Lenghis e dirits in Europe, la colaborazion tra ateneus si infuartìs inte suaze dal progjet UniNet

Une schirie di universitâts e di centris di ricercje de Europe si dan dongje par dâ il lôr contribût par fâ sù une Europe diferente, pardabon “unide inte diversitât”. La suaze operative par meti in vore cheste azion che in chel istès e tocje lenghis, dirits, didatiche, ricercje, cognossince, divulgazion e internazionalizazion e je chê di UniNet, il progjet strategjic di cooperazion in cjamp academic che al è stât promovût de bande de Rêt Europeane pe Promozion de Diversitât Linguistiche (NPLD), che di chê a fasin part istituzions teritoriâls, universitâts e altris entitâts espression dai teritoris de Europe là che a son minorancis e nazions cence stâts. La iniziative, dopo jessi stade pensade intes sôs liniis vuide vie pai ultins mês dal 2022 e po imbastide vie par cualchi incuintri in linie, e je stade inviade in concret in ocasion de Conference inmaneade ai 13 e 14 di Jugn stâts li de Partium Keresztény Egyetem (Universitât Cristiane dal Partium), ateneu di riferiment pe comunitât ongjarese de Romanie ocidentâl, che si cjate inte citât di Oradea / Nagyvárad.
◆ Vie par chês dôs zornadis, i rapresentants di ateneus e istituzions sientifichis dal Gales tant che il Coleg Cymraed Cenedlaethol e la Universitât di Aberystwyth, de Frisie tant che il Mercator Research Center e la NHL Stenden, dal Paîs Basc tant che il Soziolinguistika Klusterra e po ancje de Universitât di Stocolm, de Universitât dal Friûl e de Universitât Cristiane dal Partium a son stâts protagoniscj di un confront profont e siôr di contignûts in cont di pluralisim linguistic, insegnament e ûs des lenghis di minorance, dirits linguistics, politichis di tutele e studis di sociolinguistiche e linguistiche aplicade.
◆ Inte prime des dôs zornadis di lavôr a son stadis presentadis diviersis ativitâts e ricercjis puartadis indenant in Frisie, Gales, Paîs Basc, Friûl e intes comunitâts ongjaresis di Romanie e finlandesis di Svezie. Inte seconde zornade, ancje daûr des azions za in vore che di chês si veve za fevelât vie pe prime dì, a son stadis butadis jù lis fondis operativis pe elaborazion condividude di progjets di colaborazion tra ateneus, struturis universitariis e altris centris di ricercje, inte suaze dai programs europeans Erasmus+ e Horizon. La atenzion e je stade pontade sui scambis tra docents e students, su lis ativitâts didatichis e di ricercje, sul disvilup di programs didatics condividûts e su formis di promozion e divulgazion dai risultâts otignûts, cun riferiment aes tematichis strategjichis de identitât, dal plurilinguisim, dai ûs linguistics in contescj formâi e informâi e dal rapuart tra lenghis, identitât e gnovis tecnologjiis.
◆ Un contribût impuartant al è stât puartât ancje de ministre de Provincie de Frisie, Sietske Poepjes, che intal NPLD e je stade la promotore de iniziative UniNet. Cun di plui e je stade la firme de bande de esponente dal guvier frison e di Gábor Flora de Partium Keresztény Egyetem di un protocol di intese che al rapresente il pont di partence di un percors di colaborazion che si disviluparà vie par chest an e pal 2024, ancje cun altris acuardis tra lis diviersis istituzions sientifichis implicadis intal progjet in rêt UniNet: no dome tra chei che i lôr rapresentants a jerin a Oradea / Nagyvárad in ocasion de Conference, ma ancje cun altris universitâts che a operin in teritoris di lenghe minorizade, tacant di chês dai Paîs Catalans, che a colaborin bielzà inte rêt specifiche Vives. Dongje dai acuardis interistituzionâi che a vignaran fats e formalizâts tai mês seguitîfs, si larà dilunc cui prins scambis di docents e di ricercjadôrs e cu la preparazion di propuestis progjetuâls specifichis in rispueste ai bants di finanziament de Union europeane. ❚