La odissee di un potenziâl turist interessât al Friûl multiculturâl

Desenis di messaçs mail di domandis di informazion mandâts, ma rispuestis pocjis e in gjenar di cualitât modeste

Flop di PromoTurismo e de Associazion regjonâl Pro Loco, ecelencis a Sauris, Lignan e Vals dal Nadison

Al baste pôc plui di un cuart di ore (il timp di vierzi une fente direzion di pueste eletroniche cuntun dai plui grancj providers polacs di internet) e la nestre “lescje” e je pronte. Il reporter de “La Patrie dal Friûl” si scuint cussì daûr dal aspiet dal siôr Pavel Mlinarczyk de citât polache di Poznan, che al à viodût su internet cualchi biele imagjin dal Friûl, de mont al mâr, e al volarès puartâsi in feriis la sô famee (une cubie di adults e doi fîs di 14 e 16 agns) par dute une setemane. Soredut, al à let su Wikipedia alc che al fâs dal Friûl une tiere speciâl e uniche: e je la uniche regjon dulà che lis culturis europeanis principâls si messedin e a convivin di secui.
Ve ca il siôr Pavel, un client une vore desiderabil
Il siôr Pavel al è un turist contemporani tipic. Al odee la intermediazion des agjenziis di viaçs, e al à miôr organizâ di bessôl sul web lis sôs feriis “taylor made”, o ben di sartorie, taiadis su misure, difûr des corints dal turisim di masse. Al è l’esponent tipic di une gnove clientele, simpri plui ample, che e presee un turisim lent, bon di “lei” un teritori sot tancj aspiets, da la art ae gastronomie, ma cul intindiment di scuvierzi la culture gjenuine, il spirt di un lûc. E, stant che nol à problemis economics particolârs, no dome al sielç un timp di permanence plui alt de medie (une setemane), ma al cîr la cualitât, selezionant struturis pal plui a 4 stelis, tra chês plui preseadis dai utents sui sîts mondiâi principâi di prenotazion turistiche.
I sîts di informazion turistiche
Al scomence cul indreçâsi fiduciôs al Ufici turistic uficiâl, o sedi al sît PromoTurismo FVG. Intes “travel ideas” al va daûr dal colegament dedicât al “Slow tourism” e al teme “Art & culture”, ma li si va daûr di un criteri di presentazion di singui monuments e atrazions in ordin sparniçât che no judin il siôr Pavel. Pe veretât, tra i avigniments, a ‘nt sarès cualchidun leât ae culture furlane ma, a diference di chei altris, nol è voltât par inglês. Cussì, il siôr Pavel si indrece ai sîts des associazions di vuidis turistichis segnadis dal sît di PromoTurismo FVG: lôr sì a varan alc di proponi al visitadôr forest! Cun sô grande maravee, i sîts di ben dôs di chestis associazions no àn nancje la version par inglês, e duncje il puar siôr Pavel nol capìs nuie. La associazion “La Via dell’Ambra” di Aquilee no dome e à un sît par inglês, ma ancje in lenghe furlane che il siôr Pavel al pues viodi pe prime volte. Tra i itineraris, il siôr Mlinarczyk nol cjate daurman chel che al cîr, ma a esistin simpri lis mails, al dîs sperançôs tra se e se! Graciis ai siei studis classics, cun di plui, il nestri turist al rive a capî che lis Pro Loco a son organizazions che si interessin de promozion turistiche sul teritori. Al va sperançôs sul sît de Associazion regjonâl che, magari cussì no, al è dome par talian.
I sîts dai albiercs
No apaiât, il nestri potenziâl “ospit di int uniche” al selezione cualchidun tra i miôr albiercs de provincie di Udin, de mont al mâr, cirint sui lôr sîts cualchi propueste bramade pes sôs feriis ae discuvierte des lidrîs culturâls dal Friûl. Bon, nol è compit di un albierc fâ promozion turistiche, ma forsit par atrai clients cualchi iniziative le fasaran! Grande delusion: dai albiercs al top de categorie, dome l’Hotel President di Lignan al ufrìs cualchi propueste interessante di visite a Udin e Spilimberc. Pal rest, il siôr Pavel al cjate confuart dome in dôs localitâts di perifarie: sul sît dal albierc Riglarhaus di Sauris al scuvierç alc di interessant su lis lidrîs gjermanichis de localitât cjargnele, e sul sît dal albierc difondût des Vals dal Nadison al ven a scuvierzi che in chê zone al è fintremai un museu interatîf dedicât ai dialets e ae culture slave di chel teritori. Pecjât che chest museu si presenti sul web dome par talian. Cumò che al cognòs la esistence e il non, cul strument di ricercje al rive ancje a cjatâ une descrizion par inglês sul sît di TurismoFvg. Ma ce fature!
La seconde fase: domande di informazions vie pueste eletroniche
Il nestri siôr Pavel al è tant meticolôs. Nol sielç une mete se nol è sigûr che al cjatarà chel che al cîr. Cussì, insodisfat des notiziis otignudis dal web, al decît di scrivi desenis di messaçs di pueste eletroniche par domandâ informazions. In sintesi estreme, al dîs di cjatâ biei i paisaçs dal Friûl, ma al domande notiziis su itineraris e esperiencis di scuvierte de culture locâl e su la sô ricjece etniche e linguistiche. Al è sigûr che al varà tantis informazions: cui si lassaressial scjampâ dute une famee che e vûl passâ une setemane intune struture ricetive di nivel alt, e spindint ancje par fâ escursions e esperiencis suplementârs?
PromoTurismo FVG: superficiâl e masse di presse
Naturalmentri, la spiete plui alte e je pal ufici turistic uficiâl de regjon. Inte sô mail, Pavel Mlinarczyk al segnale di vê esaminât za cun cure i itineraris proponûts sul sît, ma di no vê cjatât il so filon di interès. La rispueste e rive dal moment, la dì dopo, dal ufici turistic dal Aeropuart di Roncjis di Monfalcon. Pecjât che e sedi cetant deludente. La operadore intal messaç, ae domande di informazions suntun teme specific, e rispuint in maniere telegrafiche anunziant la spedizion in zonte di depliants gjenerics (destinazions, itineraris e esperiencis). Zontâts al messaç, però no son. Pal amôr di Diu, un erôr che al pues capitâ a ducj. In chest câs però al vûl dî la pierdite dal client che, deludût, al mole.
Vuidis turistichis: nissun segnâl
Nissune des trê associazions di vuidis turistichis segnaladis dal sît di PromoTurismo FVG e rispuint al nestri disgraciât siôr Pavel. Si trate di Itineraria FvG di Udin, “La Via dell’Ambra” di Aquilee e Friulguide di Martignà. Al è vêr che no sin ancjemò in alte stagjon… però…
Sul teritori, Pro loco e albiercs difondûts in ombrelûs
La rispueste plui spietade dal siôr Pavel, chê de Associazion tra lis Pro Loco dal Friûl-V.J., no je mai rivade. Biadelore che il teritori al à rispuindût miôr. La rispueste miôr e je chê rivade de Pro Loco Nediške Doline – Vals dal Nadison, che intal zîr di 24 oris e à ufiert une vuide che e fevele par inglês par scuvierzi i segns de culture slovene sul teritori e la visite vuidade dal museu SMO. Pronte e zovevule ancje la rispueste dal Albierc difondût des Vals dal Nadison, che il so grup si met a disposizion des esigjencis dal siôr Pavel. Invezit, par restâ inte Sclavanie furlane, e fâs sensazion la mancjade rispueste de Pro Loco di Resie, viodût che al è un teritori tant impuartant dal pont di viste linguistic e culturâl, e che e à ancje museus che a presentin la culture locâl. Il siôr Pavel al à “testade” ancje la eficience des Pro Loco di San Denêl e di Palme, e dal ufici turistic comunâl di Cividât. In ducj i trê i câs, si percepìs la mancjance di un prodot turistic pe domande dal siôr Mlinarczyk, ma Cividât se puarte fûr tant miôr. La operadore di Informacittà, no dome e ufrìs cualchi informazion storiche e culturâl su la zone intun bon inglês, ma e propon al turist potenziâl di imerzisi inte vite cuotidiane de zone di Cividât e si declare disponibile a orientâlu plui in concret cuant che si cjatarà sul lûc. La segretarie de Pro San Daniele si distrighe invezit cuntune rispueste standard e la spedizion di materiâi no atinents in maniere direte ae domande dal client, e soredut no ufrìs la pussibilitât di nissune altre assistence. La Pro Palma, invezit, e cjape timp domandant plui detais sui interès dal client potenziâl. Rispueste interlocutorie ma dut câs buine.
Infin, nissune rispueste dal albierc difondût di Sudri, robe sorprendente viodude la vivarosetât di cheste struture ricetive.
Il Cjaurêt dai albiercs, cun pocjis ecezions preseabilis
Il nestri simpri ferbint siôr Pavel Mlinarczyk al scrîf a ben 17 albiercs: 10 a Lignan e un – in maniere rispetive – a Palme, Cividât, Tarvis, Sauris, e intune altre localitât cjargnele, plui i doi albiercs difondûts za citâts. Al varà dome 5 rispuestis, e di chês dome dôs sodisfasintis. Di notâ che la sielte e je colade dome su lis ecelencis dai hotels furlans, in grande part albiercs a 4 stelis e in pôcs câs trê stelis, ma ducj cun votazions ecelentis dai clients sui principâi sîts internazionâi di prenotazion alberghiere.
Lis ecelencis a Lignan e a Sauris
Il top al è cul Albierc Riglarhaus di Sauris. No dome la reception e rispuint dopo pocjis oris, dimostrant interès pes domandis dal client e sigurant il so impegn par prontâ un itinerari ad hoc, ma pôc dopo al siôr Pavel i rive un messaç di pueste eletroniche dal circul culturâl di Sauris, che al comuniche in maniere eficace la pussibilitât di vivi sul puest une esperience cjalde de culture locâl. Segn palês che al è un sisteme turistic locâl zovevul che si è metût in moviment.
Otime ancje la rispueste dal Hotel President di Lignan, che al sigure al client potenziâl che al podarà vê dutis lis indicazions su lis miôr escursions di sielzi par sodisfâ la voie di cognossince de culture locâl.
La rispueste plui curiose
Un albierc otim (cun tas cetant alt di gradiment de bande dai clients) di une des metis turistichis cjargnelis plui prestigjosis al rispuint, cuasi dant impression di sminuîle, che li e je dome la culture furlane e no ancje chê todescje e slave (che, dut câs, no son a distancis abissâls di no podê pensâ di lâ a cognossilis cuntune escursion ad hoc), dant cuasi la impression di volê mandâ il client potenziâl inaltrò. Forsit, une dimostrazion no volude di chê particolâr carateristiche dai furlans di jessi pôc bogns di calcolâ la proprie culture tant che un valôr potenziâl par chei altris.
La rispueste piês
Inte zone di Cividât, une struture ricetive di nivel otim e rispuint al client polac potenziâl di no jessi un ufici turistic e di indreçâsi inaltrò. Malincreançâts e odeôs.
di Roberto Pensa