Il progjet de flautiste Luisa Sello al à une nomee internazionâl
A son “Lis Aganis”, a son zovinis e bielis, a sunin i flauts e a àn une lôr vuide, une Saffo di greghe memorie che lis mene, lis istruìs, lis dirêç e lis fâs sunâ insiemi e cetant ben, ricreant ogni volte une armonie di sunôrs speciâi, tra musiche, danze, mimiche e gjestualitât. Si stan fasint cetant preseâ ator pe Europe, e la lôr bravure e à di subit tirade la atenzion de critiche specializade dal panorame flautistic, bravis a coinvolzi ancje il public cu la lôr classe e simpatie.
◆ A son in formazion variabile, cu la presince costante de flautiste furlane, famose a nivel internazionâl, Luisa Sello, che lis à metudis insiemi, dutis zovinis dal Friûl e de Mitteleurope: Sara Brumat, Ilaria Prelaz, Veronica Bortot, Ksenija Franeta, Tijana Krulj, Birgit Karoh.
◆ Il non lu cjapin de tradizion furlane leade aes contis fantastichis, dal mît campestri e acuatic di chestis figuris lezendariis, declinadis tal cors de storie in vari mût, di podêlis svicinâ aes ninfis, aes sirenutis. A vivin intai palûts, tai flums, tes pocis, tai lâcs dal nestri Friûl. Lis aganis cumò a san ancje sunâ i flauts e i sivilots: flauts traviers, otavins, flauts in do, in sol, flauts bas e, intant che a sunin, dispès si movin, si metin sù mascaris, a movin nastris colorâts, puartant i scoltadôrs a vivi une dimension mistiche di grant efiet e sugjestion.
◆ La lôr scuele e je chê de lôr vuide, la soliste Luisa Sello, professioniste ricognossude che si è formade inte scuele prestigjose di Parîs, za docente tal Conservatori di Triest e cumò te Academie Orpheus di Viene, e mestre pal dotorât internazionâl in flaut te New Bulgarian University. “Lis Aganis”, in plui che sunâ in dut il Friûl, si son fatis cetant ben volê ancje fûr de patrie, come al Festival Internazionâl Flautistic di Pechin e Qingdao, rapresentantis de Italie, al Museu Quartier di Viene, al Festival di Varne e in cetancj altris contescj di lustri.
◆ I lôr programs musicâi a van dal Rinassiment ae contemporaneitât, e a sunin ancje tocs scrits di pueste par lôr, come diviers rangjaments di musichis de tradizion musicâl furlane che a puartin simpri cun se, e composizions origjinâls scritis di autôrs furlans, tant che i tocs dal pianist e compositôr Carlo Corazza che al à componût par lôr lis bielis oparis strumentâls par insiemi di flauts “Dolina” e “Maravee”. Cumò “Lis Aganis” a presentaran un gnûf progjet che si intitule “Il velen e la ambrosie”, par contâ de dople personalitât des aganis, tant che fadis che a puedin deventâ ancje maghis, si spere plui buinis che malefichis e, par tant ben che a san sunâ, si disaressin incjantadoris che a sivilotin a fin di ben e pal benstâ di cui che lis scolte. In chest gnûf progjet a metin vôs, intun larc program, ancje in rivisitazions di cjants aquileiês, tant che il “Planctus” di Pavle Merkù, l’“Intradae quinque e sex vocibus” dal nestri Alessandro Orologio vivût tra i secui XVI e XVII, e cun lui Giorgio Mainerio in plen Cinccent, in plui che tocs di Daniele Zanettovic, come propit “Lis Aganis”, scrit di pueste par lôr. In rêt, digjitant “Le Agane e Luisa Sello”, si puedin cjatâ dutis lis novitâts e lis datis dai lôr prossims concierts. ❚