Letare al gnûf Vescul la lezion di Aquilee no va dismenteade

Preseât bonsignôr Riccardo Lamba, gnûf Arcivescul di Udin, “La Patrie dal Friûl” i da il benvignût e i fâs i auguris pe so gnove mission. La miôr robe che o podìn sperâ, par lui e par nô, e je che al rivi a colp a jentrâ in sintonie cu la storie di cheste tiere, che e je peade a fîl dopli cu la storie de sô Glesie. No, dut câs, la Glesie uficiâl e jerarchiche, ma chê che e sta sui paradôrs de istituzion: une Glesie che la Curie e à tignût di voli e contrastât, parcè che e à simpri cjalât plui a Aquilee che a Rome.
◆ Aquilee di fat e je la çocje che e à burît fûr la nestre int, la sô Glesie e je la scune che le cressude ma cence indurmidîle. Anzit, le à fate cressi libare di pensâ cul so cjâf, tant che a un ciert pont, cul Schisme dai Trê Cjapitui, e je deventade “eretiche” e i siei Vescui, chei che le àn vuidade, si son clamâts Patriarcjis. Cheste e je simpri stade la “specialitât” de Glesie di chenti, ma no je simpri stade rispietade de Curie di Rome.
◆ Noaltris de Patrie o sin fîs di un di chei predis che a àn incjarnade chê Glesie cussì origjinâl: a screâ chest sfuei al è stât Pre Josef Marchet, un om che al ven fûr di une tiere di int inteligjente e plene di sgrimie, ma cussì libar di cjâf e di cûr che nol à mai platadis lis sôs ideis, fasint cognossi i valôrs de Furlanetât e sburtant ducj i abitants dal Friûl a no pierdi la lôr identitât.
◆ Cheste identitât e je ancjemò cussì fuarte che e ven pandude midiant di une lenghe, vecje di vot secui e siore di 70 mîl peraulis. Cun cheste lenghe un dut un popul al volarès podê preâ: un altri predi di cheste Glesie “eretiche”, pre Checo Placerean, al sburtave la rinassince dal Friûl maçât dal Taramot dal 1976 fasint fuarce a la sô int disint “Il popul al à di saltâ fûr pal cjâf e no pai pîts come i muarts”.
◆ Po ben, par fâ resurî chest popul pre Checo al à parfin tacât a voltâ la Biblie inte sô marilenghe cuntun lavôr straordenari di traduzion che ae sô muart al è stât puartât insom di un altri predi che nol veve la ubidience al Vatican come prime prioritât, ven a stâi pre Toni Beline.
◆ O podaressin zontâ i nons di cetancj altris predis (int come Guglielmo Biasutti, Gilberto Pressacco, ‘Sef Cjargnel, Pieri Piçul, Duilio Corgnali) che a àn lassade la olme di une identitât fuarte. Tal 1967 cheste Glesie si jere fate indevant parfin cuntune “Mozion pal disvilup sociâl dal Friûl”.
◆ Viodial, bonsignôr, trope storie che e à la nestre Glesie? Je àno contade? Dute? Se al covente, noaltris o sin pronts a fâi un struc. Ma e je une preiere che no pues spietâ. Chescj predis furlans che no si rindin a fâ pierdi la identitât dal lôr popul a àn prontât ancje un Messâl che pai siei confradis vescui talians nol è ben che si dopri. Nol è facil, par nô, capî ce pericul che al è se un popul al pree te sô marilenghe. La laude al Signôr e varès di jessi preseade in cualsisedi lenghe che e vegni pandude, e se la volontât di Diu e je stade chê di creâ i oms diferents, pe lôr muse, pe lôr culture, pes lôr fevelis, parcè la Glesie di Rome vadie cuintri de nestre identitât?
◆ Bonsignôr, se al à voie di jessi pardabon il pastôr de int furlane, nol à di lassâ che la Glesie di Rome e ledi indenant a mostrânus che par jê no contìn nuie come furlans. Pal mont o sin piçui, ma ai voi de storie o sin une liende che e continue a vivi in memorie di Aquilee di doi mil agns incà. Par chest o preìn te nestre marilenghe. E o sarìn ancje eretics, ma no fasarìn mai di mancul di jessi furlans. Ogni ben. ❚