In spiete dai prins proviodiments, “La Patrie dal Friûl” e stimole il GNÛF governadôr
ROBERTO MURADORE
Te smire dal sindicalist Cisl il rûl des societâts partecipadis
“Compit de Regjon al è creâ un contest favorevul ae economie. Lis impresis piçulis e mediis, che a costituissin in grande part il tiessût produtîf furlan, no àn la pussibilitât di ativâ in maniere autonome chês funzions imateriâls che vuê a coventin plui di simpri, tant che il marketing, la internazionalizazion, la digjitalizazion”. Roberto Muradore, 63 agns, sindicalist de Cisl de zone di Udin e de Basse Furlane (che di chê al è stât par un pieç segretari gjenerâl), al indiche une agjende impegnative pe gnove zonte regjonâl. “Lis nestris impresis a van judadis no parcè che no capissin chestis prioritâts, ma parcè che lis lôr dimensions a impedissin di meti in organic personis specializadis in chescj setôrs. La propueste e je cheste: lis societâts partecipadis regjonâls a van riformadis e focalizadis su lis azions di supuart aes impresis piçulis e mediis, inietantjur lis competencis specialistichis che a coventin intal mont di vuê. Vonde fâ dome prestits aes impresis! Pluitost, che si furnissin esperts che a van ator pal mont a ativâ iniziativis di internazionalizazion pes impresis furlanis”.
Lant ancjemò plui intal concret, e va miorade la viabilitât interne regjonâl: “Nol è pussibil vê di stâ une ore e mieze par lâ di Udin a Pordenon, e la metât dal timp par lâ a Trevîs. Dopo, al è clâr che il Friûl Ocidentâl al cjale bande il Venit. No dîs che si vedi di fâ stradis dibant, ma almancul intervignî dulà che in efiets al covente ai citadins e aes impresis”.
Altri pont impuartant, al è “no distruzi ce che di bon al è stât fat in chescj ultins 5 agns. Rilancimpresa al à sistematizât la architeture des zonis industriâls. Nol va butât vie ma al va rindût operatîf intal sens di plui servizis aes impresis insediadis o che a podaressin insediâsi. Al va ancje confermât il lavôr fat sul turisim par creâ gnûfs filons di atrat che a vadin di là dal model tradizionâl des feriis al mâr o in mont”.
Dut al à di pontâ al miorament de ocupazion: “Il lavoradôr che al piert la ocupazion al va responsabilizât sul so impegn necessari a ricualificâsi par tornâ a jentrâ intal mont dal lavôr. Di là tal mont dai ents di formazion – al siere Muradore -, a varessin di jessi ufiertis plui oportunitâts di cressite professionâl, midiant di robuscj periodis di pratiche, di bande des impresis che a cirin professionalitâts specialistichis e inovativis, e de Cjamare di cumierç, par cui che al vûl inviâsi bande il mont de imprenditorie e de libare profession”.
di Roberto Pensa