Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.
◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission speciâl intun puest speciâl: il Salon internazionâl dal libri di Turin.
◆ In gracie de disponibilitât de Regjon Friûl-Vignesie Julie, che e je ospit di onôr de edizion di chest an, ancje “La Patrie dal Friûl” e sarà jenfri des “atrazions” di cheste manifestazion di gale. La nestre clape culturâl e je editore no dome di chest gjornâl, ma ancje di plusôrs volums che lôr cualitât e pe peculiaritât de lenghe no mancjaran par sigûr di stiçâ l’interès e la atenzion dal public dal Salon. Un public che nol à masse familiaritât cu la editorie in lenghe minoritarie, che no jere mai stade considerade cuissà ce impuartante tal program. Invezit chest an no dome la “Patrie” e sarà presinte cuntun so spazi dedicât par ducj i 5 dîs de Fiere, ma joibe ai 19 aes 7 di sere intal calendari di dutis lis iniziativis al sarà un apuntament dedicât ae presentazion dal libri di Diego Navarria “Patriarcjis fûr dal ordenari”, che al met dongje i articui intrigôs e stuzighins che i letôrs de “Patrie” ben a cognossin, ma che in cheste ocasion a podaran jessi presentâts a ducj i gjornaliscj e i operadôrs dal mont de culture e de editorie che a volaran seguînus.
◆ Al è dibant sotliniâ cetant impartuante che e je pe nestre testade e par dute la lenghe furlane la partecipazion a cheste rassegne che e à numars di inzirli: inte ultime edizion difat e à vudis 150 mîl presincis ma tal 2014 (l’an dai record) e à rivât a tocjâ la cifre di 339 mîl visitatôrs. Cundiplui, e je une utence interessade e curiose, che no si sforee devant des novitâts. E alore, in cheste edizion 2022 che e je dedicade ai “Cûrs salvadis”, int come noaltris, che no si plee ae omologazion e ae derive di une globalizazion che e scancele lis identitâts tal non dal vuadagn, podevie forsit stâ a cjase e no profitâ a dimplen di cheste ocasion? “Bisugne cjapâ i uciei cuant che a passin, e lâ a mulin cuant che e je la aghe”, a disevin i nestris vons. In chest câs sperìn che il mulin nus fasi buine flôr. ❚