✽✽ Al somearà strani, ma la notizie piês e je chê di une nomine che ducj a àn osanade: la elezion di Massimiliano Fedriga a president de Conference des Regjons. Duncje, l’esponent leghist a cjâf di un organisim impuartant, cuasi un cuintrialtâr dal guvier centrâl, cemût che o vin podût notâ in chescj periodis di pandemie. Pericolôs pal Friûl no pe apartignince dal personaç a chel partît, ma pe cjarie di governadôr che al à te nestre regjon. La sô designazion e vûl dî slungjâ, diluî la specialitât intal grant cjalderon dal regjonalisim talian dulà che il concet stes al ven metût simpri in discussion di un moviment trasversâl de politiche che al berle di straçariis e di ineficiencis, ancje no a dituart se si cjale la Sicilie.
✽✽ Za cuant che al à vint intes ultimis elezions, tancj a vevin sotlineât il grât di insoference par une cjarie cussì provinciâl tant che chê dal Friûl-Vignesie Julie, lui om destinât a ben altris destins nazionâi sot de ale e de benedizion dal sorestant Salvini. In chescj trê agns, la sô zonte no si è ciert segnalade par visions strategjichis sul futûr di chestis tieris e dome la sanitât tal timp dal Covid e à tignût bot, cundut dal vignî fûr di grandis busis intal sisteme, sigûr ancje risultât di erôrs antecedents, assegnabii ae gjestion Serracchiani, ma fats cun convinzion.
✽✽ O ai pôre di chest rûl “imperiâl” di Fedriga, in prevision des sieltis che a vignaran fatis sui fonts europeans, su la part di miliarts che i tocjaran al F-VJ, sul lôr implei e su lis oparis li che a saran destinâts.
✽✽ O sin e o restìn ancjemò intal inciert, cun titui pompôs di areis dulà intervignî, di proclamis grandiôs e di pocje sostance. Par dî il vêr, il “gras” al gote inte aree triestine, intes infrastruturis che a fasin riferiment a cheste, come se il futûr di Sapade a Tarvis, di Sacîl a Tisane al dipendès e al fos al servizi di cheste uniche realtât.
✽✽ A contaran i numars plui che lis peraulis, i fats plui de lis declarazion di beneficis gjenerâi che a derivaran cun cheste vision di disvilup. Però al à di jessi ben clâr a ducj che, cuant che lis cifris a fevelaran, i cantîrs a varan non e cognon e direzion: nol esistarà plui nissun alibi se, fra di lôr, nol risultarà chel clamât Friûl.
✽✽ Cuant che a fevelaran i fats al sarà masse tart par meti in discussion cheste “Regjon mai nassude”. I vaiarii a coventaran a pôc devant de paronance dal podê e dal centralisim, statâl o regjonâl che al sedi. ❚