LA VÔS DE CISL. Invistiments forescj e declarazion dai redits

Ognidun che al vedi invistiments tal forest al è subiet di cualchi an in ca a une schiriee di adempiments leâts ae declarazion dai redits e ae tassazion dal invistiment.
Obleadis a chescj adempiments, a son dutis lis personis fisichis residentis intal teritori talian che a detegnin imobils o ativitâts finanziariis tal forest, a titul di proprietât o di altri dirit reâl.
Duncje, par esempli, il citadin talian che al vîf in Italie e che al à une cjase di feriis in Cravuazie o in Austrie, o che al à fat invistiments in titui forescj o che al à viert un cont corint tal forest, al è subiet a cheste normative. Cussì come il lavoradôr talian che al lavori tal forest, ma che il so centri di interès al resti in Italie (par esempli al à la famee che e vîf in Italie): se al vierç un cont corint o al cuiste un imobil intal paîs forest dulà che al lavore, al à di declarânt la esistence inte declarazion dai redits.
Ancje il sogjet comunitari o extracomunitari che al vîf e al lavore in Italie e che in Italie al paie lis tassis, al è obleât a declarâ la eventuâl esistence di une cjase o di sparagns invistîts intal so paîs di origjin.
Intal tiermin “invistiment forest” a jentrin i imobii (fabricâts e terens), i dipuesits come cont corint o libret, lis azions, lis obligazions e lis assicurazions, ma ancje il possès di oparis di art, zoiis, yacht posseûts tal forest. Se chescj invistiments a son gjestîts di talians intermediaris (par esempli lis bancjis o lis assicurazions), alore al decjât l’oblic di declarâju, stant che l’intermediari talian al è obleât za a comunicâ e tassâ chescj invistiments.
I adempiments relatîfs ai invistiments forescj a son doi:
– Patrimoniâl
– Monitorament fiscâl
La patrimoniâl e je une impueste che e va a colpî la consistence dal invistiment tal forest. Duncje no je leade al fat che l’invistiment al produsi redit o mancul.
La patrimoniâl sui imobii e presente analogjiis cu la impueste municipâl proprie (IMU), che si apliche ai imobii logâts in Italie e, in chest contest, cualchidune des disposizions a cheste aplicabilis e je stade slargjade pai fins de tassazion dai imobii logâts tal forest, par resons di coerence e di uniformitât di tratament.
La patrimoniâl su lis ativitâts finanziaris e derive ancje cheste di esigjencis di coerence dal sisteme, metût che pes ativitâts detignudis li di talians intermediaris e je previodude la aplicazion di une impueste di bol.
La patrimoniâl sui imobii, dite IVIE,  si calcole in proporzion ae cuote e ae frazion di an di possès. La alicuote e je dal 0,76% dal valôr dai imobii, cussì come che al è rapresentât dal cost che al risulte dal at di acuist o dai contrats e, in mancjance, dal valôr di marcjât.
La patrimoniâl su lis ativitâts finanziariis, dite IVAFE, si calcole in misure proporzionâl al periodi di detenzion, inte misure dal 0,1% dal valôr pal an 2012, intant che al larà sù al 0,15% a decori dal 2013. Intal câs di dipuesits in cont corint o librets a sparagn, la impueste di paiâ e je fisse, val a dî 34 euros, se la sussistence medie sul cont dilunc dal an e passe il limit di 5.000 euros. Se e je inferiôr, la impueste no si paie. La base imponibile e je costituide dal valôr di marcjât rilevât al tiermin dal an solâr, doprant ancje la documentazion dal intermediari forest, e, in mancjance, dal valôr nominâl o di rimbors.
Di ognidune des impuestis che si à fevelât al sarà pussibil dedusi, fin a concorence, un credit pâr ae eventuâl impueste patrimoniâl paiade intal Stât là che al è logât il ben o la ativitât.
Il secont adempiment al è il monitorament fiscâl. I contribuents residents in maniere fiscâl in Italie a àn di comunicâ la sume dai invistiments tal forest detignûts dilunc di dut l’an prime.
Di pôc, la normative e je stade cambiade in maniere di otignî une armonizazion cu la normative su la patrimoniâl.
Chest adempiment al esist dal 1990, ma nol è mai stât cjapât in considerazion cun serietât fin al moment che e je stade dade la pussibilitât di ripuartâ in Italie i invistiments forescj cul cussì clamât “scudi fiscâl”.
Di chel moment, la sanzion pe mancjade comunicazion dal totâl dal invistiment tal forest e je stade ingriviade in maniere pesante, causant une code di polemichis e di posizions. Cu la semplificazion resinte, il gnûf regjim sanzionatori al è stât tornât a modulâ sensibilmentri, mantignint purpûr un nivel di gravitât plui grande a pet des sanzions par mancjât viersament de patrimoniâl, stant che la base di calcul no je la impueste lassade fûr (intal monitorament no son impuestis di paiâ, ma dome impuarts di comunicâ), ma la sume dal invistiment. Duncje, par esempli, la gnove sanzion minime dal 3% – se aplicade a un valôr di acuist di un fabricât tal forest, par esempli di 100.000 euros – e corispuint a une sanzion di 3.000 euros. Dal sigûr plui basse de alicuote minime di prime dal 10% (duncje intal nestri esempli l’impuart di meti al sarès stât 10.000 euros), ma dut câs impuartante par cualsisedi contribuent.
Confrontant lis sanzions pal mancjât viersament de patrimoniâl, suntun valôr di un imobil tal forest di 100.000 euros, la impueste di paiâ e sarès stade di 760,00 euros; se no paiade, e varès compuartât la spese di une altre sanzion dal 30%, duncje “dome” 228,00 euros.
La buine notizie e je che il nestri contribuent che al à invistiments tal forest al pues lâ indevant a elaborâ il model 730 par declarâ i propris redits e compilâ dentri dal mês di Setembar il model Unico dome pe sezion de patrimoniâl e dal monitorament fiscâl. In chest mût si va indevant a usufruî dal sostitût di impueste pes diferencis fiscâls, che in câs di impuarts a credit al permet di otignî il rimbors in timps svelts. ❚
Mariannina Rocco
Responsabile fiscâl dal CAF CISL di Udin