Istât. A finissin i campionâts di balon e lis copis europeanis, e duncje si contindin lis partidis des variis “nazionâls”. Ancje se si varès di clamâlis “selezions”, cemût che al sucêt in Stâts tant che la Spagne (Selección di fútbol di España) o Portugal (Seleção Portuguesa di Futebol).
◆ In Europe, di fat, nol esist cuasi nissun stât nazion. Ancje la Italie, che cundut che e sedi tornade di mode la peraule, no je “nazion” parcè che e à plui nazionalitâts dentri dai confins statâi, e fra chês chê furlane.
◆ Ma cuale saressie la formazion di une selezion furlane di professioniscj dal balon? Cuâi i clamâts?
◆ In confront di cualchi desene di agns indaûr, cuant che a jerin tancj i zuiadôrs furlans in serie A, la ricercje e je tant plui dificile, e par dâ dongje un grup bon si à lâ a pescjâ fin te serie C.
◆ Altre soluzion, vuê cuasi “di mode”, e je chê dai oriunts, ma a diference dai Jorginho e Ederson de Italie, i cognons dai nestris a son inecuivocabii: Copetti, Driussi… mighe bagjigjis!
◆ Tant che alenadôr o vin sielzût Capello: cumò che al fâs l’opinionist, un pôc di timp par alenâ la selezion furlane al podarès vêlu.
◆ Selezion furlane, 25 convocâts; 4 portîrs: Meret (Napoli), Vicario (Empoli), Provedel (Lazio), Scuffet (Cluj); 5 difensôrs: Berra (Sudtirol), Calderoni (Cesena), Castelletto (Nantes), Cauz (Reggiana), Toloi (Atalanta); 5 centrocampiscj: Cristante (Roma), Crisetig (Reggina), Petriccione (Crotone), Pontisso (Catanzaro), Magnino (Modena); 11 atacants: Alario (Eintracht Francoforte), Diaw (Modena), Zilli (Cosenza), Strizzolo (Modena), Pafundi (Udinese), Fabbro (Virtus Verona), Cudrig (Juventus Next Gen), Compagnon (Juventus Next Gen), Driussi (Austin FC), Rigoni (Austin FC), Copetti (Charlotte FC).
◆ La nestre formazion (4-3-1-2): Meret; Toloi, Cristante, Castelletto, Berra (Calderoni); Petriccione, Pontisso, Crisetig; Driussi (Pafundi); Diaw, Copetti. Alenadôr: Fabio Capello. ❚
La Selezion Furlane di balon
Dree Venier