Alessandro Marangoni: la Aclif e deventarà istituzion di riferiment pai furlans
“La Assemblee dai sindics furlans e je une realtât necessarie. E cul timp e deventarà ancjemò di plui un pont di riferiment pe identitât de nestre int”. Al è sigûr di chest Alessandro Marangoni, prin citadin di Dartigne, che al crôt tant inte Aclif che al è deventât un dai membris dal diretîf. Une biele sfide parcè che “rapresentâ i nestris citadins e lis nestris comunitâts al è un rûl che o cjati une vore leât aes lidrîs furlanis, chês che nus disin che metisi a servizi di chei altris al è un dovê, e un esempli par ducj chei che a vignaran”.
_
Ce vuelial dî par lui jessi sindic?
Al vûl dî vê la fiducie de tô int, e e je une responsabilitât impuartante. Parcè che se i tiei citadins ti sielzin, a ricognossin che tu sês un di lôr, che tu vivis i problemis di ogni dì e tu sês chel che adun cun lôr al pues frontâju. Cun braùre. Tirantsi sù di maniis e dant di comedon, come che al è tal caratar dai furlans. Che no ur coventin cjacaris, ma soluzions. E prin di dut, amôr pal paîs.
_
Cuâl isal il spirt furlan di Dartigne?
Intun teritori piçul, la nestre comunitât e à une identitât fuarte ma vierte, e cîr di cressi une vore cu lis sôs associazions sioris di iniziativis e di ativitâts, ma e je ancje tant vierte ae colaborazion cun chei altris paîs su progjets comuns. Ancje la nestre aministrazion e à simpri vût chest sproc e nus somee che e sedi la strade plui serie e clare par rivâ a sburtâ il disvilup di un teritori intîr. In chest o crôt che la nestre comunitât e sedi fie dal taramot che al à scjassât e fiscât dal dut il paîs, ma al à creadis lis cundizions pe rinassite e pe gnove fuarce che e je vignude de ricostruzion.
__
La situazion cumò cuale ise?
E je chê di un paîs che al è un anel di colegament jenfri il Medi Friûl e chel de Alte, che al è un pôc in cuintritindince parcè che al sta tornant un tic a cressi par popolazion, ma soredut al viôt cressi la sô zone industriâl e produtive là che a lavorin vuê 500 personis. Intun contest a bas impat ambientâl, dulà che la prioritât di bande di ducj e je chê di no contaminâ lis faldis, ancje parcè che de nestre prese e ven la aghe che e da di bevi a dut il Friûl fin a Lignan.
_
Ce dificoltâts aial vût in chescj agns?
L’an dopo de mê elezion e je sclopade la emergjence Covid, e cumò la vuere e no dome a fasin cressi i coscj di energjie, materiis primis, cun dut ce che chest al puarte a dam dai ents publics e dai citadins. Ma la tragjedie dal taramot, che o vin nomenât prin, nus insegne che la nestre int no à mai molât. E che lamentâsi nol covente. Covente fâ, par saltâ fûr dal pantan.
_
La identitât furlane di Dartigne e je une vore particolâr…
Sigûr: ducj a san che il vêr furlan di Dartigne… al pignote, ven a stâi al fevele cu la “e”, une peculiaritât che sul nestri teritori e je stimade tant che un valôr di custodî e di preservâ. Tant che e je ancje une compagnie che e fâs teatri dome par furlan, I Pignots. Ma ancje altris realtâts a fasin tant par puartâ indevant storie, lenghe e culture dal nestri Friûl.
_ Slargjìn il voli su dut il teritori. Ma sul furlan si fasial avonde? Si pues e si scuen fâ di plui. La Aclif e sburte in cheste direzion e intai ultins agns i sindics si son cjatâts simpri di plui in cunvigne su lis robis che a coventin fatis. Massime tal cjamp de informazion e de comunicazion, là che la Rai e à di fâ cressi spazis e produzion, e inte scuele dulà che si à di domandâ une aplicazion plene de leç di tutele. No si à di vê plui pôre di domandâ cun fuarce chel plurilinguisim che intune Europe des Regjons al sarès un fatôr di competitivitât e di disvilup.
_
Cuâi sono i fatôrs che a condizionin di plui la azion dai Comuns? La colpe ise dute simpri de burocrazie?
No, ma la burocrazie e esist, e par solit no jude. Dut câs, la dificoltât plui dure che o vin e je dal sigûr chê de mancjance di personâl. Par esempli, in chest cantin il confront cui agns dal taramot al è a nestri dam, parcè che vuê a coventaressin plui risorsis ma soredut plui dipendents, par doprâlis al miôr e rispuindi in cheste maniere aes dibisugnis dai citadins.
__
Tal avignî, la Aclif podaressie deventâ la istituzion di riferiment dai furlans?
Lu deventarà. E je nassude cuant che lis Provinciis a son disparidis, e ancje se cumò a vessin di tornâ in vore, al covente un puest par ducj chei che a viodin inte identitât furlane un valôr e inte lenghe une modalitât di espression. E sarà un fogolâr che al clamarà dongje i furlans di chenti par tignî cont di dutis lis peculiaritâts dal lôr jessi. O soi sigûr che l’avignî lu dimostrarà. ❚
::::::::::::::::::::::::::::::::::::::::::::::::::::::::::::::::::::::::::::::
FOCUS. Un teritori vivarôs, ma segnât de storie dal taramot
Passant pe Pontebane no si pues no viodi il cjistiel dai Savorgnans che si rimpine sù pal çuc di Sant Martin, che al à insom une des plui bielis gleseutis dal Friûl, tornade a fâ sù dopo dal taramot dal 1511.
◆ Il toponim Dartigne al à une divignince misteriose e par Desinan al podarès vignî dal celtic artos “fuart come un ors”. La sô impuartance intai timps antîcs e je sigûr cressude inte ete dai Romans, e intal secul VI il centri al devente ancjemò plui impuartant stant che su chel çuc si son insedâts i Langobarts che lu àn rinfuarçât tant che fuartece.
◆ Il cjistiel come che lu cognossìn al rimonte almancul al 1200, ma fintremai al 1384 al restà ai siôrs di Dartigne, po dopo al passà ai Savorgnans. Tal 1387 al fo sdrumât par vie des lotis tra cheste famee e il Patriarcje, ma Luduì di Teck lu fasè tirà sù di gnûf tal 1410. Finide la ete dai Patriarcjis, al coventà par difindisi cuintri dai Turcs.
◆ Chestis vicendis a àn segnât un teritori che al è siôr ancje di altris piçulis zoiis tant che dôs bielis gleseutis votivis che pre Bepo Marchet al veve inseridis inte sô biele racuelte. Si trate di Sant Lenart e soredut di Sant Stiefin in Clame, cun afrescs une vore antîcs che a son stât salvâts e valorizâts. La storie di cheste gleseute e va indaûr fin al 1281, ma salacor e je ancjemò plui vecje parcè che dopo dal taramot a son stâts cjatâts lastrons di piere che i archeolics a àn stimât di ete langobarde o caroline.
◆ La glesie si cjate sot de mont dal Faeit, un sît che dal pont di viste dal paisaç al regale la pussibilitât di fâ cjaminadis une vore bielis tal bosc, gjoldint ancje di viodudis maraveosis su la plane.
◆ Dartigne, dal pont di viste culturâl e à fat cressi un dai plui impuartants poetis furlans di vuê, Umberto Valentinis, autôr di “Salustri”, che tal 1968 al è stât un dai volums fondamentâi che a àn indreçât la liriche in marilenghe dai ultins 50 agns. ❚
………………………………………………………………………
Cui che al è il sindic di Dartigne
Alessandro Marangoni al à 46 agns, al è maridât cun Cinzia e al à doi fîs, un di 8 agns e un di 4. Di mistîr al è impleât. La sô cariere politiche a Dartigne e je scomençade tal 1999 tant che assessôr comunâl al sport e ae protezion civîl fintremai al 2004. Al è in consei dal 2009, e dopo dîs agns di oposizion al è stât elet sindic intal 2019 cul 57% des preferencis.. ❚
