A somein lontans i Inviers dal 1929 e dal 1985, cun frêt record e nêf fûr dal ordenari
Ancje se la planure furlane no je mai stade nevosone a pet di altris planuris ae stesse latitudin, une volte al neveave in Friûl, e no dome in mont.
◆ Forsit ancjemò cualchi vieli si impense des contis dal 1929, cuant che ai 12 di Fevrâr a Udin la stazion dal Malignani e regjistrà une minime di -13,9°C e une massime di -9,5°C e in trê dîs a vignirin jù 52,5 cm di nêf. Tra la fin di Zenâr e i 20 di Fevrâr dal 1929, une alte pression ferme su la Scandinavie e le indenant a indreçâ aiars frêts de Siberie su la Europe e sul Friûl (l’aiar al sofle in sens orari ator di une alte pression intal nestri emisferi); po, une basse pression italiche, jenfri i 11 e i 14 di Fevrâr, e sburtà aiar umit di Siroc intor des nestris monts. La cumbinazion di fredon di Miezegnot e umit di Misdì e puartà ae neveade fûr dal ordenari.
◆ La ultime grande neveade, sigûr plui frescje inte memorie di tancj di lôr, e fo chê dal 1985. Ai 8 di Zenâr dal 1985, la stazion dal Malignani e misurà une minime di -10,6°C e une massime di -3,6°C. Dai 13 ai 16 dal stes mês a vignirin jù 50 cm di nêf. Ai prins di Zenâr dal 1985 une anomalie cjalde inte stratosfere (chel strât de atmosfere che al va di cirche 10 a cirche 50 km di altece) e partì dal Ocean Atlantic e e migrà fin al pôl; ancjetant e fasè, in mût simetric, une anomalie cjalde partide de Siberie. Chescj aiars cjalts a romperin il gorc polâr (polar vortex), ven a stâi chei aiarons che a soflin tor ator dal pôl inte stratosfere e che isolin l’aiar polâr dal rest dal planet, e dôs massis di aiar polâr frêt a vignirin jù dal pôl, une su la Americhe, chê altre su la Europe. Di rivoc, une alte pression si fermà sul Nord Atlantic e e cjapà a menà jù aiar frêt, dutun cuntune basse pression, fintremai te basse Italie. La basse pression e puartà nêf su la Italie centrâl e meridionâl, ma ancje sui Balcans e su lis Alps. Po dopo, dai 6 di Zenâr indenant, e rivà su lis Planuris padane, venite e furlane. Clâr che i frêts e lis neveadis dal 1929 e dal 1985 a forin straordenaris e ancje vie pal secul XX a jerin agns cence nêf in planure. Dut câs, la nêf su lis monts e colave cuasi ogni an e avonde in bas, se si calcole che si vierzerin e doprarin pistis di schi a Siele Cjalçutan (954m sul nivel dal mâr) e a Tanamee (870m sul nivel dal mâr), puescj che aromai da râr a viodin cualchi floc. Fintremai a Tresesin, tai agns ’30 e ’40, e vignive metude sù une gare par schiadôrs, che a rivavin ancje di Triest (la ultime nêf di podê schiâ, a Tresesin, e vignì dal 2009).
◆ Tant e tant, lis neveadis straordenaris dal 1929 e dal 1985 nus mostrin cemût che si pues vê la nêf in Friûl. Cun di fat, il Friûl al è sierât a Miezegnot des Alps e viert a Misdì sul Mâr Adriatic: sì che duncje, la interazion jenfri aiars umits dal mâr e la bariere des monts e mene tante ploie chenti; però l’aiar dal mâr al è ancje cjalt, in plui che umit. L’aiar frêt, rivant dal continent, al tint invezit a jessi sec. Par che e sedi nêf, duncje, al à di rivâ vint cjalt e umit di Misdì e cjatâ un teren e une basse atmosfere za disfredâts.
◆ In sumis, il fat che la nêf e fos une presince avonde frecuente te nestre tiere e mostre ancjemò un colp che il Friûl al è un pont di incuintri, che la magjie de lenghe e la magjie de nêf si somein chenti: li che lis monts si sbassin e il mâr al slungje il dêt dentri de Europe, i aiars frêts e secs de Siberie, che a traviersin lis tieris slavis e gjermanichis, a tocjin i aiars cjalts e umits dal Mediterani, che si son fats sui mârs dai grêcs e dai latins.
◆ Si capìs, però, che denant dal riscjaldament globâl in vore, un ecuilibri dal gjenar si romp come nuie. Cun di fat, la nêf inte nestre Planure no esist cuasi plui e ancje in mont, aromai, al tocje rimpinâsi adalt par cjatâle. ❚