La çampe furlane ise triestinocentriche? Il Pci îr e il Pd vuê àno il cjâf a Triest e i vôts in Friûl? In dì di vuê cuntune presidente furlane come Debora Serracchiani il probleme al semearès no ponisi, ma viodût che intal prossim congrès dal partît za si sint fevelâ di “necessitât di un riequilibri teritoriâl” la domande e ven fûr pardabon spontanee. Intai mês passâts une sacrosante rivendicazion tant che la adesion di Sapade al Friûl e je stade completamenti dismenteade de gnove maiorance regjonâl. Strani, ma la tindince dal Pd e reste che di un partît che cuant che al sint fevelâ di “cuistion furlane” al volte il cjâf di chê altre bande.
––––
Lu àn vût provât chei che dal Pci a son saltâts fûr daspò de sission de Bolognine e di chês altris che a son vignudis daûr. Par esempli int come Renzo Pascolat o Franceschino Barazzutti, che a àn vût carieris peadis in part al Partit Comunist ma po viradis in altris direzions. Pascolat al à lassât il plui grant partît de çampe taliane vincj agns indaûr, tal 1993: “o ai fat doi mês tal Pds ma mi soi stufât daurman” al conte “parcè che si capive che la gnove formazion e jere dome une brute copie di chê scuele di vite e di politiche che al è stât il Pci”. Nostalgjic ma no masse, Pascolat si vise che “ancje in Friûl jessi comuniscj al voleve dî fâ part di une grande organizazion che e funzionave come un orloi svuizar”. Ma la atenzion dal Partît a nivel centrâl, a Rome, e leve dute a Triest.
Parcè? I triestins jerino plui bogns, brâfs o inteligjents? Plui fuarts o plui inmaneâts? “No – al spieghe – e jere la citât di Triest a jessi al centri de atenzion dai papavars di Rome par vie dal so status di tiere liberade. Une condizion che e à vût un pês une vore penç tal orientâ i ecuilibris dal Partît viers Triest. La rivendicazion jugoslave, ma ancje la cuistion dal Teritori Libar di Triest che cumò e sta tornant atuâl, a àn rindût cheste citât essenziâl par fevelâ di une vuere vinçude”, ma no je dome “l’italianità delle terre irredente” il probleme sul tapêt.
––––
Barazzutti, che al à frecuentade la Universitât Statâl di Moscje, laureantsi in Economie intal templi dai studis socialiscj, al conte che “la vere cuistion e je stade la frature jenfri Tito e Stalin che e veve puartât il Pci talian intune situazion une vore particolâr, ma soredut a Triest a jerin dos sezions, une staliniste e une titine”. Di Rome a cjalavin a cheste scission cuntune vore di cautele. Sì, parcè che tra i dirigjents triestin il plui stalinist di ducj “al jere un om che al veve fate la liende dal antifassisim, il muglesan Vittorio Vidali, il “comandante Carlos” che al veve fondat il Cuint Reziment des Brigadis Internazionâls inte Vuere di Spagne. Un internazionalist cunvint che a Stalin i deve dal “tu” parcè che ducj a disevin che nol jer lât in Messic tal 1940 dome par impalmâsi Tina Modotti ma ancje par copâ Lev Trotzkij, al conte Pascolat.
Dut câs lis posizions di Vidali a jerin cussì pardabon antititinis che il Partit Comunist – “zaromai impegnât a cirî une “vie taliane al socialisim” – al à vût di sconfessâlis (tal 1955 chest al sucet in maniere formâl) ma “Triest al jere simpri intal voli dal ciclon. Ogni at, mozion o discussion che a rivuardavin Triest a vignivin lets rie par rie. Invezit par discuti de autonomie dal Friûl come Regjon si à scugnût spietâ agnorums”. I tentatîfs par meti dongje une sorte di unitât almancul aparente a jerin tacâts tal 1959 cuant che un zovin Enrico Berlinguer al jere rivât al prin congres dal Pci di une regjon che ancjemò no jere nassude. “Alì intal ufici di presidence a jerin nons une vore impuartants, dal gurizan Nereo Battello al monfalconês Silvano Bacicchi, e ancje i nestris Mario Lizzero e Giacomo Pellegrini. Ma i voi dai dirigjents talians, di Paietta a Amendola, a jerin ducj par Vidali”. Di lui a vevin pôre.
––––
Al è cussì che intal Pci e ven a struturâsi, in maniere cussiente ma eretiche, une cueste “autonomiste” che e je chê che e lotarà par rivâ ae autonomie regjonâl adun cun Tiziano Tessitori. Il “leader” di cheste curint al jere cence dubi Mario Lizzero, il partigjan “Andrea” che za dal 1954-56 al scomencà a resonâ in clâf di libar pensadôr intun Partît dulà che il centralisim democratic al jere leç. Ma a jerin altris che a rapresentavin chest mût di resonâ alternatîf, che o podaressin clamâ la “vie furlane al socialisim”. Int come Gino Beltrame, farmacist e deputât dal 1948 al 1963, o Giacomo Pellegrini, di Osôf, che al veve ancje lui combatût ancje lui te Vuere di Spagne e al veve lavorât cun Togliatti dopo il 1943: vicepresident dal consei regjonâl dal Fvj e senatôr par dôs legjslaturis, al jere stât pari costituent. A chest grup a vevin aderit ancje Arnaldo Baracetti, Pascolat e Barazzutti: “Cuant che o soi tornat di Moscje – al conte chest ultim – Vidali e la senatore Maria Bernetic a son vignûts su a Cjavaç fin di Triest par domandâmi di zontâmi ae componente staliniste e internazioniste che lôr e rapresentavin. Ma jo ur ai dit che o jeri ricognossint al popul sovietic par vêmi fat studiâ ma che mi sintivi furlan, e in subordin talian. No le àn glotude”. ❚
✒ Walter Tomada
✽✽
Barazzutti al ricuarde Baracetti
“O jerin i zovins de cove di Lizzero: chei che cu la Lambretta prin model, che cence carenadure e dôs sielis, prin dai 25 di Avrîl a levin sù par dutis lis sezions de Cjargne di Cjavaç fin te Val Pesarine a puartâ i sclopons. Simbui dal socialisim ma ancje imprescj par tirâ sù un franc pal Partît”. Chest al è il ricuart che Franceschino Barazzutti al à di Arnaldo Baracetti e di cuant che a jerin zovins militants de Fgci. “Dopo jo o soi lât in Russie a studiâ e lui al à fat cariere politiche. Jo no, parcè che o soi simpri stât masse eretic, ma dut câs o ai fat ce che o podevi pes comunitâts che o ai rapresentât”. In ogni câs, “i disevi simpri a Arnaldo che lui al jere lât a Rome in caroce, intant che jo o jeri rivât a Triest in biciclete”. Invidie? Nancje un fregul. “Baracetti al à simpri vude la coerence di rapresentâ tal Pci une posizion minoritarie: al meteve in discussion l’unitât regjonâl che par altris, ancje de çampe sotane furlane, e jere un tabu che no si podeve tocjâ”.
“Al è stât cussì fedêl aes sôs posizions che ae fin al anteponeve la furlanetât al so jessi di partît, e par chest al è jessût dai Ds” al spieghe Barazzutti, “parcè che lu vevin metût in bande invezit di capî che posizions come la sô a jerin di analizâ e dibati, no di condanâ e meti intun cjanton”. Ma aromai in chest toc dal vecjo Pci “no jere plui capacitât di sintesi. Al mancjave aromai il snait di une formazion politiche serie e concrete, si leve indevant par slogan : i agns dal 1993 incà peçampe a son agns pierdûts, no je plui la voie di cambiâ il mont che e je di simpri la fuarce dai progressiscj, si contentin dome di governâ lis robis cussi come che a son”.
La fuarce des posizions autonomistis de çampe furlane però si è viodude in doi moments: la lote pe Universitât e chê per vê une leç di tutele de lenghe furlane.”La curint plui autonomiste dal Pci furlan e jere chê plui determinade a sustignî ancje in sede parlamentâr chestis rivendicazions – al spieghe Pascolat – e jo lu ai provat di onorevul”. Prin di ducj Lizzero, che par prin al à prontât la prime propueste di leç sul furlan. Ma ancje Baracetti, Silvana Schiavi Fachin, il stes Pascolat a son simpri stâts pronts a batisi (ancje se in minorance) su chescj temis. Fincuant che tal 1999 cul guvier D’Alema e je stade la volte buine pal furlan: e ancje lì la vene autonomiste dal Pci furlan e jere stade determinade, cun Elvio Ruffino in prime linie.
Su la Universitât dal Friûl lis robis a son ladis in maniere diferente. “O varessin podût scombati trop che o volevin ma la concesion dal ateneu no sarès mai rivade se nol fos vignût il taramot”. Parcè? “Lis direzions romanis di Dc e Pci a jerin contraris, no par suditance viers Triest ma parcè che al jere il piês moment di crisi e di recession economiche daspò de vuere”. In chel senari no jerin bêçs di straçâ. Ma Pascolat al siere disint che “nol è di platâsi che intal Pci furlan a jerin in tancj”, soredut i “inteletuâi”, “che a disevin che al jere dut timp pierdût”. Sotans? Cuissà. Di sigûr no avonde furlans, e nancje masse “inteletuâi”.❚
✒ Walter Tomada
