Sîts impuartants pe biodiversitât
che a son di conservâ
(prime part)
Timp indaûr la int che a viveve tai paîs di mont e veve un leam fuart cui prâts parcè che a coventavin, ven a stâi cence prâts di seâ no si vevin i struments par vivi. Insiemi cui cjamps, i prâts a costituivin un ambient che al caraterizave i paisaçs di mont.
◆ Il cambiament dal mût di vivi e il dispopolament a àn determinât un bandon des ativitâts agriculis, silviculis e pastorâls che al à fat slontanâ lis personis dal mont rurâl e provocât une fuarte riduzion, dal secont dopovuere incà, di prâts e cjamps. A chest, pûr intun contest di fuarte diminuzion des popolazions umanis, si è zontade la espansion urbane e infrastruturâl che, massime intai fonts des vals, al à incidût a fuart su la pussibilitât di mantegni un ambient rurâl tradizionâl.
◆ Cundut chest, lis campagnis a restin une componente fondamentâl dal ambient des Alps e a permetin la vite di speciis vegjetâls e animâls che no si cjatin in altris ecosistemis.
Di timp, in Europe, e je stade verificade une diminuzion, in diviers câs une vore fuarte, des speciis leadis a ambients rurâi. Chest par tancj motîfs, par esempli la pierdite e la modifiche di habitats e l’ûs di prodots chimics.
Cheste diminuzion e je capitade sedi intes planuris che intes zonis di mont, dut câs lis causis, pûr vint des elements comuns, a son diviersis sedi pal stât fisic dai lûcs che a àn determinât i insediaments dal om, sedi par motîfs sociâi e culturâi che a àn condizionât mûts e entitâts dal spopolament uman e des consecuencis ditis parsore.
◆ In cheste suaze, ancje lis comunitâts di uciei che a vivin tai ecosistemis agricui son lâts in mancul cui numars. Chest al à sburtât cualchi ricercjadôr a fâ studis ma, stant che si pense che in gjenerâl lis speciis di zonis rurâls a sedin concentradis intes grandis estensions coltivadis des planuris e che i finanziaments pes ricercjis a sedin indreçadis viers zonis cun coltivazions di rilevance economiche (par esempli terens a pomârs), il fenomen in mont a nol à gjoldût di grant interès.
◆ Cui che al scrîf, in passe 40 agns di ricercjis in ambients rurâi di mont, al à rilevât une grande modificazion di chei e des comunitâts di uciei che a vivin alì. Jessint un ricercjadôr libar – cemût che a varessin di jessi ducj chei che a fasin ricercje –, nol è condizionât des decisions di altris personis, des modis o dai finanziaments, e al à volût indagâ la situazion di dôs zonis di fonts de val tal cjanâl dal Tiliment: lis campagnis di Soclêf e di Cjavaç. Chestis a son fra lis miôr des nestris monts pe presince di speciis leadis ai ambients agricui.
◆ Il studi puartât indevant cun chê di definî il cicli anuâl des comunitâts di uciei (duncje cun rilêfs fats in ducj i mês dal an) al à tignût cont di ducj i habitats presints intes dôs campagnis, di mût di rivâ a cjapâ sù dâts significatîfs e rapresentatîfs de situazion ambientâl.
◆ Il sfuarç al è stât premiât. Cun di fat, si è rivâts a vê risultâts interessants che a àn permetût di definî cun buine precision il stât di fat e a son, in part, ripuartâts di chi indenant.
Inte campagne di Soclêf a son stâts contatâts plui individuis (ven a stâi un numar plui alt di uciei) ma mancul speciis: 66 cuintri lis 73 di Cjavaç.
◆ Lis dôs areis si son riveladis impuartantis pal passaç dai uciei in periodi di migrazion e in dutis dôs lis campagnis i valôrs plui alts dal numar di speciis a son stâts regjistrâts propit intai periodis cuant che i uciei a migrin e cuant che a tantis speciis (par esempli il colomp salvadi Columba palumbus, la odule, il dordel e il franzel) a doprin i fonts des vals par passâ.
La presince costante di aghe intal Tiliment (che al cor dongje ae campagne) e à permetût di contatâ nome a Cjavaç speciis leadis a di chê (par esempli il masurin Anis platyrhynchos, l’airon, l’agarûl) sedi via pes migrazions che in periodi riprodutîf: chest al à aumentât la diversitât faunistiche.
◆ La çore Corvus corona, il passar cjarandin Passer montanus e il franzel Fringilla coelebs, a sono stâts regjistrâts in ducj i mês dal an sedi a Soclêf che a Cjavaç.
Lis speciis contatadis in ducj i mês dal an, o cuasi, a son chês che a son sparniçadis plui a fuart o tipichis di ambients rurâi, oltri aes trê ditis parsore: il pic ros Dendrocopos major, la bandule blancje Motacilla alba, il mierli Turdus merula, la parussule Parus major, il gardelin Carduelis carduelis e altris.
◆ A Soclêf a son stadis cjatadis sîs speciis di pics e, di chês, cuatri nidificantis. Chest al è un bon risultât par un ecosisteme agricul e al è pussibil graciis ae presince di ce che al reste de vegjetazion di rive dilunc il percors des roiis (Roie de Siee e Roie dal Mulin) che une volte a passavin pe campagne, e ancje a vecjos pomârs di diviersis cualitâts che a son ancjemò avonde sparniçâts e che a derivin, ancje lôr, dal ambient rurâl di un timp.
A son stadis rilevadis in dutis dôs lis campagnis ancje speciis calcoladis a prioritât di tutele di bande de Union Europeane, tant che a il pic grîs Picus canus e la gjarle Lanius collurio.
◆ Lis comunitâts di uciei des dôs areis a son risultadis avonde dongje graciis a diviers fatôrs tant che a localizazion, la vicinance fra di lôr, la composizion des comunitâts di plantis, lis modalitâts di gjestion. A esistin però diferencis: la campagne di Cjavaç e je plui grande, plui dongje a chê furlane e ae confluence de Fele intal Tiliment, che e je une des direzions principâls di moviment des speciis leadis ae aghe. Il Tiliment al puarte aghe simpri (a diference di Soclêf) e dongje a son palûts fra i plui grancj des monts de Cjargne (par es. Vuarbis), al è plui facil che, in câs di precipitazions bondantis, la aghe si impoci. La campagne di Soclêf invezit e à une presince e une diversitât di arbui e sterps plui alte e e je plui in comunicazion cui ambients forestâi che a son dulintor.
◆ Chestis diferencis a permetin a un numar plui grant di speciis leadis a la aghe (che si viodi parsore) ma ancje a speciis che a sfrutin la grandece dal ambient rurâl e lis sôs peculiaritâts (par esempli la cuaie Coturnix coturnix, il coiat (re di cuaie) Crex crex¸ il pavoncin Vanellus vanellus) di frecuentâ di plui la campagne di Cjavaç.
A Soclêf la componente forestâl plui rapresentade a à permetût il contat cul dopli des speciis di pics e di parussulis e di speciis similis, no contatadis a Cjavaç, ma ancje cun speciis tant che a il sfrisot Coccothraustes coccothraustes.
◆ Inte campagne di Cjavaç a son stadis contatadis speciis che fin a pôc timp indaûr al jere facil cjatâlis ancje a Soclêf ma che, par vie dal lôr declin, in dì di vuê al è plui facil cjatâlis in zonis rurâls plui grandis e plui lontanis dal interni dal arc alpin.
Par ultin: in dutis dôs lis campagnis al è stât cjatât che a il paisaç rurâl tradizionâl al è un element fondamentâl pe variabilitât e pe abondance des speciis. ❚
La seconde part e sarà publicade sul numar di Març.