Interviste a Gunnar Cautero, che cun la sô Osteria della Stazione al à vinçût il premi Eataly 2019 e duncje al è prin de classifiche “ristorants Pop” inte vuide gastronomiche I Cento di Milano 2020
«No lu ai mai viodût cussì content, di cuant che i àn dât il premi al cjamine a dîs centimetris dal paviment e al à simpri la muse di ridi» mi dîs Ylenia, che e fâs la camarele tal locâl dal pari Gunnar Cautero, titolâr de L’Osteria della Stazione – l’Originale di Milan.
L’ambient al à vinçût il premi Eataly tant che «Miôr tratorie di Milan» e duncje dentri de vuide pal 2020 I Cento di Milano. La vuide e je nassude tal 2008 de idee di trê critics torinês – Stefano Cavallino, Alessandro Lamacchia e Luca Iaccarino -. E fâs la recension di 50 ambients “par grandis ocasions” (“Top”, sore dai 35 euro par persone) e 50 par une serade plui informâl (“Pop”, sot dai 35 euro): dentri di chescj, e je rivade prime L’Osteria della Stazione.
Dal locâl di Gunnar o vevin scrit in Mai dal an passât, cuant che al veve ancje procurât un spazi par ospitâ Alpins furlans pe Adunade Nazionâl 2019, ma o sin tornâts a cjatâlu par fâi cualchi domande in plui.
__
Gunnar, contimi de serade dal premi, tal spietavistu?
La storie e je tacade un mês prime de premiazion: a fin de cene, une siore si fâs dongje e mi domande se mi podeve fevelâ un moment. E cussì mi à dit che nol jere la prime volte che int de zurie a vignive chi a mangjâ e mi à anunziât che mi davin il premi.
__
Un ricognossiment che al è no dome pal to locâl, ma par dut il Friûl…
Vere! O ai scuviert che il Friûl e je une regjon che i volin ben ducj. Dopo de premiazion al Westin Palace Hotel in tancj a son vignûts dongje par dîmi “O ai un nono furlan, me mari e je furlane, o ai parincj furlans…” cun braùre. Al è rivât ancje Chan Liu, chef dal ristorant cinês Serica di viâl Bligny, dentri te classifiche “Top”, par dîmi “jo o ai lavorât 7 agns a Udin!”.
__
O ai l’impression il to lavôr nol sedi dome fâ scuvierzi il Friûl ai milanês, ma ancje un tornâ a percorilu par te…
Jo o soi nassût a Milan, ancje se di famee furlane. O soi duncje ancje tant braurôs di jessi milanês, ma la mê grande passion e je il Friûl. Par me al è il gno Tibet, il puest li che o voi par jessi libar. In particolâr mi visi une volte in moto, che o soi jessût de autostrade a Vignesie e m’al soi fat dut. Ce spetacul! Planure, flums lâts, cuei, montagnis… Fevelant dai prodots, cumò e je tante int che e lavore ben su la cualitât. Fra l’altri o ai scuviert che tancj di lôr a jerin a stâ a Milan par un periodi di vite. Des jerbis de Valcjanâl in graciis de amicizie cul pionîr dal biologjic Gigi Verdura, al pes di Maran, ai vins che a àn dome eticutis furlanis. Timp indaûr o vevin butât li la provocazion dal locâl “deprosechizât”.
__
Ce clients vegnino te tô tratorie?
Int di ogni bande d’Italie. Par tancj al vâl simpri il classic «O ai fat il militâr in Friûl e o soi stât tant ben», e jo i dîs simpri di tornâ a lâ.
__
E i furlans che a passin cui sono?
Cualchi volte a son la clientele plui esigjente parcè che a fasin il confront cu la cusine di cjase. Un di lôr mi à fat “Mi à puartât un gno amì roman e o jeri difident: un roman che mi puarte a mangjâ furlan? O ai di fâti i compliments”. Soredut mi fâs plasê che a passin tancj furlans zovins, magari a pene rivâts in citât par studiâ, e che a cjatin alc a Milan in cui ricognossisi.
__
Tu sês ancje un pont di riferiment pal Fogolâr di Milan.
Sì, o ospitìn il gustâ anuâl che si fâs a Dicembar e dopo events tant che presentazion di libris e vie indevant. Aromai a son amîs: ju ai invidâts a la premiazion al Westin a son vignûts, cun par prime la segretarie Fulvia, vistîts cul costum furlan. Al è stât un biel colp di voli e o vin mostrât un Friûl unît che i ten ancje a lis tradizions.
__
Ma sâstu che e à reson tô fie? Chest premi ti à cambiât: agns a costruîti un personaç ruspi e invezit cumò tu stâs deventant masse simpatic…
Eh bon, o pensi che la int no stentarà a adatâsi (al rît, ndr)! Un mandi a ducj i letôrs: vignît a cjatânus cuant che o passais a Milan. O scuvierzarês alc dal Friûl che no vevis cerçât a cjase. ❚