✽✽ Tantis voltis al è stât dit e tornât a dî, ma e vâl la pene ribatilu: par capî il rapuart tra il Friûl e la Europe al baste cjapâ une cjartine gjeografiche, al risultarà clâr che tal centri de cjartine si cjate il Friûl.
Sì, o sin il cûr dal Vecjo Continent e, che si vueli o no, o vin di cjapâsi sù la cjame di cheste – jo o dîs – veretât e responsabilitât entusiastiche. O zonti une altre osservazion, e ancje cheste e podarès someâ banâl: o sin plui dongje di Viene, di Lubiane che no di Rome. La storie dal nestri popul e je chê dai grancj avigniments europeans, il so stes jessi al ven dal incuintri des civiltâts latine, slave e todescje. E prime di lôr, altris olmis, i oms e lis feminis dai cjastelîrs, formis di agregazion sociâl, chês vilis che cuasi cence savê a àn lassât segns profonts intal mût di organizâ la nestre vite coletive.
✽✽ Su chestis tieris si son consumadis lis tragjediis dai secui resints, chi a son stâts i scuintris di monts contraris, ma ancje lis lidrîs dal Cristianisim aquileiês, dal so deventâ messaç di fradilance e di umanitât universâl.
✽✽ Nol covente fâle tant lungje, ma ai nestris zovins o vin il dovê, invezit, di contâle par intîr, in altris sedis, prime di dut inte scuele, a ducj i siei nivei di istruzion, par tornâ a afermâ une mission di testemoneance dade al popul furlan, propit in gracie dal fat di esisti ancjemò vuê cu la sô lenghe, cu lis sôs tradizions, cu la sô etiche: cu la sô muse. Nol sarès stât pussibil resisti, sorevivi, mantignint cheste identitât, se cheste no ves di jessi un segnâl che al dure intal timp, a segnâ la strade che la Europe e pues e e à di fâ.
✽✽ Al è timp di elezions europeanis: intun moment li che nûi neris si impenzissin su lis libertâts concuistadis cun tante dificoltât, no si trate dome di ribati une cussience europeiste fuarte. Chel al è il minim sindicâl, parcè che chê stesse Europe, vuê ostaç di banchîrs e stâts nazion, o e je in stât di diliberâ gnovis energjiis e inschiriâ gnûfs protagoniscj, o cence fal e finirà vitime di chei che di simpri a urdissin pe sô fin e par che a tornin i nazionalisims totalitaris criminâi.
Al è un presit che il Friûl al à paiât za cun lagrimis e sanc. ❚
Dree Valcic