La musiche al di là des Frontieris: i multicolôrs dal Folkest 2016

Come ogni an, di cheste stagjon, lis notis e lis tradizions di oltri confin si radunin intun festival che al clame in Friûl i plui grancj artiscj e interpretis di musiche popolâr di dut il mont. Dai 23 di Jugn ai 11 di Lui, te sene di Udin, Spilimberc, Vile Manin, Tumieç, ma ancje te vicine Cjaudistrie, lis vôs a deventaran conciert in chel dal Folkest 2016.
Frontiere al è il titul sielt par il festival, che nus vise di pensâ oltri i confins nazionâi e di cjalâ di là des diferencis culturâi.
Partint de fieste di chenti a Sant Denêl dal 1979, il festival al è rivât ae trentesime otave edizion, cun plui di 70 concierts in program e tancj altris events che lu compagnin. No sarà dome la musiche protagoniste, ma ancje esibizions di danze tradizionâl e manifestazions di espressions artistichis di culture popolâr.
In ducj chescj agns, come che al ricuarde il storic diretôr Andrea Del Favero, «il festival al à di simpri vût l’obietîf di svicinâ lis culturis di confin midiant de musiche».
In chest cjapitul dal festival protagonistis a saran lis musichis di confin che a dan vôs a chês culturis a cjaval tra un confin e chel altri: Maurizio Geri Swingtet al parteciparà a Folkest puartant il so “manouche”, la Orchestre Bailam i suns balcanics e “klezmer”. O scoltarìn ancje il “sound italo zingar” di Roberto Durkovic e i Fantasisti del Metrò, il blues di Les Loups Garous,  Ninfa Giannuzzi e la sô “culture grika” e infin Roberto Tombesi cul so organut venit. Dut chest cence dismenteâ i magnifics furlans Straulino & Fedele e i Carantan.
I gjenars musicâi a son dai plui svariâts: dai suns popolârs a cjançons in inglês e american cun Richard Thomson e Suzanne Vega, ae musiche tradizionâl napoletane cu la Nuova Compagnia di Canto Popolare, Almamegretta e James Senese Napoli Centrale. No pues mancjâ la musiche celtiche cui grups Teach Shleibhe (Mountain House, Irlande), Iona Fyfe Band (Scozie), i Rolling Around e Andrea Capezzuoli e Compagnia (Italie).
Al tacarà i concierts Richard Thompson ai 17 di Jugn al Teatri Gustavo Modena di Palme. Daspò, simpri a Palme, ai 3 di Lui, la Nuova Compagnia di Canto Popolare e presentarà la sô propueste musicâl e il gnûf disc.
A Spilimberc, il festival al rive ai 8 di Lui, cun Saba Anglanacon e lis sôs lidrîs italo somalis. Pal timp dal festival, dut Spilimberc al sarà animât di artiscj che a presentaran danzis e a esponaran prodots di artesanât tipic. Ai 9 di Lui Riccardo Tesi al presentarà il so ultin libri e daspò e sarà la volte dal spetacul di Viulan e del Tama Trio, cun ospits Luigi Lai e Elena Ledda. Il Premi Folkest 2016 ae cariere al larà a Luigi Lai, il plui grant sunadôr di “launeddas”, un strument sart milenari.
Domenie ai 10 di Lui protagoniscj Sandro Joyeux, i finics Tsumi Sound System, Giuliano Gabriele e Rud Bučar. Lunis Ai 11, invezit, Spilimberc al sarà dut par Billy Cobham. Ai 20 di Lui la famose cjantante californiane Suzanne Vega e jemplarà il prât di Vile Manin par presentâ il sô gnûf disc dedicât ae poetesse americane Carson McCullers.
Dopo Vile Manin, il festival al torne come ogni an a cjaudistrie, la citât che plui di dutis e rapresente la misture di culturis di confin. A esibîsi a saran la Nuova Compagnia di Canto Popolare, i Almamegretta, James Senese cul so grup Napoli Centrale e infin i brasilians Roda do Cavaco e Tama Trio.
Folkest 2016 us spiete; par savê di plui sul program: www.folkest.com ❚
✒ Moira Pezzetta
_________________________
Esperiencis artistichis multisensoriâls
Folkest al è ancje un moment par condividi esperiencis artistichis multisensoriâls, par chest une part e je dedicade a Video&Danza@Folkest. Suonare@Folkest al è invezit il concors che al permet a gnûfs musiciscj e cjantautôrs talians di metis in mostre. Ai 4 di Lui, il Cjstiel di Udin al darà acet ae serade finâl par scuvierzi il vincidôr fra ben 148 grups partecipants.
Folkest come ogni àn al va a tocjâ tantis placis dal Friûl. Lûc centrâl, il Cjistiel di Ruvigne, cu La Fieste da Sedon rivade ae decime edizion. No mancjaran Carantan, La Sedon Salvadie, I Bintars, Lino Straulino, Marisa Scuntaro, Angelo Floramo e tancj altris artiscj nostrans.
Si rivarà ancje a Tumieç in ocasion de Fieste dal Borgat e a saran i Almamegretta a vierzi la serade tal Pra Cjistiel.
Al è ancje un moment dedicât al sociâl: La Cooperativa Itaca e proponarà il laboratori Capitano tutte a noi. Un progjet che al à l’obietîf di cjalâ di là des barieris sociâls e culturâls. ❚
✒ Mo.Pez.