✽✽ Devant dai fenomens, dai events che aromai si palesin simpri cun dimensions e carateristichis diviersis di chês che o jerin usâts o che, dut câs, o vin gjestît intai decenis passâts, dut un colp si cjatìn devant di decisions gnovis, di sieltis irevocabilis.
✽✽ Sigûr, par cualchidun, e dispès tra i tancj che si intanin intes salis dal podê, al è plui facil fâ il gnogno par no paiâ il dazi, dineâ fintremai la esistence stesse di ciertis tematichis, fin a acusâ cui che al va indenant a evidenziâlis di jessi catastrofist, antisisteme e – parcè no – “comunist”. Vecjo vizi mai dismetût de diestre cuant che e reste cence argoments, ma metodi aromai adotât ancje a çampe cuant che cul tiermin “reazionari” – se al va ben, e se no si rive a “fassist” – si tint a emargjinâ posizions no in linie o discomudis.
✽✽ Se nô furlans o vessin di colâ in cheste vuate, o varessin fat un altri pas bande la disgregazion dal stes concet di identitât e de fuarce che cheste peraule e esprim. O sclarìs miôr: se o lessin daûr des ideologjiis tant che strument di analisi e di judizi, o finiressin cul vê di inschiriâsi su supuescj teorics, cul acetâ lis liniis politichis derivadis di chei, e infin ancje il gjenar di soluzions proponudis. O disìn daurman che di soluzions, dal moment che a nassin di cheste impostazion, si ’nt viodin pocjis.
✽✽ Cjapìn il teme de imigrazion che nus tocje di dongje, viodût che l’itinerari balcanic al à tant che pont di rivade propit la nestre regjon. La ipotesi butade li di un hotspot a Jalmic e à discjadenât no dome la proteste ferbinte dai siei abitants, ma e à viodût il confront di doi modei, par cont gno ducj i doi ideologjics. Di une bande cui che al stime che chescj lûcs, a metât tra presons e cjamps rifugjâts, a sedin la uniche soluzion par blocâ i flus clandestins; di chê altre al è cui che al pense che dome l’acet slargjât al sedi la rispueste al fenomen. Se o pensais ben, dutis dôs lis formazions a calcolin che chescj esodis di masse a puedin jessi gjestîts cence une strategjie juste di acet. I prins a pensin che il probleme si decidi scuindint lis personis, i seconts che al basti dividilis tra i comuns par no jessi “barbars”. Se dopo a zirin dut il dì cence fâ nuie, tacâts tal telefonut…
✽✽ A nissun no i passe pal cjaf di dâ un sens finît a ce che al è daûr a sucedi, cirint une soluzion che e rivi a interagjî tra il fenomen migratori e lis dificoltâts simpri plui grandis intal nestri Friûl par vie de denatalitât.
✽✽ Insume, tra cui che al crôt ancjemò che la Italie e vedi vût un rûl di civilizazion in Afriche parcè che e à fat lis stradis e no parcè che e bombardave lis “bielis abissinis” cui gas, e tra cui che al pense che invezit o sin pronts e soredut in stât di acetâ ducj, al varès di jessi cui che al alce la manute e che al dîs: “O vin studiât un plan seri e sientific par dâ un lavôr dignitôs, une cjase e assistence a chei che a vuelin fermâsi. Provìn a “fâ la nestre part” in non di cuant che o jerin nô a emigrâ, cuant che il guvier talian nus mandave a murî a Marcinelle in cambi dal cjarbon o intes barachis di bande in Svuizare.
✽✽ Chê e je la “manute alçade” di un autonomist, che al pense ae sô tiere, ai disgraciâts dal mont e no ai zûcs di une politiche cence ideis, ma soredut imorâl. ❚