La propueste turistiche regjonâl? «Risultâts no adeguâts ai invistiments»

DIBATIT VIERT DOPO DE INCHIESTE DA LA PATRIE DAL FRIÛL
Di Suald: «Si à di tornâ a pensâ il prodot Friûl partint di ce che lu identifiche in maniere esclusive»

No si da di maravee Sandri Di Suald dai risultâts de inchieste su la propueste turistiche in Friûl-Vignesie Julie, publicade sul numar stât da La Patrie dal Friûl. Une ufierte che no fâs jeve su lis carateristichis propriis e esclusivis dal nestri teritori, ma standard di ogni regjon. «Bisugne diferenziâ un prodot, se si vûl esisti e costruî economie, se no si è ostaç dal marcjât», al dîs Di Suald, operadôr culturâl e professionist tal cjamp de comunicazion e dal marketing. Cu la nestre inchieste o vevin evidenziadis lis falis di un sisteme promozionâl che nol rive a costruî propuestis che a diferenziin pardabon, che al è ce che al domande il trend di marcjât, e che a rispuindin ae assistence ai utents, simpri plui incentrade ae comprension e ae partecipazion. «Si à di meti in pîts une organizazion teritoriâl che si vierzi a dut il teritori, cun propuestis no indiferenziadis tant che mâr e mont, impuartantis, ma che no sin nome nô a vendi», al marche Di Suald. E ancjemò: «Indiferenziazion che si le cjate ancje in manifestazions di riclam che, però, no àn suazis di esclusivitât, ma a somein pluitost caricaturis di ce che si fâs inaltrò, o a son espressions di nicjis dulà che no si privilegjin tant lis espressions dal teritori, determinant la assence di une clare identitât promozionâl dal Friûl. Robe che ni la Slovenie, ni la Carinzie, ma nancje il Venit si insumiaressin di fâ. A son iniziativis (dispès impuartadis di altris bandis) cuntun ecès di ufiertis, fatis intun timp masse curt par che l’utent lis puedi “digjerî”, che no àn cuissà ce ricjadudis e che a àn une utence soredut locâl».
__
Di Suald, a son regjons talianis (tant che il Sud Tirôl) e europeanis (tant che la Bretagne) che a fasin de olme culturâl e linguistiche l’element caraterizant de lôr propueste turistiche. Il Friûl-Vignesie Julie, invezit, lu calcole ben pôc.
«Il turisim che al fâs jeve su la unicitât linguistiche al è di nicje. La lenghe e je un element zontât a une ufierte par definî miôr e in maniere subit plui esclusive il prodot, tal nestri câs il Friûl. Al torne comut par identificâ un teritori, lis sôs ufiertis, i siei prodots… ma al covente che al sedi zontât a elements di esclusivitât no dome culturâi, e ben definîts. La Irlande, par esempli, tai agns Otante e Novante e je deventade une mete desiderabile parcè che e faseve vivi ai siei visitadôrs une esperience culturâl mitiche mediade de musiche, de sô celticitât… La unicitât culturâl e devente identificative di une propueste, che ti dîs che tu sês intun puest diferent. Po si riflet sui abitants che a deventin no dome apuestui, parcè che a àn ce contâ, ma protagoniscj direts. O pensi ai Clannad, ai Chieftains, ai U2… simpri fevelant de Irlande».
__
La lenghe judie a passâ la idee de unicitât?
«Sigûr. La lenghe e pues judâ tal identificâ un teritori e i siei prodots, ma no baste se no visualize une propueste clare di un teritori».
__
Le vino in Friûl?
«Le varessin, ma la mê impression e je che, par indolence e ignorance, e ledi miôr la standardizazion pa la cuâl si vent mâr, mont e alc di citâts di art cence emozions che a diferenziin. O il sport, come che si sta fasint ultimementri cun risultâts cetant modescj, parcè che al è par pôcs di lôr: o pensi al Çoncolan par esempli».
__
Duncje, il turisim regjonâl nol à une identitât?
«Il probleme dal Friûl-Vignesie Julie, dal pont di viste turistic, al è che al à ai confins competidôrs plui fuarts e specializâts: Vignesie e Venit pe art, Carinzie, Slovenie e Cravuazie pe nature. La conseguence? L’80% dal turisim regjonâl al è peât al mâr, di dulà che no si môf. Ancje la uniche soluzion sportive che e funzione, la ciclovie Alpe Adria, e va drete al mâr! Un pôcs di turiscj a van in mont (ma i dâts no son entusiasmants) e tal rest dal teritori, se si scrîf “hic sunt leones” come te Afriche scognossude, no si sbalie! O sin tra lis regjons che a spindin di plui pro capite par turist, e jenfri chês che a àn mancul risultâts. Tai ultins agns, in plui, si è pontât massime su Triest, ma cun scjars risultâts e dome locâi, che no justifichin i invistiments. Insome, lis robis no funzionin parcè che achì no si vent un prodot diferent, bon di emozionâ. Chestis a son lis dôs cualitâts impuartantis che no si pues fâ di mancul di vê. E se o ai di emozionâ, mi emozionie di plui Udin o Vignesie?».
__
Ma il turist che al rive in Friûl, ce podaressial cjatâ di diviers?
«Chest al è un altri probleme, mai frontât: lis short list, lis spietis che un al à tal cjâf cuant che al va intun puest. Il sucès turistic resint de Gnove Zelande al è peât al fat che li a àn zirât i cines dal Signore degli anelli, chel di ciertis localitâts de Sicilie ae serie televisive su Montalbano. Par no fevelâ de Italie: art, ligrie, mandulins… Cuale ise la short list dal Friûl? Che si mangje e si bêf ben, che o sin chei dal taramot e de vuere grande. La cuistion, duncje, e je di cambiâ la percezion dal prodot Friûl, par rapresentâlu te sôs storiis e carateristichis – che no si sin dismenteâts – e che lu puarte a diferenziâsi rispiet al rest. No si è di vendi il jessi dongje Vignesie, fasint publicitât ae concorence, ma che si è ancje dongje di Vignesie, che al vûl dî che si àn altris oportunitâts atrativis che a cjapin dentri ancje il jessi dongje di Vignesie. Nô, invezit e cun di plui, o vin dome davoi. Pensìn dome al alimentâr, aes tantis DOC dispès dispeadis dal teritori (Ramandul isal “Venezia Giulia”?). Un gno amì, PR pal Champagne, mi à dit che nô o sin tant che tex-mex, un casot. Za o sin piçui: se cun di plui si dividìn fasint confusion, o o pontìn dome su Triest, no podìn sperâ in risultâts».
__
Cemût varessie di jessi la short list regjonâl?
«E à di ribaltâ ce che si pense dal Friûl – une tiere serie, inmusonide e peade a disgraciis – e fevelâ dal vêr Friûl, chel legri, birbant, amant dal bal e de biele vite che o vin cul amôr di Juliete e Romeu furlans; la vicende dal cjargnel Jacopo Linussio, che al à inventade la industrie e i jeans modernis; la furlana, balade in ambit mediterani tant che “bal orgjastic” e ricjapade di Bach, Mozart e Rameau (e che cualchidun le met ae fonde de tarante); i cjastelîrs cu la lôr spiritualitât; chê altre Aquilee e vie indevant, in plui che la cualitât dal teritori e il bon mangjâ e bevi. A son dome pôcs sprocs, ma che a individuin bielzà une regjon pardabon “speciâl”: che ti da acet cun ligrie, amôr, bon vivi… Dongje di chest, e covente ancje une riorganizazion de ufierte, ma chestis storiis intant a menin a un gnûf storytelling di prodot, cuntune narazion che e je une propueste no banâl e plui desiderabile e che e rispuint in maniere perfete aes tindincis di marcjât. Tra mâr e mont, si varessin cussì sul teritori tantis pussibilitâts di scuvierte e cun grandis potenzialitâts di marcjât».
__
Cui varessial di coordenâ chestis ativitâts?
«Un super assessorât cuntun ufici dal turisim che al colabore cun chei di agriculture e culture. Che al vedi une strategjie, une organizazion e professionalitâts claris, che a puartin a superâ ancje i tancj cjampanilisims».
__
E PromoTurismo FVG, ce varessial di fâ?
«Vendi il teritori in forme gnove, esaltant i siei elements di origjinalitât, invezit di simiotâ chel che a fasin a Rimini e inaltrò. Se tu vendis dome une tiere verde là che si mangje e si bêf ben e un pôc di mâr, no tu fasis nuie di gnûf e tu pierdis in partence».
__
Il gnûf President de Regjon al à anunziât une sinergjie turistiche fuarte cul Venit. Ce pensial?
«Si à di fevelâ cun ducj chei che nus stan intor. Ma prime si à di vê clâr cui che si è tant che propueste comerciâl par no vignî mangjâts di realtâts plui specializadis. Ancje in Venit il marum al è grant pe fuarce atrative di Vignesie… Nô o sin inmò plui periferics».
__
Diferenziâsi e specializâsi par emozionâ e atrai. Une volte si fevelave di “ospits di int uniche”…
«Une frase no dîs nuie se no si jemple di contignûts. Parcè un turist aial di vignî in regjon? Parcè che al cjate propuestis di vivi, esclusivis dal teritori, che lu cualifichin e lu identifichin. O vin di fâ bon il sens dal sproc doprât di Altan agnorums indaûr suntune maiute (te foto a man çampe, ndr): “Co si è piçui bisugne berlâ a fuart”». ❚
Erika Adami