“Fuori dal Coro”, la trasmission di Mediaset di Del Debbio e Giordano, e à fat une pontade sul ospedâl di Tisane. Stant che no son miedis, une cooperative locâl paiade de Sanitât publiche e somearès che e vedi assumût miedis argjentins par metiju a vore tes corsiis de cliniche. Cun lôr a àn fat un contrat regolâr che ju paie mancul che ce che al previôt il contrat de sanitât, fasint la creste (e ce creste!), sui bêçs erogâts de sanitât publiche pes stessis prestazions. Bêçs publics che van tes sachetis di privâts!
◆ Chel che nus lasse di clap al è che la cuistion, ancje se palese, no stice nancje un dibatit. Sui gjornâi, cuotidians e setemanâi locâi, pôcs riferiments. Sono robis che no interessin i citadins? O isal miôr no impaçâsi?
◆ Discors interessant ancje chel de Aziende pai servizis ae persone (ASP) Moro di Codroip, comissariade de Regjon par un bûs tal belanç no ancjemò definît dal dut ma pesant, che al à costret il comissari a domandâ un prestit al assessôr regjonâl ae sanitât – codroipin – di passe cuatri milions di euros. Cence chei bêçs, lis ativitâts obligatoriis dal Ambit Socioassistenziâl dal Friûl di Mieç, une vore preseadis, no podevin jessi fatis. Ma dulà sono sparîts i bêçs de Regjon e dai comuns che il Plan economic e finanziari dal Ambit al veve dât ae ASP par chês ativitâts sociâls? Dopo doi agns di comissariament, no si sa ancjemò un dret. E soredut no si capìs se la ASP e je in stât, dal pont di viste economic e finanziari, di gjestî ancjemò chei servizis par cont dai Comuns o ben no. Cumò si cambie comissari e, par vignî fûr dal gredei, al somearès che si vueli fâ deventâ la ASP Moro un pont di riferiment pe gjestion dai servizis sociâi, di assistence e des cjasis di polse no dome dal Friûl di Mieç, ma ancje di Tisane e fintremai dai Comuns di là da la Aghe. Par taponâ il bûs si slargjino lis competencis?
◆ E ancje chi, a son pocjis informazions. Par solit la sanitât e je une facende che e tocje in mût diret la int. Cun dut achel, di chestis cuistions si sint pôc o nuie… Parcè nancje in Consei Regjonâl no ‘nt si fevele piç? Dal sigûr ae maiorance di centridrete no i conven tirâ fûr pucis. Ma lis minorancis, lis oposizions, parcè no disino nuie? ❚
La sanitât malade no i interesse a nissun
Mastiefumate![](https://www.lapatriedalfriul.org/wp-content/uploads/2024/07/Schermata-2024-07-16-alle-09.25.27.png)