✽✽ In maniere periodiche su la sene politiche a saltin fûr moviments di masse critics viers un podê viodût tant che lontan des domandis plui elementârs di democrazie e di partecipazion. A son grups che, partint di protestis di setôr, a slargjin l’orizont di lote fin a contestâ lis istituzions e i lôr rapresentants. Tal passât, il moviment “dai forcjats” al è stât l’esempli plui clâr pe sô difusion a nivel dal mont contadin european. Ma a son stâts ancje “i zirotondins”, “il popul viole” e vuê “lis saradelis” sul front de çampe, i “gjilês zâi” su chel sovranist. Il mont al è plen di colôrs pronts a invadi lis viis cun sprocs e proclamis. A tirin dongje consens parcè che il pont di roture tra citadins e Stât al è rivât a nivei alts di tension.
✽✽ Culì, però, no si ponte a un saç di sociologjie, ma a cirî di capî trope influence che a puedin esercitâ su la politiche autonomiste in Friûl. Dal pont di viste eletorâl, no somein cambiâ tant. La nestre atenzion duncje e varès di jessi destinade a un fenomen diviers, ven a stâi a cuant che a son i zovins a lâ in place. Chi o vin di stâ atents a ce che al sucêt, sedi parcè che i protagoniscj a rapresentin il futûr, sedi parcè che a son moviments mondiâi.
✽✽ Par cierts aspiets, propit in chest e je la lôr “pericolositât”, parcè che al esist il pericul concret che si scanceli ogni carateristiche teritoriâl des rivendicazions. A’ndi esist ancje un altri, ideologjic e politic, cun efiets za sperimentâts tal passât cu la esistence contemporanie de contestazion dai students dal ’68 e la nassite dal Moviment Friûl, fuarcis che no àn mai rivât a cjatâ une sintesi intal interès de Patrie. Fenomen che invezit si è realizât in Catalogne, intai Paîs Bascs, in Irlande e in Sardegne.
✽✽ Di zovins si inamorisi cun facilitât di ce che al somee che al puedi slargjâ la cognossince, scjampant di chei che a parin impediments provinciâi, visions vecjis e retorichis de storie e de vite. In chel sintîsi “citadins dal mont” al torne a emerzi l’incjant dal globalisim, cussì simil a un arbul cun lidrîs pôc profondis, destinât a secjâsi di corse, cence dâ pomis. ❚