“O ai simpri vût la passion des cjavris. Sul imprin int vevi uns pocjis par passetimp e dopo, cjol une, cjol dôs, a nassin altris. O soi rivât a un ciert pont a vênt 30 e o lavi ancje a lavorâ in fabriche”, al conte Giovanni, di 28 agns. “Tal 2018 il passetimp al è deventât il gno lavôr. O ai comprât une stale a Lauc e o ai comedât une part subit dopo de tampieste Vaia. Il rest dai lavôrs ju ai fats in chescj ultins agns: o ai slargjât la stale sei par devant che par daûr, fasint ancje une lobiute par meti i mus. Devant o ai fate la latarie cul pont di vendite che o soi propit daûr finî in chescj dîs. O ai 110 cjavris e 35 mus, e cun chescj di solit o fâs cjar. Di Istât lis cjavris a van in mont e jo o ten nete une mont par cont gno, indulà che o puarti sù i mus. I ten un grum a chest, parcè che o pues tirâ i contribûts dal sfalç. No rivi a vivi dome vendint i miei prodots, ancje se je fâs simpri a vendiju ducj! O fâs formadi fresc di plui stagjonaduris, “cacio-scuete” che e je une idee che o ai cjapât dai meridionâi che a fasin scuete e formadi insiemi, scuete, jogurt, formadi e scuete frante. La produzion dai prodots e varie daûr dal lat: cumò lis cjavris a son cuasi sutis, lis molç dome a buinore. Di cuant che lis fedis a fasin lat, fin di Zenâr, indenant fin viers Novembar. Tai mês “muarts” o prepari il formadi che dopo 40 dîs al sarà pront par vendilu. Cumò ducj a son alergjics a dut e i miei prodots a van ben ancje par chel. Lis mês produzions si puedin cjatâ in cualchi ristorant dulà che a vegnin lavorâts in cierts plats, e in cualchi buteghe di Udin, Triest e Sudri, ta latarie di Enemonç e te ostarie “Al Cral” di Lauc. Dopo o voi ancje tai marcjâts a fâmi cognossi insiemi a mê sûr Maria”, che chest an si è classificade tierce aes finâls di Miss Italie in regjon e che, cuant che e rive, fra i siei impegns scolastics, e cure ancje la pagjine Instagram di so fradi Giovanni.
◆ “Par fortune o ai gno pari – al va indevant Giovanni – che lavorant a turnis mi da une man. Di Fevrâr a cuant che lis cjavris a van in mont, o ai un zovin di Priûs che mi jude. Al è sucedût che cuant che o soi di bessôl no rivi nancje a lâ a tirâ i bêçs! Ancje se tal timp o ai fat progrès: o ai comprât imprescj che mi àn judât tal lavôr, rivant a sparagnâ une vore di timp. Une volte o ai fat cont che, se o ves di lavorâ par cualchidun a 10 euros par ore, o puartarès cjase 6.000,00 euros al mês. Ma achì nol è pussibil, e cun di plui se une dì no stoi ben, no pues permetimi di stâ tal jet ma o scuen jevâ e partî. O stoi a Vile e mi va un cuart di ore par rivâ te stale a Lauc.”
◆ Cuant che si fevele dai problemis de mont, Giovanni al è un flum in plene e cun scletece nus conte i siei pinsîrs che, a scriviju ducj, no bastarès cheste pagjine! “Il probleme de mont, par ducj, – al conte – al è ce che al sta sucedint cun ors e lôfs e nissun nol dîs nuie. I studiâts di Udin ti disin di fâ sierais e stangjadis, chel e chel altri… però centâ a vôs o al computer al è une robe, e centâ sul teren e je une altre, soredut adalt, tes monts indulà che e je int maleducade che e zire e che no si cjape il timp di tornâ a sierâ une puarte se e je vierte. Dopo a son ancje altris bestiis salvadis che si involuce e si cjape dentri tes rêts. A disin di tignî i cjans antilôf, ma in mont al è dificil parcè che ce che se no je cjavre, il paron al devente il lôf. Se al rive sù un frut che al tocje lis cjavris invezit, il cjan lu muart. Chest probleme ur al ai esponût vie par une riunion ai “dotôrs” a Udin, e mi àn dit di fâ une buine assicurazion. Ur ai dit che ae mari di un frut che al à a pene pierdude une man no tu pues dîi ‘trancuile, o ai une buine assicurazion Jal disês voaltris, parcè che chê mari, a mi, mi gjave i voi cuntun piron e e à dome che reson. Mi àn rispuindût che se si metin i cartei visant che a son cjans, o varès di jessi a puest… ma la realtât e je dute diferente! Ai 16 e 17 di Otubar i lôfs mi àn mangjât doi mus tal mieç des cjasis in plen paîs, no cuissà dulà! Chê altre dì a un frut i àn mangjât cualchi piore fûr di cjase. Ma i à di capitâ alc a cui che al protêç i animâi, parcè che fin che mi fasin alc a mi o a ti, nus disin che o jerin tal puest falât. Tante int no capìs che al è un probleme di ducj, ancje di cui che al lavore in bancje e che nol à nancje un canarin, o ancje de siore che e va ator cul so cjan. No si pense avonde aes consecuencis di un atac dai lôfs, soredut se al sucêt in mont. Lis cjavris che a restin, par pôre, no fasin lat par une vore di dîs, e se a son gravidis a puedin abortî, e duncje jo o piert i çocui, ciertis a puedin scjampâ e o scuen pierdi timp a cirîlis. Par no cjacarâ dai coscj e de part burocratiche di frontâ par salvâti une carcasse. I cjavrûi chest an mi àn sassinât il secont tai de jerbe… mi àn mangjât lis menadis plui frescjis insom de jerbe e cussì no je cressude, cun di plui a vevin di jessi almancul une cuarantine di bestiis e mi àn balinât dut.”
◆ Intant che o scrivevi l’articul, mi è rivât un messaç di Giovanni che al scrîf “O a vût un altri atac di lôfs cuintri dai miei mus… mi racomandi, no stâ a dismenteâ di scrivi di chest probleme.”
◆ No covente masse par capî trop dificil che al è rivâ a mantignî in pîts une ativitât in chestis cundizions; la passion e la buine volontât no simpri a son avonde. E je ore che chei che a messedin cjartis e che si passin di burocrazie a ledin sul teritori a viodi di persone la situazion, par fâ sieltis che ur permetin a cheste int di buine volontât di vuadagnâsi la bocjade cun dignitât e sodisfazion. ❚