L’80 % dai furlans a disin che al è just insegnâ il furlan a scuele e il dât al è aromai costant tai studis dai ultins agns. Une conferme che e rive ancje te ultime rilevazion fate dal Cirf (centri interdipartimentâl pe lenghe furlan) de Universitât dal Friûl e presentade martars ai 10 di Lui in sale Florio. “Percezion e prospetivis di une lenghe: il furlans tes opinions de int” al è il scandai fat par rilevâ i efiets de campagne di promozion de lenghe furlane, fate tacant dal mês di Novembar 2006 fintremai al mês di Lui dal 2007. Di fat, come che e à dit Priscilla De Agostini, sporteliste di lenghe furlane che e à coordenât la campagne “La Universitât dal Friûl e à volût sperimentâ e promovi une largje campagne di comunicazion in e sul furlan, cul sproc: F=MC2 Furlan = Mieç di Comunicazion al cuadrât, dant aes “vôs” di trê innomenâts personaçs di sience – Albert Einstein, Neil Amstrong e Karl Popper – l’impegn di valorizâ lis potenzialitâts espressivis de lenghe furlane”. Il furlan, imbinât al mont de ricercje, de tecnologjie, de sience e de filosofie, al intint cussì cuistâ e rinfuarcî la sô imagjin moderne e dinamiche. La formule F=MC2, derivade di E=MC2, sinonim universâl di scuvierte sientifiche, e à volût rimarcâ l’aspiet cetant inovatîf, cuasi “rivoluzionari”, dal ûs dal furlan tant che lengaç sientific, tecnologjic e filosofic. In gracie di chest progjet, finanziât de leç 482/99 di tutele su lis minorancis linguistichis storichis, la lenghe furlane e mostre di podê sostignî i senaris plui adats ae Universitât dal Friûl, une universitât de Inovazion, de ricercje e de didatiche, proietade al futûr e indreçade a une comunitât largje, ma ancje leade a fuart al so teritori. I risultâts dai cuestionaris doprâts pe misurâ il preseament a son stâts elaborâts e analizâts di Linda Picco, ricercjadore dal Cirf “Lis reazions plui positivis lis vin vudis te provincie di Udin, cuntune prevalence de zone fûr citât” e à comentât Linda Picco “Ma ce che in particolâr nus confuarte al è che cheste percezion positive e je stade dade di un campion une vore zovin e cuntune istruzion medie e alte: pal passât chestis a jerin lis categoriis plui “fredis” rispiet ae cuestion de tutele linguistiche, ma cumò invezit o vin vût la conferme che la sensibilitât e je cressude”. Duncje un risultât une vore positîf che al da fuarce ancje aes protestis dal Comitât 482 che, cuntun apel publicât la setemane passade, al domande une leç regjonâl che e garantissi plui tutele di ce che al è stât proponût di bande de zonte Illy. A proposit di chest apel (publicât ancje a pagjine 11, n.d.r.), il retôr Honsell al à comentât cussì: “Il stîl combatîf dal comunicât dal Comitât 482 nol è tant adat al gno rûl istituzionâl e no mi permet di firmâlu te version origjinâl. Ma o condivît ad implen i obietîfs e ancje jo o invidi il consei regjonâl a miorâ il test di leç in discussion e a rindilu plui eficaç, par rivâ in curt ae aprovazion di une leç che partint de tutele e valorizazion de lenghe furlane e inovi i insegnaments des lenghis, minoritariis e internazionâls. Il plurilinguisim al è un patrimoni inestimabil di cheste regjon e nol pues jessi ignorât”.Par viodi il studi complet, si pues cjatâlu sul sît: www.uniud.it/cirf
Christian Romanini
:::::::::::::::::::::::::::::::::::::::::::::::::::::::::::::::::::::::
La lenghe e viaze in coriere
La marilenghe e je stade buine di otignî un biliet di favôr par viazâ in coriere in dute la provincie di Udin. Cun di fat, ai 6 di Lui stât, la Regjon, insiemi cun la societât Saf autoservizi spa, e cul jutori de Arlef, Agjenzie Regjonâl pe Lenghe Furlane, a àn inviât un plan di vore par picjâ in tes corieris che a corin in dute la provincie di Udin segnâi e tabelis in marilenghe, scrite dongje dal talian e dal inglês. Il plan al è stat inviât cu la firme di un acuardi inte sede de Regjon a Udin, cu la partecipazion di ducj i protagoniscj de iniziative. A àn firmat l’acuardi l’assessôr regjonâl ae Culture, Roberto Antonaz, il president de Provincie di Udine, Marzio Strassoldo, e l’aministradôr delegât de Saf, Silvano Barbiero. «Cheste e je la prime azion di un program di iniziativis previodudis dal nestri acuardi, che al à voie di scometi pe valorizazion de lenghe furlane in ducj i setôrs de vite quotidiane», al à sclarît il president de Arlef, Lorenzo Fabbro. Il pat al à ancje metût adun un Comitât operatîf che al è componût dai rapresentants dai ents che a puartaran indevant il progjet insiemit. «Tant che aziende privade, o vin volût rispuindi a une esigjence che e je stade presentade de plui part dai 21 milions di viazadôrs che o traspuartìn ogni an in provincie di Udin», al à fat savê l’aministradôr de Saf, Barbiero. «Cun di fat, la maiorance dai viazadôrs – al à continuât – e dopre il furlan par domandâ informazions al nestri personâl. In plui che tabelis e segnâi, e ancje display in marilenghe intes corieris, il plan di vore al previôt ancje cors di lenghe furlane pal personâl de Saf e une novitât: musiche furlane di scoltâ pai zovins students che a viazin intes corieris sù e jù per provincie di Udin». «Chest al è un piçul pas indenant in te juste direzion – al à dit l’assessôr regjonal ae Culture, Roberto Antonaz – ven a stâi la creazion di une rêt par doprâ pardut la marilenghe. No vin dibisugne di grancj salts, ma di azions concretis inte vite di ogni dì». Par chel che al rivuarde la domande di revision de gnove leç regjonâl pal furlan intes scuelis che e je stade presentade dal Comitât pe autonomie dal Friûl, l’assessôr al à dit: «Plene disponibilitât di bande de Regjon par justâ il tîr».
Alberto Rochira
