La atenzion di pre Cjargnel aes problematichis dal rispiet e dai dirits de identitât dal Popul Furlan e jere partide ae fin dai agns Sessante dal Nûfcent. O ricuardìn la partecipazion ae Mozion dal Clericât di Udin (1967); la azion pal ricognossiment dal Messâl Furlan e pal dirit di doprâ la marilenghe pardut; la redazion, cun pre Beline e bonsignôr Dentesan, dopo dal sisme dal 1976, dal document Dopo taramot. Ai furlans che a crodin (cul sproc «Prime lis fabrichis e po lis cjasis e lis glesiis»); la publicazion di Cjantis di Glesie dal Popul Furlan pes diocesis di Cuncuardie-Pordenon, Udin, Gurisse, di Cjants patriarcjins di tradizion orâl e Saghe furlane.
Cun pre Beline al à colaborât fin dal inizi al periodic autonomist di Glesie Furlane Patrie dal Friûl. Al è stât un dai promotôrs de leture seguitive de Bibie par furlan.
Al à fondât e diret il Coro “Rôsas di mont” che il so repertori si fonde su lis espressions de musiche sacre patriarcjine tramandade oralmentri tes glesiis furlanis. E sul cjant patriarcjin al à lavorât fin insom. La sô ultime fadie e steve rivant al travuart: une altre racuelte cui recitatîfs liturgjics de tradizion patriarcjine (edizions Glesie Furlane), che pre Josef e à curât fin da pît e che e vignarà presentade in curt.
A.S.