Un viaç ae scuvierte dai miôr talents: di Fabiani
a Romitelli, passant par Lipizer e Seghizzi
La Fieste de Patrie dal Friûl chest an e à vût tant che tiere di elezion Gurize, dulà che a son stâts celebrâts i 942 agns de nassite dal Stât Patriarcjâl, cuntun program vivarôs – come par tradizion – che di ciert nol à trascurade la musiche.
Tra lis tantis iniziativis pandudis ator par dut il Friûl, cuntun grant svintulâ di bielis bandieris, chês realizadis inte citât donade di Oton III al Patriarcjât di Aquilee tal 1001, e à viodût e sintût la esecuzion di tantis musichis furlanis. Come dilunc dal corteu di Place Vittoria ae glesie
di S. Roc, cul Grup bandistic “Tita Michelàs” di Flumisel, direzût dal mestri Giorgio Cannistrà. Cussì ancje intant de messe cun leturis, cjants e preieris par furlan, sloven e todesc cu la Corâl parochiâl “Sante Luzie” direzude di Giada Piani. La novitât chest an e je stade dal sigûr la esecuzion – la prime intal contest de Fieste de Patrie – dal imni uficiâl dal Friûl “Incuintri al doman”, scrit di Renato Stroili Gurisatti e Valter Sivilotti e cjantât pe ocasion dal cuintet feminin “ArteVoce Ensemble”. Al è l’imni che al à vinçût il concors di composizion inmaneât tal 2016 dal Istitût Ladin Furlan “Pre Checo Placerean” e proclamât inte fieste dal an passât a Voleson, par un cjant dai furlans plen di sintiments e significâts che si pues scoltâ e scjariâ – ancje lis partiduris, in dodis diviers organics – lant tal sît arlef.it/iniziativis
Cheste fieste cjantarine a Gurize nus invide a fâ une panoramiche dai compositôrs principâi che a son nassûts o che a àn operât in cheste citât, clamade par tant timp “la Nize austriache”. Cence lâ masse lontan tal timp, tal cors dal Sietcent o ricuardìn Gaetano Fabiani, za diretôr de capele musicâl di Tumieç e insegnant di musiche a Glemone e a Udin, nomenât tal 1773 mestri di capele tal Domo di Gurize e mestri di cembal tal teatri de citât, dulà che al è muart tal 1796. Dal stes periodi al jere ancje il violinist Ignazio Saverio Gobbi, gurizan di nassite e arlêf de scuele dal grant Tartini e che di lui si ricuarde la sô musiche strumentâl conservade tal archivi capitolâr di Cividât. Ancje il boem Wranty Venceslav al è di ricuardâ, che a Gurize
al à componût tante musiche sacre, conservade tal archivi storic provinciâl.
Di chei nassûts tal Votcent, o ricuardìn il mestri di orghin Emil Komel, titulâr inte glesie di
S. Ignazi e autôr di otims Preludis. Pier Adolfo Tirindelli, diretôr di une impuartante academie par struments a arc inte scuele civiche di musiche. Corrado Bartolomeo Cartocci, diretôr di bande e di côrs, autôr prolific di musiche ceciliane.
Sigûr plui cognossût dal grant public Rodolfo Lipizer, grant violinist, diretôr dal 1930 al 1961 dal Istitût di musiche di Gurize, e a so non ogni an si fâs il concors violinistic a lui dedicât. Tant cognossût ancje Augusto Cesare Seghizzi, trasferît a Gurize tal 1888 e restât li fin che al è muart, tal 1933. Di lui si contin cirche 285 composizions di varie forme e alte fature, dutune cu la fuarte ativitât di promozion e di divulgazion culturâl. Impuartante ancje sô fie, Cecilia Seghizzi, in plui che compositore ancje pitore e insegnante che nus lasse cirche 130 composizions par côr e musiche di cjamare.
Di chei nassûts tal Nûfcent, a son dal sigûr di ricuardâ il predi musicist Vittorio Toniutti, che i à dât la volte a Cesare Seghizzi tant che organist e diretôr dal côr dal Domo; Lojze Bratuz, ancje lui compositôr e diretôr di côrs, che al à vude une brute muart par vie di une agression di bande dai fassiscj, e Fausto Romitelli, cetant cognossût ancje tal forest, sparît masse adore tal 2004. ❚
Alessio Screm
