La cjantante Megan Stefanutti, di Colorêt di Montalban, e je la vincidore dal Festival de cjançon furlane. Il toc «I vues di Diu», scrit di Aldo Giavitto, al à convint la jurie e il public dal teatron di Udin. Cualchi politic, però, al à inriçât il nâs.
«No je une cjançon politiche!». Lu rimarche ben Aldo Giavitto, autôr di «I vues di Diu», la opare che e à vinçût il «Festival de cjançon furlane 2010». A devin vêlu domandât in tancj, gjornaliscj ma ancje cognossints, stant che lis peraulis a contin un fat di cronache sucedût a Udin. Si riferissin aes polemichis vignudis fûr daspò che une frutine musulmane e je stade sapulide tal cimitieri di Padier te zone destinade di pueste ai muarts di chê religjon. «Anìn cun me la disdivore/là che a gjoldin i vues di Diu/là che no si conte smare/e la fuee de tiere/e pare i siums dai dîs… ». In struc, par dîlu cence poesie, une volte finît di vivi o sin ducj compagns. Pinsîr che nol à mancjât di tirâ sù polvar di ca e di là. «Canzonettista, novello guru della solidarietà e dell’amore universale che evoca il Padreterno…», al à dit cualchidun. Anzit, e à scrit, intune letare intitulade «Fatti travisati», te pagjine de pueste dal Messaggero Veneto (di domenie ai 10 di Otubar), la segretarie de Lega Nord di Udin, Giovanna Comino. «Ma la musiche no je ni di drete ni di çampe, e covente dome a contâ une emozion, che e pues rivâ a cui che le scolte ma ancje cussì no», al siere Giavitto che nol à plui voie di sintî altri. E la sere de finâl dal Festival (ai 2 di Otubar) il so pinsîr al è rivât a dut il teatri Giovanni da Udine che, pe ocasion, nol veve nancje une cjadree vueide. Un batimans coletîf al à saludât Megan Stefanutti cuant che e à finît di cjantâ. Sì, parcè che e je jê la interprete de cjançon plui «impegnade» dal concors.
Concors che al è tornât dopo 24 agns di cidinôr e dopo 50 agns de prime edizion. Al jere nassût a Pradaman tal 1959, inmaneât de Scuele Libare furlane insieme a esperts de lenghe e des tradizions dal Friûl, tant che don Domenico Zanier, Tarcisio Todero e Mario Argante. Tai agns ’70, il Festival al è deventât la rassegne musicâl plui impuartante dal Friûl-Vignesie Julie, tant che a partecipavin ancje artiscj afermâts come Enrico Montesano, Gino Bramieri, Ric e Gian, Wilma De Angelis, Cochi e Renato, Memo Remigi. Dopo lis edizions dal 1980 e dal 1986, tignudis a Udin, dut si è distudât.
Doi agns indaûr, però, alc al à tornât a movisi. L’Aster cultura-Noi cultura, formât di siet comuns (Buri, Cuar di Rosacis, Pavie di Udin, Pradaman, Premariâs, Sant Zuan al Nadison e Manzan, prin comun dal progjet) al à pensat di tornâ a dâ lûs ae cjançon in marilenghe. Al à scuedût ae Regjon e ae Provincie, al à colaborât cu la Arlef (la Agjenzie regjonâl pe lenghe furlane), al à vût il supuart di sponsors tant che la Fondazion Crup e la Bancje di Credit cooperatîf di Manzan, cence nomenâ i privâts. Insome, al à tirât sù un biel grumut, che di chei dîs achì no je robe scontade, e al à dât in man la responsabilitât artistiche al mestri Valter Sivilotti. Cun lui, a àn colaborât ancje Dario e Ennio Zampa e Renato Pontoni. «Tant lavôr ma une biele sodisfazion», al è stât il coment dal diretôr artistic Sivilotti. La serade, di fat, e à regjistrat il ‘dut esaurît’ a teatri. E lis 18 cjançons in gare a son stadis aplaudidis con entusiasim. Alc di miorâ? «Mi plasarès che a partecipassin ancje i grups rap e hip hop furlans. A ‘nt vin di brâfs ma cuant che ju ai contatâts mi àn rispuindût che ‘il festival no ju rapresente’. Invezit al sarès biel podê viodi e sintî di dut sul palc». Dopo la edizion 2010, rivie la 2011? «Cuissà, bisugne viodi se o rivìn a tornâ a meti in vore une serade cussì. Magari tal 2012…», Sivilotti al lasse une sperance.
Intant, chest festival nus à lassat tantis musis gnovis e zovinis. Cuasi dutis che a cjantin in marilenghe ma che a fevelin, te vite di ogni dì, par talian. E ancje li, sul palc, prin di savê la decision de jurie, denant dal microfon dai presentadôrs che ur domandavin une impression, une batude… ‘Sono emozionata’, ‘Cantare con l’orchestra è un’occasione davvero unica’, ‘È una bellissima serata, vinca il migliore’.
Ancje tu, Megan, tu âs rispuindût par talian.
Sì, ma jo lu sai il furlan eh! Al è che lu tabai dome cun ciertis personis, cun gno pari, cui miei parincj. Se sul palc al vignive un di lôr a fâmi la stesse domande, o varès rispuindût in marilenghe.
Cuant che tu âs cjantât, di fat, tu jeris perfete.
Be, a dî il vêr o ai vude un pocje di dificoltât cul furlan di Aldo (Giavitto) che al è une vore precîs e che al dopre peraulis che jo no ai nancje mai sintût. Jo o soi un tic ‘miscliçote’, parcè che o soi di Dalès, daspò mi soi trasferide a Udin e cumò o vîf a Colorêt di Montalban.
Mancul mâl che no tu âs scrit nuie, alore, se no tu varessis fat rabiâ Aldo parcè che secont lui i autôrs dai tescj no si son impegnâts plui di tant par rispietâ la lenghe scrite, dimostrant une cierte mancjance sot chest aspiet. «A jerin plens di strambolots e cualchidun al someave fat di int che no à mai butât jù dôs riis in marilenghe. – al à dit – Sperìn che la prossime volte la direzion e fasedi un cors di furlan par ducj».
E cemût mai chest non, ‘Megan’?
Parcè che no ti ai ancjemò dite che o soi mieze furlane e mieze neozelandese. Mê mari e je di là. O ai vivût ancje in Gnove Zelande par un an, cuant che o jeri in cuinte elementâr. O soi di marilenghe inglese, in plui che taliane e furlane.
Continus alc di te…
Alore, o ai 33 agns, di siet o vîf a Colorêt e o soi mari di un biel frutin di trê agns, Tobia. O lavori a timp parziâl intune dite che e fâs software gjestionâi, o soi la responsabile dai progjets di ricercje e di disvilup de Beantech, simpri a Colorêt. E cjantâ e je la mê passion.
Cuant âstu scomençât?
O cjanti di simpri, di cuant che o jeri picinine. Però al è di siet agns che o cjapi lezions privadis di cjant. Prime lu fasevi ‘par passion e vonde’. Cumò o stoi imparant dutis lis tecnichis cuntune bravissime insegnante che e je Franca Drioli, un sopran.
Ma la tô cariere, cemût ise tacade?
Di zovine, o ai fat part di un grup par sîs agns, come che al sucêt a tancj, si clamave Ali&words. Daspò o soi lade cul Erasmus in Svezie e là o ai tacât a cjantâ intun coro ‘gospel’, o vevi 23 agns. E ancje une volte tornade a cjase, o ai continuât su par chê strade, te corâl gospel di Glemone, la Kelidon, che par grêc al vûl dî ‘cisile’. Al è in chel moment che o ai decidût di cjapâ lezions privadis, par rivâ adore a doprâ ben la vôs. Cussì, o ai cognossude Franca e cun jê o ai vude une schirie di ocasions.
Par esempli?
Be, jê e lavore par une associazion che e organize «Capriva castelli e canzoni» e alore o ai vude la ocasion par esibîmi e ancje par fâ cualchi cors cun insegnants tant che Tosca e Grazia Di Michele. Tal 2007, o ai cjantât intun musical: «Chi è di scena?» si clamave. Ducj i arlêfs dal cors di cjant o vin fat un stage di trê zornadis cuntun preparadôr cjantant di Milan e ae fin o vin metût in pîts une storie.
Te visistu?
Sigûr! E jere la storie di une desene di zovins che si preparavin par un provin e in sene al lave il «daûr lis cuintis» e duncje lis lor storiis, lis delusions, lis spietis. A jerin simpri ducj sul palc e ognidun al faseve un toc cjapât di altris musicals famôs. Jo o ai cjantât tocs di «A chorus line», «Aquarius» di «Hair» e alc di «Tutti insieme appassionatamente». O vin vût un biel sucès ma purtrop dut al è finît li.
Aldo Giavitto al à dit che ti veve sintude a «Percoto canta»…
Eh, sì. O ai partecipât par trê edizions, tal 2003, 2004 e 2007. Il prin an, o soi rivade tierce cjantant «Maledetta primavera». E tal 2008, o soi rivade tierce al Festival del Gallo di Maian puartant «Let the river run» di Carly Simon e l’an passât, simpri a Maian, o ai vint il premi de critiche interpretant «Time after time» di Cyndi Lauper, insieme a Annalisa Conte. Annalisa, che e je stade une mê aversarie al Festival de cjançon furlane. Anzit, e jere la mê preferide: o pensavi che e vincès jê!
No stâ a dînus che no tu ti spietavis la vitorie?
E je vere! E jere la prime volte che o cjantavi par furlan e, dut câs, no pensavi che un test cussì fuart al podès interessâ la int. A mi mi plaseve tant la cjançon di Elsa Martin, «Cjalde sere», chê di Renzo Stefanutti, «Rosas di cret», e chê di Annalisa, «La noche triste».
Ancje Giavitto al crodeve in «La noche triste», il toc di Montello e Tatalo cjantât di Annalisa Conte. «Une interpretazion straordenarie e un toc pardabon inovatîf», lu à definît Aldo. Ma a la int no i è plasût masse, e cussì secont al è rivât Flaviano Miani che al à cjantât al pianoforte «Al vignarà seren», scrit insieme di Enzo Driussi, e tierce Debora Cutugno cun «Denant di te» (test di Stefano Montello e Cristina Mauro).
Tu e Aldo mi pâr che o ledis dacuardi…
Sì, par fortune si sin plasûts a vicende. E cuissà che il nestri ‘matrimoni artistic’ nol ledi indenant…
Âstu intenzion di tornâ a cjantâ al Festival? Scrivarâstu tu alc la prossime volte?
No, jo no scrîf, o interpreti. Ognidun al à la sô part. Eh sì, mi plasarès tornâ a cjantâ in furlan. Chest festival al è stât pardabon biel, une serade rafinade e cun grande musiche. O vin cjantât ducj dal vîf, compagnâts di dôs orchestris, la Mitteleuropeane cuntune cincuantine di elements e la East Cargo Band. Un grant merit al va al diretôr artistic, Valter Sivilotti, che mi à ancje volude tra i partecipants.
Lu cognossevistu za?
Lui al è l’om de mê mestre di cjant. Mi veve za sintude e preseade.
«Un spetacul biel e fuart, sperìn che si cjatedin i bêçs par podê mandâlu indenant», e je la riflession di Aldo Giavitto che, lu ricuardìn, al à firmât il test de opare che e à vint il Festival de cjançon furlane 2010, «I vues di Diu». «Dome i presentadôrs no mi son plasûts, chê sere a teatri. Mi someave di jessi in sagre…», al à concludût riferintsi ai doi condutôrs, Dario Zampa e Marina Presello.
Megan, une curiositât: al vincidôr i tocjave un premi di 3mil euros. E cumò?
Il premi o vin di dividilu in doi, cincuante a mi e cincuante a Aldo. Par cumò no vin viodût ancjemò un centesim, ma a son bêçs che jo o doprarai par lâ indenant a studiâ cjant.
Tu âs di ringraciâ lis dôs juriis, chê dal popul che e à votât suntune schede la sô cjançon preferide, e chê tecniche (formade di Nicola Cossar, Andrea Del Favero, Massimo Duca, Andrea Flego e Nevio Zaninotto): tu sês plasude a dutis dôs!
Lu ai savût dome cualchi dì dopo e o ai di dî che e je stade forsit la sodisfazion plui grande. Se no, al sarès stât come vinci a mieç.
Po ben, cumò che tu ti sês fate cognossi par ben, cuâi sono i prossims obietîfs?
Lâ indenant a cjantâ e a fâ la mame.
Valentina Pagani
