L’amont de mont furlane

Tant che une profezie in spiete di inverâsi, chê de mont furlane e pâr une bataie aromai ae fin e forsit, propit par vie che e je za dade par pierdude, i intervents par dâi cuintri ae murie a vegnin dispès puartâts indenant cun sflacje e fintremai cun arogance, cence rispiet e atenzion pal teritori.
◆ Nol è di maraveâsi, duncje, se intal lei publicazions di dîs agns indaûr si cjatìn denant di une fotografie compagne di chê di vuê, fale che pai ofegaments li che al jere un rai di soreli.
◆ “Civiltà alpina. Il tramonto della montagna friulana” al è un saç sut ma penç di riflessions che Paolo Pellarini al à publicât intal 2012 in gracie dal contribût de associazion Ermes di Colorêt e de Regjon, e che, magari cussì no, al è restât intal scansel cence jessi presentât ator, aben che lis peraulis, letis a distance di cussì tant timp, a rivochin il sunôr mareôs di une metude in vuaite no scoltade e finide in disgracie.
◆ Za midiant dal titul, “L’amont de mont furlane”, une provocazion par stiçâ une reazion di bande di politics e aministradôrs, l’autôr nus mene dentri di une tiere in crisi, plene di ricjecis no disfrutadis o lassadis disparî, bandonade a se stesse e cuntune bisugne estreme di un jutori par tornâ a cjatâ la sô strade.
◆ Vie pes pagjinis, pardabon un at di amôr par chestis monts che a àn patide dute une schirie di intervents negatîfs di bande di Stât e di Regjon, i dâts economics a vegnin spiçâts fûr cun nozions di caratar storic, culturâl, antropologjic e linguistic; cun di plui, il lavôr al è insiorât di citazions leterariis e curiositâts pôc cognossudis: o scuvierzìn, par esempli, che a Tumieç si doprave il “potas” (une misture di cinise) par sblancjâ lis telis, o che lis feminis di Lusevare e dulintor a saltarin sù cuintri dai oms de Republiche di Vignesie.
◆ Cualchi cjapitul al reste bon inmò in dì di vuê, biel che par altris si son viertis cicatrîs duliosis li che il cuarp al someave jessi plui fuart (il faliment de Coopca, i albiercs slargjâts falîts, i percors museâi sierâts).
Alc, in veretât, al è mudât in miôr, tant che lis iniziativis pe zone industriâl di Damâr o chês indreçadis al turisim; dut câs, stant al autôr il declini al è masse fuart par tornâ indaûr.
◆ Cul savê de dì dopo, Pellarini al bute di gnûf il voli bande la “civiltât alpine”, tacant des Comunitâts di Mont e des Provinciis, che cuant che a jerin in vore si jerin dismenteadis dal dut (o forsit no lis àn mai cognossudis) des indicazions e des propuestis de CIPRA – Comission internazionâl pe promozion des Alps, biel che lis convezions europeanis no vevin un dissen daûr e no àn lassade une olme stabile inte economie, cussì come che lis Alps orientâls no son stadis tiradis dentri avonde.
Ancje la Universitât dal Friûl (che e à dade vite a une oficine di pueste pe mont intal progjet “Cantiere Friuli”) e varès di proponi iniziativis concretis, cun esemplis pratics e aziendis vuide judadis di esperts, di mût di dâi cuintri ae fuide dai zovins.
◆ Par chel che al inten il disfrutament energjetic, al bastarès cjalâ ai paîs dongje: in Baviere, tant par dî, il piçul comun di Wildpoldsried (2500 abitants) al è cognossût par jessi il paîs plui ecologjic dal mont, bon di produsi energjie di fonts rinovabilis che dopo e ven ancje vendude difûr.
◆ Dal sigûr, dongje di panei solârs, fotovoltaic e implants eolics, une buine risorse economiche e podarès jessi il legnam, lassant spazi al len di cualitât, impen che al bosc di tai. Te stesse maniere, bisugne sburtâ di plui su lis malghis e su la produzion di prodots tipics, tant che pomis, verduris o mindusiis.
Cun di plui, la nature salvadie, risorse par ecelence, e podarès jessi disfrutade in maniere no invasive, cun percors di fitness e valorizazion dai puescj, cirint il colegament cu lis zonis di confin (massime pe Val de Tor).
◆ A somein conseis scontâts, purpûr nissune Zonte si è inmò interessade a metiju in vore: forsit pardabon chei che a stan a Triest a crodin che par rindi dut apetibil al basti tacâi parsore un tacon cu la scrite “Io sono FVG”. O forsit, come che al diseve ben Gortani, “al pâr che a paronâ e sedi la preocupazion, se no fintremai une pice di scjampâ vie dal passât e di liberâsi di dut ce che lu ricuarde, come se al fos un vencul”.
◆ Sperìn duncje che il spirt di cheste civiltât alpine, cjaviestre e inmò salde, si poi ogni gnot sui stomis di chescj nestris sorestants, tant che un cjalcjut pront a tontonâ e a tormentâ par viodi vinte la sô lungje bataie. ❚