✽✽ De relazion emozionante dal professôr Pellizzari al incuintri di Aquilee, organizât in ocasion dai 50 agns di Glesie Furlane, a nassin mil domandis e ancjetantis provocazions positivis. Partint de storie judaicocristiane de glesie di Aquilee e des sôs figuris plui impuartantis, il studiôs nus ufrìs, o disarès cuasi nus regale, la pussibilitât di doprâ chê stesse storie tant che rimpin par analizâ il timp presint. No dome, nus consegne ancje il compit grivi di interpretâle par cambiâ il futûr. Un consei a ducj: cirît e leiêt la relazion, meditaitle, sparniçaitle.
✽✽ Il so test al è une lum piade che o vin di parâ dai aiars de globalizazion, dal autoritarisim, ma tal stes timp di chel “pinsîr debil” che al caraterize l’individualisim che si cjate dapardut in dì di vuê, che al ferme ogni forme di agregazion ator di un pinsîr fuart. Sigûr, al è un invît incomut, politichementri scoret, se o pensìn ai efiets e al mâl che a àn produsût lis ideologjiis dominantis intal secul passât. Dut câs, cui aial mai sotscrit un pat che nus consegni cun mans e pîts peâts a un destin di faliment?
✽✽ Tant che popul, duncje in maniere coletive, o vin une vision dal mont buine di oponisi al “jo” che al parone dapardut, al degrât sociâl progressîf, a prospetivis in cont di vueris che a tornin protagonistis intun mont che al slargje simpri plui la fuarpie tra siôrs e puars e che, lu dîs pape Francesc, al tibie i “scarts”?
✽✽ Vino, di furlans, il cûr di sintîsi erêts dal spirt di Aquilee?
✽✽ Al è dificil rispuindi, stant che si varès di vê – o no vê – la cussience di cui che o sin, di trop di chê presince cristiane al sedi restât intal nestri DNA. E al è un discors che nol tocje dome che i crodints, viodût che i valôrs di chê comunitât a àn vût valence universâl, al servizi di ogni femine e om di chestis tieris.
✽✽ O vin però une sigurece che nus confuarte intal nestri agjî: o savìn trope impuartance che e à la memorie intal frontâ chescj interogatîfs tant grancj e ancje dramatics.
✽✽ Cence il ricuart, cence la trasmission dal passât, no esist sperance di futûr, o saressin vagabonts che a cirin un ripâr, naufracs pierdûts intal labirint dal presint. Invezit, cemût che al à marcât Pellizzari, o scugnìn “jessi imerzûts inte realtât, ma no somerzûts”.
✽✽ La “memorie” no tant che memoreazion semplice, ma tant che azion di resistence e motôr di cambiament. ❚