✽✽ Si clame “Incanto” il documentari firmât dal regjist Marco D’Agostini par contâ la intuizion straordenarie di pre Gjilbert Pressac. Il predi di Turide di Sedean, muart tal 1997, tacant des notis di “Schiarazule Marazule” e dal studi atent dai mosaics de basiliche di Aquilee, al rivà a disvelâ chel fîl “terapeutic” che al peave Alessandrie di Egjit aes primis comunitâts judaichis e cristianis rivadis par mâr in Friûl.
✽✽ Une ricercje, chê di pre Gjilbert, che no si limità ae analisi des origjins, stant che impen al slargjà la cognossince ae individuazion di chês carateristichis etichis, filosofichis, religjosis, che, tai secui seguitîfs, a varessin segnât il troi de glesie di Aquilee, insuazantsi cun armonie tal contest sociâl di chê volte e lant a formâ, in reson di chel, lis carateristichis identitariis dal popul furlan.
✽✽ Une opare impuartante, duncje, chest cine, che o sperìn che nol ledi a murî tes seradis des rassegnis culturâls estivis, ma che al podedi deventâ imprest, o olsarès a clamâlu didatic, tes scuelis e tes comunitâts.
✽✽ Nus mancjin chescj struments di condividi che a son invezit fondamentâi par tornâ a cjapâ cussience de storie, intindude tant che rielaborazion dal nestri passât e che cence di chê o sin tant che pipinots savoltâts e sturnîts denant des ricostruzions di regjim. Versions che ta dutis lis epochis, cualsisei e sedi stade la forme di guvier, a àn simpri vude la pretese, se no l’imperatîf, di presentânus un “unicum” storic che al peàs in maniere indissolubil i destins di Rome antighe a chei di dute la penisule e ancje a chei di là des Alps.
✽✽ La diversitât no je mai stade ricognossude tant che ricjece, impen e je stade simpri viodude tant che un pericul par chel “Credo” unic che al cjape dentri religjon e stât. A Aquilee si indi recitave un cun altris peraulis e significâts.
✽✽ Cualchi piçule lumade si viôt ogni tant, par dî la veretât forsit plui di chês che o pensìn e o cognossìn, in gracie dal lavôr di studiôs che no si lassin meti dentri tes catalogazions uficiâls, scomuts aes jerarchiis dal savê academic, malviodûts dai potents, tantis voltis boicotâts. In altris timps brusâts o metûts in preson.
✽✽ Definîts dispès eretics, par no jessisi lassâts condizionâ, amants de lôr tiere, des sôs tradizions e de sô int.
✽✽ Fâ cognossi il lôr pinsîr, vite, sperance e la passion che ju à acompagnâts, al devente un dovê e un onôr par chei che a vuelin lâ indenant su la strade de veretât e de libertât. Che il ricuart di pre Gjilbert nus acompagni ta cheste scjalade. ❚
Dree Valcic