoriche di riferiment, tra nazionalisims, identitât, gjornalisim e integrazion continentâl, e e presente lis dôs realtâts de Bretagne e dal Friûl, tra rivendicazions in cont dal autoguvier e dal ricognossiment des specifichis identitâts linguistichis e culturâls. Inte seconde, si concentre su lis dôs esperiencis radiofonichis, e marche lis singulis particolaritâts e i elements comuns e lu fâs ancje midiant des testemoneancis diretis des personis coinvoltis intai doi progjets, che a contin la storie specifiche des dôs emitentis, a presentin la lôr ativitât, il contest e la impostazion e lis motivazions dal lôr lavôr.
Une conferme dal fat che – cemût che al scriveve Altiero Spinelli – «la Europe no cole dal cîl». ❚