La vuere in Ucraine, la debilece de Europe e lis mobilitazions pe pâs in Corsiche e in Sardegne

La vuere in Ucraine e je une gnove dimostrazion di cetant che a son fuartis la mancjance e duncje la dibisugne di une Union Europeane (UE) che e sedi plui “Union” e plui “Europeane”. Magari cussì no, denant de situazion di crisi di chescj ultins mês, la UE e siei Stâts membris, almancul fin cumò, a àn mostrât di no jessi bogns di cjapâ sù nissune vere iniziative di pâs e di stabilitât ni inte direzion di une tratative par rivâ a fermâ il conflit e nancje in chê di un plui limitât e imediât fermait il fûc. Ducj i citadins de UE e plui in gjenerâl dai Stâts europeans, tacant di chei de Ucraine, si cjatin cussì a paiâ lis consecuencis di cheste “mancjance di Europe”, che e tocje diviers setôrs: des relazions internazionâls ae sigurece comune, de energjie e ae fiscalitât.
◆ Cheste debilece si palese in particolâr intai cjamps che a son di competence di chel che inte Comission europeane al à la incarghe di alt rapresentant pai afârs forescj e pe politiche di sigurece, il socialist catalan (e iperspagnolist…) Josep Borrell. Nol dipent tant de sô persone, cundut che in plui ocasions al è stât protagonist, cu lis sôs declarazions, di falopis e sbrissons, ma di chel che si pues calcolâlu un probleme struturâl de UE: la mancjance di une politiche comune e unitarie in chescj setôrs che a son strategjics, massime in chest moment storic.
◆ Vie pai ultins mês, dopo de invasion de Ucraine de bande de Russie, si à vude une convergjence tra i Stâts europeans che si son dâts adun par fâi cuintri a chê che i rus le clamin “operazion militâr speciâl”, midiant di un sisteme condividût di sanzions economichis e cu la sielte – che e je une vore discutibile, in relazion aes prospetivis di pâs – di dâi armis al guvier ucrain. Cundut achel, ancje se a pro di chestis decisions a àn cjapât posizion, mostrant la lôr “muse” istituzionâl, ducj i vertiçs de UE, tacant de presidente de Comission, Ursula von der Leyen, e dal stes Borrell, al è dificil calcolâlis pardabon tant che iniziativis “de Europe” o “de UE”.
◆ A son dome che iniziativis dai Stâts europeans che a fasin part de Nato, stant che la UE e à palesât ancjemò une volte i siei limits struturâi, tacant de dipendence dai guviers dai Stâts, che no i permetin di vê une sô politiche dai afârs forescj e de sigurece.
◆ Salacor la situazion e je ancjemò piês, massime se si le cjale cui voi di chês comunitâts teritoriâls, tacant dal Friûl e de Sardegne, che za vie pe seconde metât dal secul stât si son cjatadis a jessi plateformis logjistichis militârs dai Stâts minorizadôrs e colonizadôrs e de aleance a vuide statunitense che di chê a son membris. Vie pai ultins mês a son stadis cjapadis sù diviersis iniziativis che a tocjin chestis cuistions e in particolâr chê des servitûts militârs. Intal contest politic e istituzionâl si pues ricuardâ l’intervent di Mertxe Aizpurua, puartevôs di EH Bildu, la coalizion de çampe indipendentiste basche, tal Congrès dai deputâts dal Ream di Spagne, là che ai 14 di Otubar stâts e à marcât cemût che la UE e sedi «deventade il braç operatîf de Nato» e che e vedi pierdût dute la sô autonomie politiche, a dam no dome des pussibilitâts di rivâ a une soluzion diplomatiche dal conflit ma ancje de stesse UE e duncje de Europe e di ducj i siei citadins. Altris mobilitazions a àn tocjât la Corsiche e la Sardegne. Ai 29 di Setembar a Aiacciu, invezit, al è stât un incuintri tra rapresentants dai indipendentiscj progressiscj di chenti di Core in Fronte e dal moviment antimilitarist sart A Foras, che ai 16 di Otubar dongje dal poligon militâr di Capo Frasca a àn inmaneât une manifestazion, adun cun chei di Core in Fronte e ancje cu la partecipazion di un grup di furlans, cuintri dal ûs dai teritoris des dôs isulis in funzion de vuere e a pro di un Mediterani e di une Europe di pâs. ❚