La Universitât che e fâs scuele in Friûl (ma no je furlane)

Di cuant che e je presinte intai programs dai cors di lauree di architeture, chê de progjetazion urbane e teritoriâl e je une des materiis che si preste di plui ae sperimentazion sul cjamp.
◆ Naturâl, duncje, che i students a vignedin tirâts dentri di bants di gare o di convenzions dal Ateneu: dal rest, par une strategjie vincente, a coventin ideis frescjis, zovinis e inovativis.
◆ Aben che la Universitât dal Friûl e vedi plui voltis marcade la dibisugne di un leam cul teritori (par altri, element di fonde dal statût), e je une altre realtât che e à savût lavorâsi par ben i comuns furlans, inviant colaborazions cetant preseadis in regjon. Une realtât che e ven di difûr, dal Venit, pe precisazion, stant che si fevele de Universitât IUAV di Vignesie, impegnade in diviers progjets, de mont ae marine. Tai ultins agns, di fat, ancje in gracie di professôrs di divignince furlane o triestine, l’Ateneu al à rivât a strenzi acuardis cu la Direzion regjonâl pai bens culturâls e paisagjistics (consistence dai bens archeologjics in F-VJ), cu la Provincie e la Universitât di Triest (ricualificazion e valorizazion di Aurisine), cu la Agjenzie dal Demani (progjet “Palmanova forma spazio e architettura”) e Ministeri dai Bens e des Ativitâts Culturâls e dal Turisim (valorizazion dal patrimoni imobiliâr public de Regjon F-VJ), cul Comun di Malborghet e Valbrune (valorizazion di Fuart Hensel), cul Comun di Zui (restaur rescj archeologjics), cul Comun di Manzan (ricercje preliminâr pe costituzion dal Parc transfrontalîr dal Nadison), cul Comun di Merêt di Tombe (cognossince dal teritori tra aziende Biofarma e cjastelîr di Savalons) e soredut cun dute une schirie di aministrazions de Basse (Bertiûl, Cjasteons di Strade, Cjarlins, Maran, Muçane, Palaçûl, Prissinins, Rivignan Teôr, Roncjis, Talmassons e Vildivar), dentri dal progjet “Stella, boschi e laguna”, inviât in gracie di un finanziament dal PSR 2014-2020.
◆ I arlêfs de IUAV a àn vude maniere di scandaiâ par ben lis risorsis e lis potenzialitâts de zone, presentant i lôr studis in ocasion di une schirie di incuintris dal titul “Il carro di Tespi”, une sorte di “catidre ambulante di agriculture, architeture e paisaç rurâl, marketing teritoriâl” (dal avignî de Volpares di Palaçûl, ae Vile Savorgnan di Flambri e al borc di Sterp, passant pe place dal puart di Prissinins e ae situazion di Maran, par po dopo tocjâ ancje il sît de Cjamane di Cjarlins, cjase Vatican a Muçane, teritori di Vildivar, Vile Savorgnan Ottelio a Ariis). Une biele voglade, in sumis, ancje se rivâ a recuperâ chei materiâl al è pardabon problematic (alc si lu cjate sgarfant inte rêt, ma no esist une archiviazion sistematiche dai lavôrs), stant che nissun dai sîts istituzionâi dai Comuns ju ripuarte (e la pagjine facebook “Stella, boschi, laguna”, ferme al 2019, e somee funzionâ plui tant che coletôr di events, che come pagjine di studi). Altri particolâr che no si pues trascurâ al è chel de divignince dai students, pe plui part estranis ae realtât furlane. Cun di plui, intai programs dai intervents si lei da râr il non di cualchi docent de Universitât dal Friûl, tant par marcâ la distance tra i doi ents di formazion.
◆ La progjetazion, dut câs, e à dât risultâts interessants e i lavôrs a son daûr a lâ dilunc (fin ae fin dal 2022), cu la colaborazion di 54 partners (publics e privâts), par rivâ a un plan di promozion dal turisim rurâl lent, cun valorizazion des risorsis ambientâls e paisagjistichis e des vocazions produtivis.
Dongje di cheste rêt, la Universitât IUAV e à puartât indevant altris studis plui specifics, tant che la convenzion cul Comun di Vildivar pe creazion di un circuit museâl, pontant soredut a valorizâ i aspiets dal paisaç culturâl (ma no stin a dismenteâ che a Cjamin dal Tiliment si veve vût fevelât di un parc leterari sul Nievo za tai agns Novante, cence nissun risultât).
Plui interessante la progjetazion peade a Vile Ottelio a Ariis, indulà che l’impegn de aministrazion al à permetût di recuperâ e meti in sigurece la aree (ancje in gracie dal passaç di proprietât de Regjon al Comun), cu la idee di fâle tornâ a vivi, deventant il cûr di un parc dal Stele. E cuissà che, in gracie dal lavôr de Universitât venite, il complès al torni al so sflandôr origjinari, deventant ancje mete di un turisim romantic su lis olmis dai vêrs Romeu e Juliete (Luîs e Lucine): volêso meti une bussade in sante pâs su lis rivis dal flum, impen di chê terace dute scribiçade e cercenade di mûrs di Verone? ❚