✽✽ O jeri piçul che za o tignivi pai indians: pluitost de stele di bande dal serif e dal cjapiel di cow boy o vevi miôr l’arc, il tomahawk invezit de colt. Cualchidun al dîs che cheste sielte e sedi dentri fintremai intal Dna des personis, cuasi a contrassegnâ un metisi de part dai batûts, dai ultins, fin de infanzie. In maniere plui modeste, o crôt che e sedi leade ae grande influence esercitade su di me di une des primis seriis televisivis de TV dai fruts sul finî dai agns ’50. Si clamave “Penna di Falco, capo Cheyenne” e finalmentri no presentave i natîfs tant che i salvadis ignorants che si viodevin intai cines western.
✽✽ Al sarà duncje par vie di cheste mê deformazion storiche afetive che intal periodi di cumò, dulà che a son tancj riclams e rievocazions des epidemiis passadis, mi à maraveât no vênt notade nissune sul ûs che propit dai virus, des malatiis infetivis, al è stât fat par disterminâ il “popul ros”. E vâl la pene duncje ricuardâ cemût che lis tribûs no son stadis batudis di esercits e di colons, de cjace al bisont intensive di bande dai blancs, ma soredut di vuarvuele e varuscli, difondûts a palotis intes primis risiervis.
No si trate di saborâ un sens di colpe che al caraterize un tierçmondisim aromai datât, ma di ricognossi che il gjenar uman nol à vût scrupui intal doprâ l’infet tant che arme letâl par rivâ ai siei fins di concuiste e di domini.
✽✽ E cheste pandemie puedie risultâ e pandisi cussì ancje pal Friûl?
Dal pont di viste sanitari, mi somee che i “anticuarps” a vedin funzionât, che la rispueste complessive e sedi stade buine. E à confermât la ecelence dal compart intal so insiemi e dai siei atôrs principâi: ospedâi e centris di ricercje.
✽✽ Duncje, cumò l’interogatîf su la tignude si môf bande il doman plui prossim, dulà che il pericul “estinzion” nol è par nuie retoric. Pensait che fintremai la emigrazion, chê che intai secui e je stade la “valvule di sbroc” in moments di grande depression economiche, vuê e podarès jessi impraticabile par vie de sieradure di chei altris paîs.
✽✽ Dispès o vin volût identificâsi intal mont dai indians, o vin fat riferiment al tiermin nazion – intindût tant che insiemi des tribûs che a formavin la lôr organizazion statuâl – e o vin doprât la espression “risierve indiane” par segnâ la cundizion là che un stât centralist al voleve ridusi il Friûl.
✽✽ Cumò vuardiìn che i “aiûts umanitaris” che a saran concedûts no si trasformin in ancjetantis cuviertis infetadis. Forsit o varessin di inventâsi la vacine di bessôi. ❚
Dree Valcic