O sin dacuardi che in chest moment dut il mont al è daûr a frontâ un pericul sanitari globâl di chei che non si viodevin di un grum di timp. Dut câs, su chest gjornâl no cjatarês nissun consei su cemût frontâ la pandemie di Coronavirus che e je in cors. Achì, salacor, si pues cjatâ cualchi consei par frontâ un altri virus che si è tacât plui voltis intor de maiorance dai furlans: il Sotanavirus… Al è sot i voi di ducj, ma al è cetant dificil di vuarî: purpûr la diagnosi e je avonde facile, parcè che i sintoms si manifestin cuntune frecuence e une intensitât che no si pues falâ a identificâju. Dut câs, ve chi la casistiche par fâ un test di autovalutazion e capî se ti à za contaminât.
Al è chel virus che par esempli ti fâs crodi che ce che tu e il to popul o vês fat e costruît intai agns al sedi simpri di mancul di ce che a àn fat chei altris, e che se cualchidun ti ordene alc di Rome, Milan o Vignesie, al à di vê un pocje di reson e tu invezit no tu puedis dî nuie cuintri parcè che ae fin lôr a son plui grancj e tu tu sês pitinin e provinciâl.
E je chê malatie che ti sburte a pensâ che la tô lenghe mari, ancje se aromai milenarie, e sedi une antigaie di fevelâ soredut te ostarie dal paîs o massime cui parincj. Par sigûr mai inte scuele, che e à di restâ scuele taliane come che a insegnin ducj di 150 agns, e parâ fûr ogni segnâl di apartignince o inlidrisament a un teritori.
Al è chel pinsîr che al puarte tancj a autocensurâsi in maniere preventive e a no doprâ il furlan tes ocasions publichis “par rivuart di cui che no lu capìs”. Stant che lis ricercjis sociolinguistichis fatis intai agns a mostrin che la competence orâl passive (ven a stâi la comprension) te societât furlane e je in tancj câs fintremai parsore dal 90 par cent, e che duncje 9 su 10 a capissin il furlan, al è chel ugnul su 10 che par rispiet nestri al varès di ponisi il probleme di imparâlu.
E je chê brute bestie che, cuant che si fevele di autoguvier, ti fâs pensâ che al sarès biel fâ di bessôi, ma se i sorestants no vuelin, al sarà un parcè… Che no ti fâs inacuarzi che la tô Regjon e je cussì autonome che aromai no je parone di nuie: aghe, energjie, bancjis, impresis a son za svoladis vie. E cumò ti puartin vie ancje i bêçs che a vegnin des tôs tassis, che a coventaressin pardabon a rilançâ une economie che intai ultins dîs agns e je stade sdrumade come di un taramot.
Ocjo, che se no tu ti sês visât che la Regjon e à volût insisti par fâ la Tierce corsie de autostrade cui siei bêçs (che a son i tiei), il virus forsit tu lu âs za incubât. Sì, propit chê autostrade dulà che a corin mieçs di traspuart di mieze Europe, dulà che par doi agns ai furlans ur son tocjadis dome multis, trafic intai paîs e codis cuinçadis di sacraments. Ben, se ti vessin dite che cheste “grande opare” no le varès paiade ni la Europe ni la Italie, ma la sachete di Toni e Meni, varessistu dit “po ben” alçant lis spalis? Alore la situazion sì che e je grivie…
Alore viodin, fasìn la prove finâl. La cuintrianalisi definitive. Intal mês di Fevrâr ti sêstu scandalizât parcè che i avions des Frecis Tricolôrs no svolaran su lis splazis di Grau e di Lignan? Ti sêstu indignât avonde? Âstu firmât apei, condividude la gnove, stiçat dibatits? Ti sêstu sintût deprivât di alc? Se intant che tu fasevis cheste azion di volontariât civic no tu ti sês inacuart che il Parc sientific di Udin al è stât glotût di Triest, che cu la Regjon e la sô Aree di Ricercje al varà in man dutis lis sieltis strategjichis che fin cumò a vevin simpri tignût in pîts cheste realtât cence fonts publics e cun risultâts di ecelence, alore il Sotanavirus ti à za cjapât. Vuelistu vuarî? Alore tache cuntune buine dose di articui de “Patrie”: tu viodarâs che e larà subite miôr… ❚
