✽✽ Il prin impuls al sarès chel di ignorâ la cuistion, di tante che e je la balordisie de propueste, ma stant che dopo i bêçs a son i nestris e la figure di stupits le fasìn nô furlans, al è just meti ae berline, almancul mediatiche, cui che al à pensât e progjetât chel logo ignobil che al varès di rapresentâ la produzion agroalimentâr regjonâl. O fevelìn di “Io sono Fvg”, la marche destinade a promovi lis nestris ecelencis in cjamp enogastronomic, cuntun voli particolâr al riclam turistic. Ve mo, imagjinaitsi un consumadôr devant de scansie di une buteghe o un vacancîr impegnât tal programâ un periodi di feriis in Italie. Devant de propueste golose “Io sono Fvg” al colarà in zenoglon estasiât de imagjin sugjeride di chel messaç. Se dopo al ves ancjemò dubis su la sielte, i pense un sgherlif incomprensibil, ma che daûr dai autôrs al varès di rapresentâ la acuile de steme regjonâl, a fâ colâ lis ultimis inciertecis.
✽✽ Secont ducj i publicitaris, cuntun brand dal gjenar no si va di nissune bande, ma jo no soi un tecnic e chi mi fermi, cu la convinzion che e je une “ciofeca”, une cragne, e ancje saltade fûr mâl.
✽✽ E chel al sarès ancjemò il mancul: cheste regjon nus à usâts di simpri a campagnis promozionâls sbaliadis, fasint l’erôr – a ogni cambi di zonte e di assessôrs – di butâ vie ce che al è stât fat dai predecessôrs, cul risultât che il client no si fidelize al prodot.
✽✽ Ce biei i timps di “Un vigneto chiamato Friuli”: i siei manifescj, ben insuazâts, ju podês ancjemò cjatâ picjâts in tantis tratoriis e ristorants ator pe penisule.
E chi o vignìn ai prins responsabii, ven a stâi a cui che ae fin al à dât la vie libare a cheste operazion grame e si ‘nd è ancje svantât. Sì, parcè che e je la politiche che e paie, che e decît la iniziative.
✽✽ Duncje o podìn dî che il president Fedriga al à la plene responsabilitât di ce che al è daûr a sucedi.
✽✽ La robe no mi maravee par une serie di motîfs che cumò o provi a listâ.
✽✽ Intal logo al è il tricolôr, invezit l’element regjonâl plui rapresentatîf dal pont di viste istituzionâl, o ben la acuile, al ven dispierdût intun dissen che al ricuarde – cjale ce câs – la plante di Vignesie cu lis sôs isulis e canâi, ma soredut no si enfatize, no si rimarche la peraule Friûl o furlan, ven a stâi di un teritori che come che si sa al furnìs i prodots che si volaressin publicizâ.
✽✽ Dut al finìs intun anonim “Io sono Fvg” tant cjâr a cui che, come Fedriga e la Leghe salviniane, al inaghe la nestre specialitât intal mare magnum italic, cun preferencis pal Alt Adriatic dal assessôr Bini e di Agrusti.
✽✽ No stait a dî che o sin i solits furlaniscj: cu la pocjece di cheste zonte e paie ancje Triest, ma a Barcola a àn confondût il logo. A pensavin che al fos scrit: “Je suis Catherine Denevue”. ❚